AKP ព្រះវិហារ ថ្ងៃទី០៩ ខែមេសា ឆ្នាំ២០២៥

ពិធីបុណ្យដឹងគុណប្រាសាទបុរាណខ្មែរ និងរាប់បាត្រព្រះសង្ឃ ១០៨អង្គ ប្រារព្ធធ្វើឡើងនៅបរិវេណប្រាសាទកោះកេរ ដោយមានកាអញ្ជើញចូលរួមពីសំណាក់ ឯកឧត្ដម គីម រិទ្ធី អភិបាល នៃគណៈអភិបាលខេត្តព្រះវិហារ ព្រមទាំងថ្នាក់ដឹកនាំមន្ទីរអង្គភាពនានា មេបញ្ជាការកងកម្លាំងទាំងបីប្រភេទ ពុទ្ធបរិស័ទជិតឆ្ងាយ លោកយាយ លោកតា និងបងប្អូនប្រជាពលរដ្ឋជាច្រើនរូបទៀត។

ពិធីនេះធ្វើឡើងនាព្រឹកថ្ងៃទី០៩ ខែមេសា ឆ្នាំ២០២៥ ក្នុងគោលបំណង ដើម្បីសម្តែងនូវការដឹងគុណចំពោះប្រាសាទបុរាណដ៏ពិសិដ្ឋ ដែលជាកេរដំណែលវប្បធម៌ដ៏ថ្លៃថ្លារបស់ជាតិ និងដើម្បីឧទ្ទិសកុសលតាមរយៈការរាប់បាត្រព្រះសង្ឃចំនួន ១០៨ អង្គ។

សូមជម្រាបជូនថា ក្នុងពិធីបុណ្យនេះ ក៏មានពុទ្ធបរិស័ទយ៉ាងច្រើនកុះករបានអញ្ជើញមកចូលរួម ដោយនាំមកនូវចង្ហាន់ ទេយ្យទាន និងបច្ច័យផ្សេងៗ ដើម្បីប្រគេនដល់ព្រះសង្ឃ រួមនឹងពិធីរាប់បាត្រព្រះសង្ឃរហូតដល់ ១០៨អង្គ ដែលបានបង្ហាញយ៉ាងច្បាស់នូវសទ្ធាជ្រះថ្លា និងកម្លាំងសាមគ្គីដ៏រឹងមាំរបស់ប្រជាជនខ្មែរចំពោះព្រះពុទ្ធសាសនា៕

ដោយ៖ រិទ្ធី ប្រភព៖ មន្ទីរព័ត៌មានខេត្ដព្រះវិហារ