AKP ភ្នំពេញ ថ្ងៃទី២៣ ខែមេសា ឆ្នាំ២០២៥--ឯកឧត្តម ស្រ៊ុន ដារិទ្ធិ រដ្ឋលេខាធិការ ក្រសួងដែនដី នគរូបនីយកម្ម និងសំណង់ និងជាប្រធានក្រុមការងារប្រតិបត្តិប្រចាំខេត្តកំពង់ឆ្នាំង និងលោក ខូវ មាស អគ្គលេខាធិការរង អាជ្ញាធរទន្លេសាប និងមន្រ្តីក្រុមការងារ នៅថ្ងៃទី២២ ខែមេសា ឆ្នាំ២០២៥ បានចូលរួមកិច្ចប្រជុំក្រុមការងារពិនិត្យ ផ្ទៀងផ្ទាត់ ធ្វើបច្ចុប្បន្នភាព និងចងក្រងទិន្នន័យដីធ្លី នៃតំបន់បឹងទន្លេសាប ក្នុងភូមិសាស្រ្តខេត្តកំពង់ឆ្នាំង  ។

អង្គប្រជុំបានពិភាក្សាផ្លាស់ប្តូរយោបល់ និងផ្តល់ជាធាតុចូលលើវិធីសាស្ត្រនៃការប្រមូលទិន្នន័យ ដើម្បីធ្វើឱ្យទិន្នន័យដែលប្រមូលបាន មានសុក្រឹតភាព និងយកមកប្រើបា្រស់បាន។

 ឯកឧត្តម ប្រធានអង្គប្រជុំ បានស្នើឱ្យគ្រប់ស្រុកទាំងអស់ បូកសរុប និងបំពេញបន្ថែមនូវព័ត៌មានដែលចាំបាច់ ដោយធ្វើការពិនិត្យផ្ទៀងផ្ទាត់ ទិន្នន័យបឋម ដែលខ្វះចន្លោះ នៅតាមបណ្តាភូមិ ឃុំ ស្រុកទាំង៦ ដែលជាប់តំបន់បឹងទន្លេសាប ស្នើឱ្យស្រុករៀបចំទិន្នន័យនៃការប្រើប្រាស់ដី និងធ្វើផែនទីបង្ហាញអំពីទីតាំងនីមួយៗ និងបានស្នើឱ្យស្រុកទាំង៦ បន្តប្រមូលទិន្នន័យដោយសហការជាមួយស្ថាប័នពាក់ព័ន្ធ ដោយក្រុមការងារអន្តរក្រសួងនឹងចុះសិក្សា ពិនិត្យ និងវាយតម្លៃផ្ទាល់នៅតាមតំបន់នានានៃភូមិសាស្ត្រស្រុកទាំង៦ នៃ ខេត្តកំពង់ឆ្នាំង ដែលជាប់ពាក់ព័ន្ធតំបន់១ តំបន់២ និងតំបន់៣ ។

គោលបំណងនៃកិច្ចប្រជុំមានចំនួន៣ ចំណុច ទី១ ការធ្វើបទបង្ហាញ អំពីទិន្នន័យ ព័ត៌មានដែលប្រមូលបាន របស់បណ្តាស្រុកទាំង៦ ជាប់ពាក់ព័ន្ធនឹងតំបន់ទន្លេសាប ទី២ ការពិនិត្យមើលអំពីសក្តានុពល ការប្រកបមុខរបរ និងការប្រើប្រាស់ដីក្នុងតំបន់១ តំបន់២ និងតំបន់៣ និងទី៣ បញ្ហាប្រឈម និងសំណូមពរផ្សេងៗដែលកើតមាននៅក្នុងតំបន់នីមួយៗ ៕

ដោយ៖ ណយ នឿន (ប្រភព៖អាជ្ញាធរទន្លេសាប)