AKP កំពង់ធំ ថ្ងៃទី២៣ ខែមេសា ឆ្នំា២០២៥-- ព្រះសាសនមុនីមហាកម្មដ្ឋាននាចរិយ ហ៊ឹម ប៊ុនធឿន បានមានសង្ឃដីកាថា ការធ្វើបដិបត្តិធុតង្គ និងវិបស្សនាធុរៈ គឺដើម្បីធានានូវការផ្សព្វផ្សាយពុទ្ធសាសនាឱ្យបាnarនទូលំទូលាយដល់ពុទ្ធសាសនិក ក្នុងឱកាសដែលព្រះអង្គ ព្រមទាំងព្រះមន្ត្រីសង្ឃខេត្ត/ស្រុក បាននិមន្តជាព្រះអធិបតីភាពក្នុងពិធីបើកវគ្គបដិបត្តិធុតង្គ និងប្រកាសតែងតាំងប្រធានមណ្ឌលវិបស្សនាធុរៈស្រុកស្ទោង ព្រមទាំងគណៈកម្មាធិការនៅវត្តឃ្លាំងខ្មូត ភូមិប្រឡាយ ឃុំប្រឡាយ ស្រុកស្ទោង ខេត្តកំពង់ធំ កាលពីរសៀលថ្ងៃទី២២ ខែមេសា ឆ្នាំ២០២៥។

ព្រះអង្គបានមានសង្ឃដីកាថា ព្រះករុណាព្រះថេរាថេរគ្រប់ព្រះអង្គឧបាសក ឧបាសិកា សីលវន្ត សីលវតី ដែលមានសេចក្តីជ្រះថ្លាបដិបត្តិធុតង្គជាកិច្ចសំខាន់មួយក្នុងព្រះពុទ្ធសាសនា ដែលភិក្ខុ ឬអ្នកអ្នកមានសីលមានសេចក្តីប្រាថ្នាតិច បដិបត្តិដើម្បីជម្រះនូវសីលឱ្យស្អាតបរិសុទ្ធផូរផង់ ដើម្បីកម្ចាត់បង់នូវកិលេសមានតណ្ហា និងមានះជាដើម ដែលកើតឡើងក្នុងសណ្ឋានដើម្បីតម្កល់ខ្លួនក្នុងគុណ មានសន្តោសគុណនិង អប្បិច្ឆភាគុណជាដើមនិងដើម្បីញ៉ាំងចិត្តឱ្យប្រព្រឹត្តទៅសមគួរដល់ភាវនាកម្មកិរិយាស្វែងរកនូវព្រះនិព្វានឆាប់រហ័ស។

ទន្ទឹមនឹងនេះដើម្បីញ៉ាំងឱ្យការធ្វើបដិបត្តិធុតង្គ និងវិបស្សនាធុរៈ ទទួលបាននូវលទ្ធផលល្អប្រសើរប្រកបដោយសីល និងធម៌វិន័យអ្នកធ្វើបដិបត្តិទាំងអស់ ត្រូវតម្កល់ចិត្ត ការគោរពបដិបត្តិនៅវិន័យដោយជ្រះថ្លា និងខ្ជាប់ខ្ជួនគ្រងស្បង់ចីវរ និងសម្លៀកបំពាក់ មានចែងនៅក្នុងពុទ្ធប្បញ្ញត្តិ និងវិន័យ គឺ ផ្នែកបព្វជិត៖ ក. ភិក្ខុ និងសាមណេរត្រូវប្រើប្រាស់ត្រៃចីវរ និងសមណបរិក្ខាដែលមានសម្តែងនៅក្នុងព្រះវិន័យមានចីវរពណ៌ទឹកក្រូចលឿង។ ខ. ផ្នែកគ្រហស្ថ៖ ទាំងពីរភេទត្រូវប្រើប្រាស់ពណ៌សសុទ្ធតាមប្រភេទដូចជា៖ ១. ឧបាសកត្រូវស្លៀកខោ ស ពាក់អាវ ស ពានាក្រមា ស ពីខាងក្រៅ វៀរចាកប្រើប្រាស់សម្លៀកបំពាក់ផ្សេង។ ២. ឧបាសិកា ត្រូវស្លៀកសំពាត់ស ពាក់អាវសដៃវែង ពានាក្រមាសពីខាងក្រៅ។ គ. សម្ភារដែលត្រូវយកជាប់ជាមួយមានមុងសមាធិ១ និងកន្ទេលបត់១ និងសម្ភារមានបាត្រជាដើម។

សូមបញ្ជាក់ថា កម្មវិធីបដិបត្តិធុតង្គនេះមានរយៈពេល៧ថ្ងៃ គឺចាប់ពីថ្ងៃទី២២ ដល់ថ្ងៃទី២៨ ខែមេសាឆ្នាំ ២០២៥៕

ដោយ ស៊ុម វណ្ណា