AKP ភ្នំពេញ ថ្ងៃទី២៩ ខែមេសា ឆ្នាំ២០២៦ -- នៅក្នុងការជជែកពិភាក្សារបស់ក្រុមប្រឹក្សាសន្តិសុខអង្គការសហប្រជាជាតិ ឯកអគ្គរដ្ឋទូតចិន លោក ហ្វូ កុង (Fu Cong) បានព្រមានថា មជ្ឈិមបូព៌ាកំពុងស្ថិតនៅចំណុចអន្តរកាលដ៏សំខាន់រវាងសង្គ្រាម និងសន្តិភាព។ លោកបានគូសបញ្ជាក់ថា អំពើហិង្សាដែលកំពុងកើនឡើងនៅតំបន់ហ្គាហ្សា និងប្រទេសលីបង់ មិនត្រឹមតែធ្វើឱ្យសន្តិសុខក្នុងតំបន់មានអស្ថិរភាពប៉ុណ្ណោះទេ ថែមទាំងបង្កការគំរាមកំហែងយ៉ាងធ្ងន់ធ្ងរដល់សេដ្ឋកិច្ចពិភពលោកទៀតផង។ ជាពិសេស លោកបានកត់សម្គាល់ពីការព្រមានរបស់ធនាគារពិភពលោកថា ជម្លោះដែលបន្តអាចបង្កឱ្យមានការកើនឡើង ២៤% នៃតម្លៃថាមពលនៅឆ្នាំ២០២៦។

លោក ហ្វូ កុង បានសង្កត់ធ្ងន់ថា វិបត្តិមនុស្សធម៌នៅតំបន់ហ្គាហ្សានៅតែធ្ងន់ធ្ងរ ដោយជនស៊ីវិលប្រឈមមុខនឹងទុក្ខវេទនាឥតឈប់ឈរ និងប្រព័ន្ធវេជ្ជសាស្ត្រដែលជិតដួលរលំ។ លោកបានអំពាវនាវឱ្យមានបទឈប់បាញ់ជាបន្ទាន់ និងមានសុពលភាពបានយូរ ព្រមទាំងបានជំរុញឱ្យអ៊ីស្រាអែលដកចេញនូវការរារាំងចំពោះជំនួយមនុស្សធម៌ និងបញ្ឈប់ការពង្រីកការតាំងទីលំនៅខុសច្បាប់។ ប្រទេសចិនបានអះអាងថា បញ្ហាប៉ាឡេស្ទីនមិនអាចមើលស្រាលបានទេ ហើយបានបន្ថែមថា អស្ថិរភាពបច្ចុប្បន្នកើតចេញពីលក្ខណៈពាក់កណ្តាលសម្រេចនៃដំណោះស្រាយរដ្ឋពីរ។

ដើម្បីសម្រេចបាននូវស្ថិរភាពយូរអង្វែង ប្រទេសចិនបានតស៊ូមតិសម្រាប់ការបង្កើតរដ្ឋប៉ាឡេស្ទីនដែលមានអធិបតេយ្យភាពពេញលេញដោយផ្អែកលើព្រំដែនឆ្នាំ១៩៦៧ ដែលមានក្រុងយេរូសាឡឹមខាងកើតជារដ្ឋធានីរបស់ខ្លួន។ លោក ហ្វូ​ កុង បានពិពណ៌នាអំពីដំណោះស្រាយរដ្ឋពីរជាផ្លូវតែមួយគត់ដែលអាចអនុវត្តទៅមុខបាន។ លោកបានជំរុញឱ្យគ្រប់ភាគីទាំងអស់អនុវត្តការអត់ធ្មត់អតិបរមា និងចាប់យកឱកាសនៃសន្តិភាពបច្ចុប្បន្នដើម្បីស្វែងរកដំណោះស្រាយនយោបាយ មុនពេលសន្ទុះសម្រាប់កិច្ចចរចាបាត់បង់ទាំងស្រុង៕

ដោយ៖ យា ចិន្ដាខន្ដី (ប្រភព៖ ឆាយណាដេលី)