AKP បន្ទាយមានជ័យ ថ្ងៃទី០១ ខែឧសភា ឆ្នាំ២០២៥ -- រដ្ឋបាលខេត្តបន្ទាយមានជ័យបានរៀបចំពិធីអបអរសាទរយ៉ាងឱឡារិកនូវទិវាពលកម្មអន្តរជាតិ ១ ឧសភា ឆ្នាំ២០២៥ ខួបអនុស្សាវរីយ៍លើកទី១៣៩ ក្រោមអធិបតីភាពរបស់ឯកឧត្ដម ប្លែក វ៉ារី ប្រធានក្រុមប្រឹក្សាខេត្ត និង ឯកឧត្ដម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ នាព្រឹកថ្ងៃទី០១ ខែឧសភា ឆ្នាំ២០២៥ នៅសាលប្រជុំសាលាខេត្ត ដោយពិធីនេះប្រារព្ធឡើងក្រោមប្រធានបទ “រួមគ្នាដើម្បីការងារសមរម្យ និងកំណើនប្រកបដោយចីរភាព និងភាពធន់” ដែលឆ្លុះបញ្ចាំងពីការប្តេជ្ញាចិត្តរួមគ្នាក្នុងការលើកកម្ពស់សិទ្ធិ និងផលប្រយោជន៍របស់បងប្អូនកម្មករនិយោជិត ព្រមទាំងជំរុញកំណើនសេដ្ឋកិច្ចប្រកបដោយបរិយាបន្ន និងនិរន្តរភាពនៅក្នុងខេត្ត។

ពិធីនេះទទួលបានការអញ្ជើញចូលរួមពីសំណាក់តំណាងស្ថាប័នតុលាការ កងកម្លាំងប្រដាប់អាវុធគ្រប់អង្គភាព ថ្នាក់ដឹកនាំមន្ទីរ អង្គភាពនានាក្នុងខេត្ត អភិបាលក្រុង-ស្រុក តំណាងអង្គការសង្គមស៊ីវិល ដៃគូអភិវឌ្ឍន៍ ក្រុមហ៊ុន រោងចក្រ គ្រឹះស្ថាន និងបងប្អូនជានិយោជក និយោជិត សរុបប្រមាណជាង៦០០នាក់ ដែលបានបង្ហាញនូវស្មារតីសាមគ្គីភាព និងការយកចិត្តទុកដាក់ចំពោះសារសំខាន់នៃទិវាពលកម្មអន្តរជាតិនេះ។

ក្នុងឱកាសនោះ ឯកឧត្ដម អ៊ុំ រាត្រី បានថ្លែងនូវសុន្ទរកថាដ៏មានអត្ថន័យ ដោយបានគូសបញ្ជាក់អំពីសារៈសំខាន់នៃទិវាពលកម្មអន្តរជាតិ ដែលជាឱកាសរំលឹកដល់ការលះបង់ និងការតស៊ូរបស់កម្មករនិយោជិតទូទាំងពិភពលោកក្នុងការទាមទារនូវសិទ្ធិ និងលក្ខខណ្ឌការងារសមរម្យ និងបានកោតសរសើរចំពោះបងប្អូនកម្មករនិយោជិតទាំងអស់នៅក្នុងខេត្តបន្ទាយមានជ័យ ដែលបានខិតខំប្រឹងប្រែងយ៉ាងសកម្មក្នុងការរួមចំណែកដល់ការអភិវឌ្ឍសេដ្ឋកិច្ច និងសង្គមរបស់ខេត្ត។ រាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី តែងតែយកចិត្តទុកដាក់ខ្ពស់ចំពោះសុខុមាលភាព និងសិទ្ធិរបស់បងប្អូនកម្មករនិយោជិត ហើយបានដាក់ចេញនូវគោលនយោបាយ និងវិធានការនានា ដើម្បីលើកកម្ពស់លក្ខខណ្ឌការងារ ប្រាក់ឈ្នួល និងការបណ្តុះបណ្តាលជំនាញ។

ទន្ទឹមនឹងនេះ ឯកឧត្ដម អ៊ុំ រាត្រី បានលើកឡើងអំពីសារៈសំខាន់នៃប្រធានបទឆ្នាំនេះ “រួមគ្នាដើម្បីការងារសមរម្យ និងកំណើនប្រកបដោយចីរភាព និងភាពធន់” ដោយបានអំពាវនាវដល់គ្រប់ភាគីពាក់ព័ន្ធ ទាំងនិយោជក និយោជិត រដ្ឋបាលខេត្ត អង្គការសង្គមស៊ីវិល និងដៃគូអភិវឌ្ឍន៍ ឱ្យបន្តកិច្ចសហប្រតិបត្តិការយ៉ាងជិតស្និទ្ធ ដើម្បីធានាបាននូវការងារសមរម្យ ដែលមានលក្ខខណ្ឌការងារល្អ ប្រាក់ឈ្នួលសមស្រប និងឱកាសសម្រាប់ការអភិវឌ្ឍខ្លួន ព្រមទាំងបានសង្កត់ធ្ងន់លើការជំរុញកំណើនសេដ្ឋកិច្ចប្រកបដោយចីរភាព ដែលគិតគូរដល់បរិស្ថាន និងធន់នឹងវិបត្តិផ្សេងៗ។

ក្នុងពិធីនោះ លោក នួន ស៊ីណា ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តបន្ទាយមានជ័យ បានធ្វើបទបង្ហាញសង្ខេបអំពីស្ថានភាពការងារ និងការបណ្តុះបណ្តាលវិជ្ជាជីវៈនៅក្នុងខេត្ត និងបានគូសបញ្ជាក់អំពីវឌ្ឍនភាពដែលសម្រេចបាន ក៏ដូចជាបញ្ហាប្រឈមនានាដែលកំពុងមាន ហើយបានសង្កត់ធ្ងន់លើការប្តេជ្ញាចិត្តរបស់មន្ទីរក្នុងការបន្តពង្រឹងកិច្ចសហប្រតិបត្តិការជាមួយគ្រប់ភាគី ដើម្បីលើកកម្ពស់គុណភាពនៃការងារ និងជំនាញរបស់កម្លាំងពលកម្មនៅក្នុងខេត្ត ឱ្យកាន់តែប្រសើរឡើងស្របតាមតម្រូវការទីផ្សារការងារ។

ពិធីអបអរសាទរទិវាពលកម្មអន្តរជាតិនៅខេត្តបន្ទាយមានជ័យ បានប្រព្រឹត្តទៅក្នុងបរិយាកាសរីករាយ និងស្និទ្ធស្នាល។ បងប្អូនកម្មករនិយោជិតដែលបានចូលរួម បានបង្ហាញនូវទឹកមុខសប្បាយរីករាយ និងមោទនភាពចំពោះការចូលរួមចំណែករបស់ខ្លួនក្នុងការកសាងសង្គម និងសេដ្ឋកិច្ចជាតិ។ ទិវាពលកម្មអន្តរជាតិ ១ ឧសភា ឆ្នាំ២០២៥ នៅខេត្តបន្ទាយមានជ័យ បានបន្សល់ទុកនូវសារសំខាន់ជាច្រើនស្តីពីការរួបរួមគ្នា ការគោរពសិទ្ធិ និងការលើកកម្ពស់លក្ខខណ្ឌការងាររបស់បងប្អូនកម្មករនិយោជិត។ ក្រោមប្រធានបទ “រួមគ្នាដើម្បីការងារសមរម្យ និងកំណើនប្រកបដោយចីរភាព និងភាពធន់” ខេត្តបន្ទាយមានជ័យបានបង្ហាញនូវការប្តេជ្ញាចិត្តយ៉ាងមុតមាំក្នុងការបន្តកសាងអនាគតការងារមួយដែលកាន់តែប្រសើរសម្រាប់ទាំងអស់គ្នា៕

ដោយ ឈុន សារ៉ាត