AKP ភ្នំពេញ ថ្ងៃទី៣០ ខែមេសា ឆ្នាំ២០២៦ -- ព្រឹត្តិការណ៍មួយដែលផ្តោតលើកិច្ចសហប្រតិបត្តិការសេដ្ឋកិច្ច និងពាណិជ្ជកម្មក្នុងស្រុករវាងប្រទេសចិន និងរុស្ស៊ី ត្រូវបានធ្វើឡើងនៅក្នុងតំបន់ Pskov នៃប្រទេសរុស្ស៊ីដោយបានប្រមូលផ្តុំតំណាងសហគ្រាសចិន និងសមាជិកនៃសភាពាណិជ្ជកម្ម និងឧស្សាហកម្មក្នុងតំបន់ ដើម្បីជំរុញកិច្ចសហការជាក់ស្តែង។

ការពិភាក្សាផ្តោតលើពាណិជ្ជកម្មកសិកម្ម ការណែនាំអំពីបច្ចេកវិទ្យាកែច្នៃអាហារ និងការបង្កើនប្រសិទ្ធភាពនៃភស្តុភារកម្មឆ្លងដែន និងហិរញ្ញប្បទានគម្រោង ដែលមានគោលបំណងពន្លឿនការអនុវត្តគម្រោងឧស្សាហកម្មជាក់ស្តែង។

លោក ឡៅ ហ្សានហ៊ុយ (Luo Zhanhui) អគ្គកុងស៊ុលចិនប្រចាំទីក្រុងSt. Petersburg បានកត់សម្គាល់ថា កិច្ចសហប្រតិបត្តិការសេដ្ឋកិច្ច និងពាណិជ្ជកម្មបានក្លាយជាសសរស្តម្ភនៃចំណងមិត្តភាពចិន-រុស្ស៊ី ដោយបង្ហាញពីភាពបំពេញបន្ថែមផ្នែកឧស្សាហកម្មដែលកំពុងកើនឡើងរបស់ប្រទេសទាំងពីរនៅភាគឦសាននៃទ្វីបអឺរ៉ុប។

លោក ឡៅ បាននិយាយថា ភាគីទាំងពីរចែករំលែកផលប្រយោជន៍ដែលមានភាពស៊ីសង្វាក់គ្នាយ៉ាងជ្រាលជ្រៅ ខណៈដែលប្រទេសចិនកំពុងស្វែងរកឱកាសសហប្រតិបត្តិការដែលមានគុណភាពខ្ពស់ក្នុងពាណិជ្ជកម្ម និងការវិនិយោគ ហើយប្រទេសរុស្ស៊ីមានយុទ្ធសាស្ត្រច្បាស់លាស់សម្រាប់កិច្ចសហប្រតិបត្តិការអន្តរជាតិ។

លោកបាននិយាយថា តំបន់ Pskov មានមូលដ្ឋានឧស្សាហកម្មដ៏រឹងមាំនិងធនធានកសិកម្មដ៏សម្បូរបែប ដោយអាជ្ញាធរមូលដ្ឋាន និងអាជីវកម្មកំពុងធ្វើការដើម្បីបង្កើតបណ្តាញសហប្រតិបត្តិការពី «ចំណុចមួយទៅចំណុចមួយ» សម្រាប់ការផ្តល់នូវលទ្ធផលគម្រោងឱ្យបានឆាប់តាមដែលអាចធ្វើទៅបាន។

ក្រុមហ៊ុនកំពុងពិភាក្សាជាមួយអ្នកផ្គត់ផ្គង់ចិន ដើម្បីទិញខ្សែផលិតកម្មសាច់ក្រក ឧបករណ៍វេចខ្ចប់ស្វ័យប្រវត្តិ និងគ្រឿងចក្រកសិកម្មធុនធ្ងន់ ដើម្បីគាំទ្រដល់ការពង្រីកខ្លួន។

លោក អាឡិចសាន់ដឺ គូប៉ាកូវ (Alexander Kupakov) ប្រធានសភាពាណិជ្ជកម្ម និងឧស្សាហកម្មតំបន់នៅ Pskov បាននិយាយថាតំបន់ឧស្សាហកម្មស្រាល និងតំបន់កែច្នៃអាហារ អាចត្រូវបានបង្កើតឡើងនាពេលអនាគត ដែលជាជម្រករបស់សហគ្រាសជាង ៣០០កន្លែងនៅទូទាំងវិស័យជាច្រើន។

លោកបានបន្ថែមថា ភាគីទាំងពីរបានបង្កើតយន្តការសម្របសម្រួលជាប្រចាំ ហើយគ្រោងនឹងធ្វើការចុះទៅមើលទីតាំង និងការពិគ្រោះយោបល់តាមប្រព័ន្ធអ៊ីនធឺណិតនាពេលអនាគតដ៏ខ្លីខាងមុខលើបញ្ហាជាក់លាក់៕

ដោយ៖ មូល មិនា (ប្រភព៖ ស៊ីនហួ)