AKP កំពង់ធំ ថ្ងៃទី០៩ ខែមេសា ឆ្នាំ២០២៥-- 

លោក វង់ ឡូ ប្រធានមន្ទីរធនធានទឹក និងឧតុនិយមខេត្តកំពង់ធំ តំណាងឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមការងារចុះមូលដ្ឋានស្រុកស្ទោង និងលោក សាយ គឹមឡម អភិបាលស្រុកស្ទោង នាព្រឹកថ្ងៃទី០៩ ខែមេសា ឆ្នាំ២០២៥ បានអញ្ជើញប្រគល់ម៉ូតូចំនួន១៣គ្រឿងជូនដល់ឃុំទាំង១៣ក្នុងស្រុកស្ទោង ខេត្តកំពង់ធំ សម្រាប់ចាប់រង្វាន់អបអរសាទរសង្ក្រាន្តឆ្នាំថ្មី ឆ្នាំម្សាញ់ដែលនឹងប្រព្រឹត្តទៅនៅថ្ងៃទី១៤-១៦ ខែមេសា ខាងមុខនេះ។

ក្នុងឱកាសនោះ លោក វង់ ឡូ បានណែនាំដល់អាជ្ញាធរពាក់ព័ន្ធជាពិសេសតាមបណ្ដាវត្តអារាមត្រូវបង្កលក្ខណៈឱ្យបងប្អូនប្រជាពលរដ្ឋកម្សាន្តសប្បាយរីករាយ និងរក្សាសន្តិសុខសណ្ដាប់ធ្នាប់ឱ្យបានសុវត្ថិភាពខ្ពស់នៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។

ទាំងនេះសបញ្ជាក់ឱ្យឃើញពីការយកចិត្តទុកដាក់ខ្ពស់របស់ឯកឧត្តមប្រធានក្រុមការងារ ក្នុងការបង្កលក្ខណៈកម្សាន្តសប្បាយអបអរសាទរសង្ក្រាន្តឆ្នាំថ្មីជូនពុកម៉ែបងប្អូនប្រជាពលរដ្ឋក្នុងមូលដ្ឋានជាពិសេសបានកម្សាន្តសប្បាយរួមគ្នារវាងប្រជាពលរដ្ឋនិងក្រុមការងារយ៉ាងសប្បាយរីករាយនិងស្និទ្ធស្នាលបំផុត ក្រោមម្លប់សុខសិន្តិភាព និងការអភិវឌ្ឍប្រទេសជាតិក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

សូមបញ្ជាក់ថា ឃុំទាំង១៣ក្នុងស្រុកស្ទោងគឺក្នុង១ឃុំ ក្រុមការងារបានរៀបចំវត្តមួយសម្រាប់ធ្វើសង្ក្រាន្តឆ្នាំថ្មីឆ្នាំនេះដែលក្នុងនោះទទួលបានម៉ូតូ១គ្រឿង និងសម្ភារឧបករណ៍ផ្សេងៗជាច្រើនទៀតសម្រាប់ចាប់រង្វាន់ដែលបង្កលក្ខណៈឱ្យការកម្សាន្តសប្បាយសង្ក្រាន្តឆ្នាំថ្មីកាន់តែអធិកអធមថែមទៀត៕

ដោយ ស៊ុម វណ្ណា