AKP ភ្នំពេញ ថ្ងៃទី០៩ ខែមេសា ឆ្នាំ២០២៥--

ក្នុងឱកាសនៃការជួបពិភាក្សាការងារជាមួយលោក JULIAN NII ADJETEY OTINKORANG មន្ត្រីអង្គការសហប្រជាជាតិផ្នែកកម្មវិធីភាពជាដៃគូត្រីភាគី (UNTPP) ទទួលបន្ទុកផ្នែកភស្ដុភារ (Logistics) នាព្រឹកថ្ងៃទី០៩ ខែមេសា ឆ្នាំ២០២៥ ឯកឧត្តម ឧត្តមសេនីយ៍ទោ សែម រតនា អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានថ្លែងអំណរគុណយ៉ាងជ្រាលជ្រៅចំពោះការខិតខំប្រឹងប្រែងរបស់លោកក្នុងការបន្តកិច្ចសហប្រតិបត្តិការដ៏ស្អិតល្មួតក្នុងរយៈពេលកន្លងមក ក៏ដូចជាការអញ្ជើញមកសម្របសម្រួល និងត្រួតពិនិត្យការងារត្រៀមរៀបចំវគ្គហ្វឹកហ្វឺនគម្រោងត្រីភាគី (UNTPP) ឆ្នាំ២០២៥ របស់លោកនាពេលនេះ។

ឯកឧត្តម ឧត្តមសេនីយ៍ទោ សែម រតនា បានចាត់ទុកការងារវគ្គហ្វឹកហ្វឺនគម្រោងត្រីភាគី (UNTPP) ដែលជាគំនិតផ្តួចផ្តើមរបស់ឯកឧត្តម ស៊ីនហ្សូ អាបេ អតីតនាយករដ្ឋមន្ត្រីនៃប្រទេសជប៉ុន នាខែកញ្ញា ឆ្នាំ២០១៤ ថាមានសារៈសំខាន់ជាខ្លាំង ដោយក្នុងនោះកម្ពុជាបានចាប់ផ្តើមចូលរួមដំបូងនាឆ្នាំ២០១៨ មានសិក្ខាកាមរបស់ខ្លួនសរុបចំនួន៨៤នាក់ ក្នុងនោះនារី៦នាក់ បានចូលរួមក្នុងវគ្គហ្វឹកហ្វឺនសរុបចំនួន១៦វគ្គ។ ដោយឡែក ឆ្នាំ២០២៤ កម្ពុជាទទួលធ្វើជាម្ចាស់ផ្ទះប្តូរវេនសម្រាប់វគ្គហ្វឹកហ្វឺនដល់កងកម្លាំងបន្តពីប្រទេសឥណ្ឌូនេស៊ី រហូតដល់ឆ្នាំ២០២៦ ដែលជាការហ្វឹកហ្វឺនបែបពហុសសរស្ដម្ភ (Cross-Pillar) និងជាកិច្ចសហប្រតិបត្តិការរវាងប្រទេសចំនួន៤ជាលើកដំបូង រួមមាន កម្ពុជា កូរ៉េ ជប៉ុន និងអូស្ត្រាលី។

ឯកឧត្តម ឧត្តមសេនីយ៍ទោ អនុប្រធានទី១គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព បានជម្រាបជូនលោក JULIAN NII ADJETEY OTINKORANG ផងដែរថា យោងតាមកិច្ចប្រជុំស្តីពីវគ្គហ្វឹកហ្វឺនគម្រោងត្រីភាគី (UNTPP) ឆ្នាំ២០២៥ យើងនឹងមានកម្មវិធីមួយចំនួន រួមមាន ការត្រៀមរៀបចំហ្វឹកហ្វឺនគម្រោងត្រីភាគី UNTPP ដែលនឹងប្រព្រឹត្តទៅចាប់ពីថ្ងៃទី២១ ខែមេសា ដល់ថ្ងៃទី២០ ខែមិថុនា ឆ្នាំ២០២៥ ក្នុងនោះមានវគ្គហ្វឹកហ្វឺនគ្រឿងចក្រធុនធ្ងន់កម្រិតមូលដ្ឋាន និងការយល់ដឹងអំពីគ្រឿងផ្ទុះកែច្នៃ និងគម្រោងតម្រូវការគ្រឿងចក្រសម្រាប់ហ្វឹកហ្វឺនវគ្គ HEE & EHAT ជាដើម។

ជាការឆ្លើយតប លោក JULIAN NII ADJETEY OTINKORANG មន្ត្រីអង្គការសហប្រជាជាតិផ្នែកកម្មវិធីភាពជាដៃគូត្រីភាគី (UNTPP) ទទួលបន្ទុកផ្នែកភស្ដុភារ (Logistics) បានវាយតម្លៃខ្ពស់ចំពោះកិច្ចខិតខំប្រឹងប្រែងពីគ្រប់ភាគីពាក់ព័ន្ធ ដែលធ្វើឱ្យគម្រោងការនៃវគ្គហ្វឹកហ្វឺនគម្រោងត្រីភាគី (UNTPP) ទទួលបានជោគជ័យនាពេលកន្លងមក ក៏ដូចជាទៅថ្ងៃអនាគត ជាពិសេសក្នុងពេលដែលកម្ពុជាធ្វើជាម្ចាស់ផ្ទះប្តូរវេនសម្រាប់វគ្គហ្វឹកហ្វឺនដល់កងកម្លាំងបន្តពីប្រទេសឥណ្ឌូនេស៊ីពីឆ្នាំ២០២៤ ដល់ឆ្នាំ២០២៦ខាងមុខ៕

ដោយ៖ ចាន់ សុភឿន