AKP បន្ទាយមានជ័យ ថ្ងៃទី០១ ខែឧសភា ឆ្នាំ២០២៥-- ក្រុមការងាររាជរដ្ឋាភិបាលចុះមូលដ្ឋានឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ នៅថ្ងៃទី០១ ខែឧសភា ឆ្នាំ២០២៥ បានរៀបចំវេទិកាសាធារណៈដ៏សំខាន់មួយ ក្រោមវត្តមានរបស់លោកស្រី រស់ សុផានី អភិបាលរងខេត្តបន្ទាយមានជ័យ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកព្រះនេត្រព្រះ ដោយមានការចូលរួមយ៉ាងកុះករពីលោកបណ្ឌិត គង់ គា ប្រធាននាយកដ្ឋានដំណាំស្រូវ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំជប់វារី អមដំណើរដោយអនុប្រធានក្រុមការងារចុះមូលដ្ឋានឃុំ ក្រុមប្រឹក្សាស្រុក អភិបាលរងស្រុក សមាជិកក្រុមប្រឹក្សាឃុំ មេឃុំ មេភូមិ នាយប៉ុស្តិ៍នគរបាល លោកគ្រូ អ្នកគ្រូ និងប្រជាពលរដ្ឋសរុបចំនួន១៥២នាក់ ដែលបានបង្ហាញពីការយកចិត្តទុកដាក់ និងការចូលរួមយ៉ាងសកម្មក្នុងកិច្ចការអភិវឌ្ឍន៍មូលដ្ឋាន។

ក្នុងឱកាសនោះ លោកស្រី រស់ សុផានី បានមានប្រសាសន៍លើកឡើងពីការយកចិត្តទុកដាក់ឥតឈប់ឈររបស់រាជរដ្ឋាភិបាល ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ចំពោះសុខទុក្ខ និងការរស់នៅរបស់ប្រជាពលរដ្ឋនៅទូទាំងប្រទេស។ លោកស្រីបានសង្កត់ធ្ងន់លើសារៈសំខាន់នៃវេទិកាសាធារណៈនេះ ដែលជាវេទិកាដ៏មានតម្លៃសម្រាប់ការផ្លាស់ប្តូរមតិយោបល់ដោយផ្ទាល់រវាងថ្នាក់ដឹកនាំ និងប្រជាពលរដ្ឋ ដែលជាកម្លាំងចលករដ៏សំខាន់ក្នុងការកសាង និងអភិវឌ្ឍមូលដ្ឋានឱ្យកាន់តែរីកចម្រើន។

លោកស្រីអភិបាលរងខេត្តក៏បានកោតសរសើរចំពោះកិច្ចខិតខំប្រឹងប្រែងរបស់ក្រុមការងាររាជរដ្ឋាភិបាលចុះមូលដ្ឋានឃុំជប់វារី ក្រោមការដឹកនាំរបស់លោកបណ្ឌិត គង់ គា ដែលបានរៀបចំវេទិកានេះឡើង និងបានស្តាប់ដោយយកចិត្តទុកដាក់ចំពោះរាល់សំណូមពរ និងបញ្ហាប្រឈមនានាដែលប្រជាពលរដ្ឋបានលើកឡើង និងបានបញ្ជាក់ជាថ្មីនូវការប្តេជ្ញាចិត្តរបស់រដ្ឋបាលខេត្ត ក្នុងការសហការយ៉ាងជិតស្និទ្ធជាមួយក្រុមការងាររាជរដ្ឋាភិបាល និងអាជ្ញាធរមូលដ្ឋាន ដើម្បីស្វែងរកដំណោះស្រាយសមស្របចំពោះបញ្ហាទាំងនោះ ប្រកបដោយតម្លាភាព និងប្រសិទ្ធភាព។

ក្នុងនាមជាប្រធានក្រុមការងាររាជរដ្ឋាភិបាលចុះមូលដ្ឋានឃុំជប់វារី លោកបណ្ឌិត គង់ គា បានបង្ហាញនូវការគោរពយ៉ាងជ្រាលជ្រៅចំពោះវត្តមានរបស់លោកស្រីអភិបាលរងខេត្ត និងបងប្អូនប្រជាពលរដ្ឋទាំងអស់ដែលបានចំណាយពេលវេលាដ៏មានតម្លៃចូលរួមក្នុងវេទិកានេះ។ លោកបណ្ឌិតបានបញ្ជាក់ថា គោលបំណងសំខាន់នៃការរៀបចំវេទិកានេះ គឺដើម្បីបើកឱកាសឱ្យប្រជាពលរដ្ឋបានបញ្ចេញនូវមតិយោបល់ បញ្ហាប្រឈម និងសំណូមពរនានាដែលពួកគេកំពុងជួបប្រទះនៅក្នុងជីវភាពរស់នៅប្រចាំថ្ងៃ។

លោកបណ្ឌិតបានសង្កត់ធ្ងន់ថា សំឡេងរបស់ប្រជាពលរដ្ឋគឺជាកញ្ចក់ឆ្លុះបញ្ចាំងដ៏ពិតប្រាកដមួយសម្រាប់ក្រុមការងាររាជរដ្ឋាភិបាល និងអាជ្ញាធរមូលដ្ឋាន ដើម្បីឱ្យយល់កាន់តែច្បាស់អំពីតម្រូវការ និងក្តីកង្វល់របស់ពួកគាត់។ តាមរយៈការស្តាប់ដោយយកចិត្តទុកដាក់ និងការវិភាគស៊ីជម្រៅលើរាល់បញ្ហាដែលបានលើកឡើង ក្រុមការងារនឹងខិតខំប្រឹងប្រែងស្វែងរកដំណោះស្រាយប្រកបដោយប្រសិទ្ធភាព និងយូរអង្វែង ដើម្បីលើកកម្ពស់គុណភាពជីវិតរបស់ប្រជាពលរដ្ឋនៅក្នុងឃុំជប់វារីឱ្យកាន់តែប្រសើរឡើង។

នៅក្នុងវេទិកាសាធារណៈនោះ ប្រជាពលរដ្ឋបានលើកឡើងនូវសំណូមពរ និងបញ្ហាប្រឈមមួយចំនួនដែលទាក់ទងនឹងជីវភាពរស់នៅ ការអភិវឌ្ឍហេដ្ឋារចនាសម្ព័ន្ធមូលដ្ឋាន បញ្ហាទឹកប្រើប្រាស់ បញ្ហាផ្លូវថ្នល់ និងបញ្ហាផ្សេងៗទៀតដែលពាក់ព័ន្ធនឹងការអភិវឌ្ឍន៍សេដ្ឋកិច្ច សង្គមនៅក្នុងមូលដ្ឋាន។

ជាការឆ្លើយតប លោកស្រី រស់ សុផានី និងលោកបណ្ឌិត គង់ គា រួមទាំងសមាជិកក្រុមការងារផ្សេងទៀត បានស្តាប់ដោយយកចិត្តទុកដាក់ និងបានផ្តល់នូវការឆ្លើយស្រាយបំភ្លឺច្បាស់លាស់ចំពោះសំណួរ និងបញ្ហាដែលប្រជាពលរដ្ឋបានលើកឡើង។ ក្រុមការងារក៏បានកត់ត្រាទុកនូវសំណូមពរមួយចំនួនដែលត្រូវការការសិក្សាបន្ថែម និងការសម្របសម្រួលជាមួយស្ថាប័នពាក់ព័ន្ធ ដើម្បីចាត់វិធានការដោះស្រាយជូនប្រជាពលរដ្ឋឱ្យបានឆាប់រហ័សតាមលទ្ធភាពដែលអាចធ្វើបាន។ ជាពិសេស លោកស្រីអភិបាលរងខេត្ត បានណែនាំដល់អាជ្ញាធរមូលដ្ឋាន និងមន្ទីរជំនាញពាក់ព័ន្ធ ឱ្យធ្វើការសិក្សាជាបន្ទាន់លើបញ្ហាផ្លូវថ្នល់ដែលរងការខូចខាត និងបញ្ហាប្រព័ន្ធធារាសាស្រ្ត ដើម្បីធានាបាននូវការធ្វើដំណើរប្រកបដោយភាពងាយស្រួល និងការផ្គត់ផ្គង់ទឹកសម្រាប់កសិកម្មប្រកបដោយនិរន្តរភាព។ ចំណែកលោកបណ្ឌិត គង់ គា ក៏បានសន្យាថានឹងពិនិត្យលទ្ធភាពក្នុងការគាំទ្របច្ចេកទេស និងពូជស្រូវដែលមានគុណភាពដល់កសិករនៅក្នុងឃុំ ដើម្បីបង្កើនទិន្នផល និងលើកកម្ពស់ជីវភាពរបស់ពួកគាត់។

វេទិកានេះមិនត្រឹមតែជាវេទិកាសម្រាប់ការបញ្ចេញមតិ និងការដោះស្រាយបញ្ហាជាក់ស្តែងប៉ុណ្ណោះទេ ប៉ុន្តែវាក៏ជាវេទិកាដ៏សំខាន់មួយសម្រាប់ពង្រឹងទំនាក់ទំនង និងកសាងទំនុកចិត្តរវាងរាជរដ្ឋាភិបាល អាជ្ញាធរមូលដ្ឋាន និងប្រជាពលរដ្ឋ ដែលជាកត្តាសំខាន់សម្រាប់ការអភិវឌ្ឍន៍សង្គម សេដ្ឋកិច្ចប្រកបដោយបរិយាប័ន្ន និងនិរន្តរភាពនៅក្នុងឃុំជប់វារី និងខេត្តបន្ទាយមានជ័យទាំងមូល។ ក្រុមការងាររាជរដ្ឋាភិបាលចុះមូលដ្ឋានឃុំជប់វារី បានប្តេជ្ញាចិត្តបន្តធ្វើការយ៉ាងជិតស្និទ្ធជាមួយប្រជាពលរដ្ឋ និងអាជ្ញាធរមូលដ្ឋាន ដើម្បីតាមដាន និងវាយតម្លៃលើការអនុវត្តនូវដំណោះស្រាយដែលបានសន្យា និងបន្តរៀបចំវេទិកាស្រដៀងគ្នានេះនាពេលអនាគត ដើម្បីធានាថា សំឡេងរបស់ប្រជាពលរដ្ឋនៅតែជាអាទិភាពចម្បងក្នុងការដឹកនាំ និងអភិវឌ្ឍមូលដ្ឋាន៕

ដោយ ឈុន សារ៉ាត