AKP ភ្នំពេញ ថ្ងៃទី២២ ខែមេសា ឆ្នាំ២០២៥-- លោកជំទាវ ឡងឌី សាន់ណារ៉ា រដ្ឋលេខាធិការក្រសួងវប្បធម៌ និងវិចិត្រសិល្បៈ ក្នុងនាមលោកជំទាវបណ្ឌិតរដ្ឋមន្ត្រី បានថ្លែងថា ការបើកច្រករបៀងវប្បធម៌ កម្ពុជា-ចិន ជាការឆ្លុះបញ្ចាំងពីចំណងមិត្តភាពដែកថែបរវាងកម្ពុជា-ចិន ហើយចំពោះការរៀបចំកម្មវិធីផ្លាស់ប្តូរវប្បធម៌ មិនត្រឹមតែជាការបង្ហាញពីលក្ខណៈពិសេសនៃវប្បធម៌ និងអរិយធម៌ប្រទេសទាំងពីរ កម្ពុជា-ចិន ដែលមានខេត្តយូណានជាតំណាង ប៉ុណ្ណោះទេ ប៉ុន្តែវាក៏ជាការឆ្លុះបញ្ចាំងពីចំណងមិត្តភាពដ៏យូរអង្វែង និងជាមិត្តភាពដែកថែបដ៏រឹងមាំរវាងប្រជាជនកម្ពុជា និងប្រជាជនចិនថែមទៀតផង។ ការលើកឡើងរបស់លោកជំទាវរដ្ឋលេខាធិការដូចនេះបានធ្វើឡើងក្នុងពិធីនៃការបើកឱ្យដំណើរការកម្មវិធីច្រករបៀងវប្បធម៌ កម្ពុជា-ចិន នៅរាជធានីភ្នំពេញ ក្រោមប្រធានបទ “ការផ្លាស់ប្តូរវប្បធម៌កម្ពុជា-ចិន” នាថ្ងៃទី២២ ខែមេសា ឆ្នាំ២០២៥ នៅផ្សារទំនើបជីបម៉ុង ផ្លូវ ២៧១។

លោកជំទាវរដ្ឋលេខាធិការបានគូសបញ្ជាក់ថា ទំនាក់ទំនងមិត្តភាពរវាងកម្ពុជា-ចិនមានជាច្រើនសតវត្សរ៍មកហើយ តាមរយៈការធ្វើពាណិជ្ជកម្ម ការធ្វើចំណាកស្រុក និងការផ្លាស់ប្តូរវប្បធម៌ ហើយទំនាក់ទំនងនេះមានការរីកចម្រើនរហូតដល់បច្ចុប្បន្ន ជាពិសេសជាមួយនឹងគំនិតផ្តួចផ្តើមខ្សែក្រវ៉ាត់ និងផ្លូវរបស់មហាមិត្តចិន។ លោកជំទាវបានបន្តថា សព្វថ្ងៃនេះកិច្ចសហប្រតិបត្តិការនៃប្រទេសទាំងពីរ រួមមាន ការអប់រំ ទេសចរណ៍ ការផ្លាស់ប្តូរវប្បធម៌ និងកិច្ចសហប្រតិបត្តិការសហគមន៍ ការកសាងមិត្តភាពយូរអង្វែងទាំងនេះ គឺជាស្ពានបង្រួបបង្រួមនៃមិត្តភាពរបស់យើងឱ្យកាន់តែជិតស្និទ្ធ ហើយនឹងលេចចេញជារូបរាង តាមរយៈការចែករំលែកចំណេះដឹង បទពិសោធន៍ ការច្នៃប្រឌិត និងបេតិកភណ្ឌវប្បធម៌។ ដោយឡែកតាមរយៈសិល្បៈយើងឃើញពីទំនាក់ទំនងជាប្រវត្តិសាស្ត្ររវាងប្រជាជាតិទាំងពីរ និងការផ្តល់តម្លៃឲ្យគ្នាពីមួយជំនាន់ទៅមួយជំនាន់ ហើយតាមរយៈការអញ្ជើញធ្វើទស្សនកិច្ចលើកទី១មកកម្ពុជារបស់ថ្នាក់ដឹកនាំចិនកាលពីឆ្នាំ២០១៦ និងថ្មីៗនេះការអញ្ជើញទស្សនកិច្ចជាផ្លូវរដ្ឋរបស់ឯកឧត្តមប្រធានាធិបតី ស៊ី ជីនពីង គឺជាសក្ខីភាពមួយ និងជាប្រវត្តិសាស្ត្រនៃចំណងសាមគ្គីភាព និងមិត្តភាពដ៏រឹងមាំរវាងកម្ពុជា និងចិន។ 

នាឱកាសនេះ ឯកឧត្តម និន ឆុង អគ្គទីប្រឹក្សាស្ថានទូតសាធារណរដ្ឋប្រជាមានិតចិនប្រចាំកម្ពុជា បានមានប្រសាសន៍ថា “ច្រករបៀងវប្បធម៌ កម្ពុជា-ចិន គឺជាគម្រោងម៉ាកយីហោដ៏ល្បីល្បាញសម្រាប់ការផ្លាស់ប្តូរប្រជាជន និងប្រជាជន ចិន-កម្ពុជា ដែលរៀបចំបង្កើតដោយមជ្ឈមណ្ឌលផ្សព្វផ្សាយអន្តរជាតិ ចំពោះតំបន់អាស៊ីខាងត្បូង និងអាស៊ីអាគ្នេយ៍ជាមួយខេត្តយូណាន។ គម្រោងនេះត្រូវបានប្រារព្ធដោយជោគជ័យនៅក្នុងខេត្តសៀមរាបនាឆ្នាំ២០២៤ ហើយក៏ជាសមិទ្ធផលដ៏សំខាន់គួរឱ្យកត់សម្គាល់នៃកម្មវិធី ឆ្នាំនៃការផ្លាស់ប្តូរប្រជាជន និងប្រជាជន ចិន-កម្ពុជា ឆ្នាំ២០២៥។

ទន្ទឹមនឹងនេះ ឯកឧត្តមបានបញ្ជាក់ថា ថ្ងៃនេះច្រករបៀងវប្បធម៌ កម្ពុជា-ចិន បានចូលមកដល់រាជធានីភ្នំពេញ ដោយផ្តល់ជូនមិត្តកម្ពុជានូវបទពិសោធន៍នៃវប្បធម៌ដ៏សម្បូរបែប និងបង្កើតជាវេទិកាដ៏មានសារប្រយោជន៍សម្រាប់ប្រជាជនទាំងពីរឱ្យស្គាល់គ្នា រាប់អានគ្នា និងរឹតចំណងសាមគ្គីភាព និងមិត្តភាពដ៏រឹងមាំរវាងកម្ពុជា-ចិន បន្តជាអមតៈ៕

ដោយ៖ ចាន់ សុភឿន