AKP សៀមរាប ថ្ងៃទី២៣ ខែមេសា ឆ្នាំ២០២៥-- 

ថ្លែងក្នុងពិធីបើកវគ្គបណ្តុះបណ្តាលស្តីពីការវាយតម្លៃលក្ខខណ្ឌសុវត្ថិភាពនៃហេដ្ឋារចនាសម្ព័ននៅតំបន់សាលារៀន ដោយប្រើប្រាស់វិធីសាស្ត្រដាក់ចំណាត់ថ្នាក់ផ្កាយ (SR4S) នៅវិទ្យាល័យ ហ៊ុន សែន ប្រាសាទបាគង ក្នុងស្រុកប្រាសាទបាគង ខេត្តសៀមរាប នាព្រឹកថ្ងៃទី២៣ ខែមេសា ឆ្នាំ២០២៥ លោក លី សារី អភិបាលរងខេត្ត និងជាអនុប្រធានអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បានមានប្រសាសន៍ថា វគ្គបណ្តុះបណ្តាលនាថ្ងៃនេះ ប្រៀបដូចជាខ្សែសង្វាក់ដែលប្រទាក់ក្រឡាគ្នា ក្នុងដំណើរអភិវឌ្ឍន៍សេដ្ឋកិច្ចសង្គម ដែលមានគោលដៅរៀបចំឱ្យមាន របៀបរៀបរយលើកិច្ចការងាររៀបចំហេដ្ឋារចនាសម្ព័ន្ធ ស្លាកសញ្ញាចរាចរណ៍ និងផលប៉ះពាល់នៃគ្រោះថ្នាក់ចរាចរណ៍ និងមានភាពសុខដុមសម្រាប់អ្នកប្រើប្រាស់ផ្លូវថ្នល់  ដើម្បីធ្វើយ៉ាងណាឱ្យអ្នកចូលរួម វគ្គបណ្តុះបណ្តាលនាពេលនេះទទួលបាននូវចំណេះដឹង និងបទពិសោធន៍ល្អ ដែលជាជំនួយដល់ការអនុវត្ត វិធានការសុវត្ថិភាពចរាចរណ៍ និងកាត់បន្ថយគ្រោះថ្នាក់ចរាចរណ៍ ចំពោះបងប្អូនប្រជាពលរដ្ឋ និងសិស្សានុសិស្ស។

លោក លី សារី បានបញ្ជាក់ថា ដើម្បីធានាសុវត្ថិភាពចរាចរណ៍ និងកាត់បន្ថយហានិភ័យគ្រោះថ្នាក់ចរាចរណ៍គឺយើងត្រូវផ្តល់ឱ្យសិស្សា នុសិស្សនូវឧបករណ៍សុវត្ថិភាព និងការអប់រំអំពីសុវត្ថិភាពចរាចរណ៍ ព្រមទាំងដាក់បញ្ចូលនូវវិធីសាស្រ្តរួមមួយ ដែលកំណត់ការអប់រំជាចំណុចគន្លឹះក្នុងការពង្រឹងឥរិយាបថសុវត្ថិភាពចរាចរណ៍របស់អ្នកប្រើប្រាស់ផ្លូវថ្នល់បន្ថែមពីលើការផ្តល់មួកសុវត្ថិភាពមានគុណភាពខ្ពស់ហើយឱ្យមានការបណ្តុះបណ្តាលកុមារឬសិស្សឱ្យយល់ពីវិធានការ វិធីសាស្រ្តដែល អាចជៀសផុតពីគ្រោះថ្នាក់ចរាចរណ៍ ឱ្យមានការយល់ដឹងពីសុវត្ថិភាពចរាចរណ៍តាំងពីកុមារភាព ហើយអាចនឹងពាំនាំទៅដល់មាតាបិតា សមាជិកក្នុងគ្រួសារក្មួយៗឱ្យយល់ និងអនុវត្តន៍ឱ្យបានម៉ឺង ម៉ាត់ក្នុងពេលធ្វើដំណើរតាមផ្លូវថ្នល់។

លោកអភិបាលរងខេត្តបានបន្ថែមទៀតថាវគ្គបណ្តុះបណ្តាលនាពេលនេះ អាចជួយឱ្យនាយកសាលា លោកគ្រូ អ្នកគ្រូ សិក្ខាកាម សិស្សានុសិស្ស បានជ្រួតជ្រាបកាន់តែច្បាស់អំពីការងារសុវត្ថិភាពចរាចរណ៍ ព្រមទាំងបានទទួលនូវចំណេះដឹងស្តីពីការវាយតម្លៃលក្ខខណ្ឌសុវត្ថិភាពនៃហេដ្ឋារចនាសម្ព័ន្ធនៅតំបន់សាលារៀនដោយប្រើ ប្រាស់វិធីសាស្ត្រដាក់ចំណាត់ថ្នាក់ផ្កាយ ដើម្បីកសាងមូលដ្ឋានគ្រឹះនៅក្នុងការវាយតម្លៃ និងកំណត់ពី ហេដ្ឋារចនាសម្ព័ន្ធដែលនឹងត្រូវធ្វើការកែលម្អនាពេលខាងមុខ។

លោក លី សារី ក៏បានបង្ហាញនូវការព្រួយបារម្ភអំពីគ្រោះថ្នាក់ចរាចរណ៍ផ្លូវគោក និងបានសំណូមពរឱ្យអ្នកប្រើប្រាស់យានជំនិះគ្រប់ប្រភេទ ត្រូវចូលរួមគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួន មិនត្រូវបើកបរលើសល្បឿនកំណត់ ត្រូវគោរពសិទ្ធិអាទិភាព៕

ដោយ ឃុត សៅ