AKP កំពង់ធំ ថ្ងៃទី០១ ខែឧសភា ឆ្នាំ២០២៥ -- ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ និងជានាយកអង្គភាពគ្រប់គ្រងគម្រោងក្រោមហិរញ្ញប្បទានពីធនាគារពិភពលោក បានមានប្រសាសន៍ថា ការចុះសិក្សាផ្ទាល់ពីគម្រោងកែលម្អសន្តិសុខទឹកនៅកម្ពុជាកាន់តែមានភាពប្រសើរឡើង និងជួយបង្កើនផលិតភាពកសិកម្ម និងកសាងភាពធន់ទៅនឹងហានិភ័យអាកាសធាតុ ក្នុងឱកាសអញ្ជើញជាតំណាងដ៏ខ្ពង់ខ្ពស់របស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ដឹកនាំក្រុមបេសកកម្មធនាគារពិភពលោកគាំទ្រលើការអនុវត្តគម្រោងលើកទី១ របស់គម្រោងកែលម្អសន្តិសុខទឹកកម្ពុជា ធ្វើដំណើរទស្សនកិច្ចប្រព័ន្ធធារាសាស្ត្រ អាងទឹក៣០ កញ្ញា ដែលមានទីតាំងស្ថិតនៅស្រុកប្រាសាទបល្ល័ង្ក ស្រុកកំពង់ស្វាយ និងស្រុកស្ទោង ខេត្តកំពង់ធំ នាព្រឹកថ្ងៃទី០១ ខែឧសភា ឆ្នាំ ២០២៥។

ដំណើរទស្សនកិច្ចនាពេលនេះមានការអញ្ជើញចូលរួមពីឯកឧត្តមនាយកគម្រោង និងក្រុមការងារអនុវត្តគម្រោងរបស់ក្រសួងធនធានទឹក និងឧតុនិយម និងក្រសួងកសិកម្ម រុក្ខាប្រមាញ់និងនេសាទ ក្រុមការងារជំនាញការរបស់ធនាគារពិភពលោក តំណាងក្រសួងសេដ្ឋកិច្ច និងហិរញ្ញវត្ថុ ព្រមទាំងមានការចូលរួមពីមន្ទីរធនធានទឹក និងឧតុនិយម និងមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំផងដែរ។

ឯកឧត្តម ឈា ប៊ុនរិទ្ធ បានមានប្រសាសន៍ថា គោលបំណងនៃដំណើរទស្សនកិច្ចនេះគឺដើម្បីសិក្សាស្វែងយល់ពីស្ថានភាពបច្ចុប្បន្ននៃប្រព័ន្ធធារាសាស្ត្រ និងចំណាប់អារម្មណ៍របស់អាជ្ញាធរមូលដ្ឋាន ក៏ដូចជាប្រជាពលរដ្ឋនៅក្នុងតំបន់អនុគម្រោងផងដែរ និងបានជួបសំណេះសំណាលដោយផ្ទាល់ជាមួយអាជ្ញាធរស្រុក ឃុំ ភូមិពាក់ព័ន្ធ សហគមន៍កសិកម្មព្រមទាំងប្រជាពលរដ្ឋដែលកំពុងទទួលផលពីអាងទឹក និងប្រព័ន្ធធារាសាស្ត្រ៣០កញ្ញានេះ ដើម្បីទទួលបាននូវធាតុចូលបន្ថែម សម្រាប់ធ្វើការសិក្សាគម្រោងឱ្យមានភាពគ្រប់ជ្រុងជ្រោយ។

សូមបញ្ជាក់ថា គម្រោងកែលម្អសន្តិសុខទឹកនៅកម្ពុជាត្រូវអនុវត្តក្នុងរយៈពេល៥ឆ្នាំ ដោយក្រសួងធនធានទឹក និងឧតុនិយម និងក្រសួងកសិកម្ម រុក្ខាប្រមាញ់ និងនេសាទ ក្រោមហិរញ្ញប្បទានពីធនាគារពិភពលោក។ គម្រោងនេះនឹងធ្វើឱ្យសន្តិសុខទឹកនៅកម្ពុជាកាន់តែមានភាពប្រសើរឡើងជួយបង្កើនផលិតភាពកសិកម្មនិងកសាងភាពធន់ទៅនឹងហានិភ័យអាកាសធាតុ៕

ដោយ ស៊ុម វណ្ណា