AKP ព្រះសីហនុ ថ្ងៃទី២៣ ខែមេសា ឆ្នាំ២០២៥-- 

យោងតាមលិខិតលេខ២៧៦៥ជផ ចុះថ្ងៃទី២០ ខែសីហា ឆ្នាំ២០២៤ របស់រដ្ឋបាលជលផលស្តីពីសំណើសុំជួយជំរុញ និងសម្របសម្រួលអញ្ជើញប្រជានេសាទក្នុងខេត្តព្រះសីហនុ មកបំពាក់ឧបករណ៍គ្រប់គ្រងនាវានេសាទ (VMS) មន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ សូមជូនដំណឹងដល់អស់លោក លោកស្រី ដែលប្រើនាវានេសាទអួនអូស និងនាវានេសាទផ្សេងទៀតដែលមានប្រវែងចាប់ពី១២ម៉ែត្រឡើង ឱ្យបានជ្រាបថា រដ្ឋបាលជលផលបានសហការជាមួយក្រុមហ៊ុន ECOINSOFT នឹងរៀបចំបំពាក់ឧបករណ៍គ្រប់គ្រងនាវានេសាទ (VMS) ដែលប្រព្រឹត្តទៅចាប់ពីថ្ងៃទី២១ ដល់ថ្ងៃទី២៥ ខែមេសា ឆ្នាំ២០២៥។

គោលបំណងនៃការបំពាក់ឧបករណ៍នេះ ដើម្បីចូលរួមការពារ អភិរក្សធនធានជលផល និងជាការផ្តល់ព័ត៌មានអំពីឧបទ្ទវហេតុនៃនាវានេសាទនៅលើផ្ទៃសមុទ្រដល់សមត្ថកិច្ចពាក់ព័ន្ធក្នុងការជួយសង្គ្រោះបានទាន់ពេលវេលា។

ទទួលបានសេចក្តីជូនដំណឹងនេះ សូមលោក លោកស្រីដែលប្រើនាវានេសាទអូនអូស និងនាវានេសាទផ្សេងទៀតដែលមានប្រវែងចាប់ពី១២ម៉ែត្រឡើងទាំងអស់ ជ្រាប និងចូលរួមបំពាក់ឧបករណ៍គ្រប់គ្រងនាវានេសាទ (VMS) ឱ្យបានទាន់ពេលវេលាចាប់ពីថ្ងៃជូនដំណឹងនេះតទៅ៕

ដោយ ងូ សុមុនី