AKP កំពង់ឆ្នាំង ថ្ងៃទី០១ ខែឧសភា ឆ្នាំ២០២៥ -- លោកជំទាវបណ្ឌិត សឿ សុជាតា អនុរដ្ឋលេខាធិការក្រសួងអប់រំ យុវជន និងកីឡា បានអញ្ជើញជាអធិបតីសម្ពោធដាក់ឱ្យប្រើប្រាស់ជាផ្លូវការ នៅវិទ្យាល័យ ហ៊ុន សែនទឹកផុស និងសមិទ្ធផលនានា ក្នុងស្រុកទឹកផុស ខេត្តកំពង់ឆ្នាំង នាថ្ងៃទី០១ ខែឧសភា ឆ្នាំ២០២៥ ដែលមានការឧបត្ថមពីរាជ្យរដ្ឋាភិបាល និងសប្បុរសជន ដឹកនាំដោយព្រះធម្មវនវាសីបណ្ឌិត ចន្ទមុន្នី ព្រះរាជាគណៈកិត្តិយសនៃព្រះរាជាណាចក្រកម្ពុជា ព្រះសង្ឃាធិបតីវត្តចន្ទប្បជោត្តនារ៉ាម ហៅវត្តតាសុត  ដោយមានការអញ្ជើញចូលរួមពីឯកឧត្តម លោកជំទាវ លោក លោកស្រី អាជ្ញាធរគ្រប់លំដាប់ថ្នាក់ ប្រជាពលរដ្ឋ និងសិស្សានុសិស្សជាច្រើននាក់ផងដែរ។

ក្នុងឱកាសនោះលោកជំទាវបណ្ឌិត សឿ សុជាតា  បានលើកឡើងអំពីសមិទ្ធផលនានាឱ្យឃើញពីការរីកចម្រើនគ្រប់វិស័យដែលកើតឡើងពីមូលដ្ឋានគ្រឹះដ៏សំខាន់នោះគឺប្រទេសជាតិមានសុខសន្តិភាព មានការអភិវឌ្ឍលើគ្រប់វិស័យ មានភាពសុខុដុម ហេដ្ឋារចនាសម្ព័ន្ធ ស្ពានថ្នល់សាលារៀន វត្តអារាម  និងសន្តិសុខសង្គម ព្រមទាំងគាំទ្រការអនុវត្តគោលនយោបាយភូមិ ឃុំ សង្កាត់ មានសុវត្ថិភាព រដ្ឋបាលខេត្តបានពង្រឹងជាប្រចាំនូវការទប់ស្កាត់ បទល្មើសនានាក្នុងមូលដ្ឋាន។

ទន្ទឹមនឹងនេះ លោកជំទាវបានមានប្រសាសន៍បន្តថា ស្របតាមគោលនយោបាយសុខដុមនីយកម្មគឺជាការបង្ហាញនូវភាពសម្បូរបែបរបស់ប្រទេសកម្ពុជា និងជាភស្តុតាងបង្ហាញថាព្រះរាជាណាចក្រកម្ពុជា ស្ថិតក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ធ្វើឱ្យប្រទេសមានសេរីភាពសន្តិភាពយ៉ាងពេញលេញ និងមានសុខដុមនីយកម្មដល់ប្រជាពលរដ្ឋយើងគ្រប់គ្នា។ សមស្របនឹងបច្ចុប្បន្នភាពនៃប្រទេសកម្ពុជា និងជាសារនយោបាយមួយដែលត្រូវបានអនុវត្តយ៉ាងសស្រាក់សស្រាំ និងផុលផុសតាមមជ្ឈដ្ឋានគ្រប់ទិសទី ដើម្បីជាការចូលរួមរក្សាគុណតម្លៃជាតិ ពង្រឹងនិងពង្រីកសីលធម៌ និងកសាងមោទកភាពជាតិ លើកកម្ពស់កិត្យានុភាពដែលប្រទេសយើងមានការរីកចម្រើន និងរក្សាបាននូវសុខសន្តិភាព ធ្វើឱ្យសហគមន៍ជឿនលឿន ដែលជាផ្នែកមួយនៃអំណោយផលដល់ការប្រែក្លាយប្រទេសជាតិទៅកាន់វឌ្ឍនភាព។

ក្នុងបរិបទនេះ លោកជំទាវបណ្ឌិតអនុរដ្ឋលេខាធិការបានបន្តទៀតថា ដើម្បីប្រទេសជាតិមានការរីកចម្រើន និងអភិវឌ្ឍបន្តទៀតសមិទ្ធផលនានាជាច្រើនរបស់រាជរដ្ឋាភិបាល ក៏ដូចជារបស់គណបក្សប្រជាជនកម្ពុជា ជាពិសេស ហេដ្ឋារចនាសម្ព័ន្ធផ្លូវ ថ្នល់ ដោយលើកកម្រិតកម្ពស់ផ្លូវពីផ្លូវក្រាលក្រួសក្រហម ទៅជាផ្លូវក្រាលកៅស៊ូ ឬផ្លូវបេតុងជាច្រើនខ្សែនៅទូទាំប្រទេស អគារ សាលារៀន និងវត្តអារាម ដោយឡែកនៅក្នុងស្រុកទឹកផុស ខេត្តកំពង់ឆ្នាំងយើងនេះ។

សូមបញ្ជាក់ផងដែរ ឯកឧត្តម លោកជំទាវ លោក លោកស្រី ព្រះសង្ឃ និងមន្ត្រីអមដំណើរ បានមានវត្ថុអនុស្សវរីយ៍ចែកជូន លោកយាយ លោកតា ចាស់ព្រឹទ្ធាចារ្យ លោកគ្រូអ្នកគ្រូ និងសិស្សានុសិស្សផងដែរ៕

ដោយ បៃ ស៊ីថុន