AKP ភ្នំពេញ ថ្ងៃទី០៧ ខែមេសា ឆ្នាំ២០២៥ -- សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជាបានអំពាវនាវដល់បងប្អូនប្រជាពលរដ្ឋខ្មែរ សូមអញ្ជើញទៅពិនិត្យបញ្ជីឈ្មោះ និងចុះឈ្មោះបោះឆ្នោតឱ្យបានគ្រប់ៗគ្នា និងទាន់ពេលកំណត់ ព្រមទាំងអនុវត្ដន៍សិទ្ធិ កាតព្វកិច្ចជាពលរដ្ឋតាមរដ្ឋធម្មនុញ្ញនៃព្រះរាជាណាចក្រកម្ពុជា។ ការអំពាវនាវរបស់សម្ដេចធិបតីនាយករដ្ឋមន្រ្ដីបែបនេះ ក្នុងឱកាសអញ្ជើញជាអធិបតី ពិធីសម្ពោធដាក់ឱ្យប្រើប្រាស់ជាផ្លូវការស្ពានអាកាសមរតកតេជោ ដែលមានទីតាំងស្ថិតនៅចំណុចប្រសព្វ រវាងមហាវិថីសម្តេចតេជោ ហ៊ុន សែន, មហាវិថីកងយោធពលខេមរភូមិន្ទ និងមហាវិថីព្រះមុនីវង្ស ស្ថិតក្នុងមូលដ្ឋានខណ្ឌមានជ័យ និងខណ្ឌចំការមន រាជធានីភ្នំពេញ នាថ្ងៃទី០៧ ខែមេសា ឆ្នាំ២០២៥។

សម្ដេចធិបតី ហ៊ុន ម៉ាណែត បានថ្លែងបញ្ជាក់ថា ការផ្លាស់ប្ដូររដ្ឋាភិបាលក្នុងរបបប្រជាធិបតេយ្យមានតែ៣នោះទេ ទី១ ការធ្វើរដ្ឋប្រហារ ទី២ ការប្រមូលប្រជាជនមកធ្វើបដិវត្ដន៍ពណ៌ ដើម្បីផ្ដួលរដ្ឋាភិបាល ទី៣ លទ្ធិប្រជាធិបតេយ្យ គឺការបោះឆ្នោត។ សម្ដេចធិបតីនាយករដ្ឋមន្រ្ដីបានលើកឡើងថា៖ «អីចឹងការផ្លាស់ប្ដូរ ការជ្រើសរើសមេដឹកនាំគឺត្រូវធ្វើតាមការបោះឆ្នោតដែលតំណាងឱ្យប្រជាពលរដ្ឋទូទាំងប្រទេសពេលនោះគឺជាការស្ទង់មតិធំបំផុត ៥ឆ្នាំម្ដង ដែលប្រជាជនមានសិទ្ធិ ទៅបោះឆ្នោត។ នេះគឺជាការស្ទង់មតិពិតប្រាកដ មិនមែនស្ទង់មតិតាមហ្វេសប៊ុក ប្រមូលគ្នា១ម៉ឺននាក់ ២ពាន់នាក់មកធ្វើបាតុកម្ម ដើម្បីផ្ដួលរដ្ឋាភិបាលបង្កើតជាបញ្ហានោះទេ»។ សម្ដេចធិបតីនាយករដ្ឋមន្រ្ដីគូសបញ្ជាក់ផងដែរថា ប្រជាពលរដ្ឋយើងត្រូវអនុវត្ដន៍សិទ្ធិតាមលទ្ធិប្រជាធិបតេយ្យ ដើម្បីជ្រើសរើសមេដឹកនាំតាមគោលការប្រជាធិបតេយ្យដោយរក្សាបាននូវស្ថិរភាព និងសន្ដិភាព នៅក្នុងប្រទេសរបស់ខ្លួន។

ក្នុងឱកាសនោះដែរ សម្ដេចធិបតី ហ៊ុន ម៉ាណែត ក៏បានអះអាងផងដែរថា មានតែការបោះឆ្នោតទៅតាមគោលការណ៍លទ្ធិប្រជាធិបតេយ្យអនុលោមតាមរដ្ឋធម្មនុញ្ញទេ ដែលត្រឹមត្រូវ និងអាចធានាបាននូវចីរភាព និរន្ដរភាព និងសន្ដិភាពក្នុងប្រទេសរបស់យើង ដែលយើងអាចបន្ដដំណើរទៅមុខទៀត រួមគ្នា ដើម្បីកុំឱ្យវិលត្រឡប់ និងមានការបែកបាក់ឯកភាពជាតិនេះ។

យោងតាមប្រតិទិនរបស់គណៈកម្មាធិការជាតិរៀបចំការបោះឆ្នោត(គ.ជ.ប)បានឱ្យដឹងថា ប្រជាពលរដ្ឋដែលបានចុះឈ្មោះបោះឆ្នោតរួចហើយទៅពិនិត្យផ្ទៀងផ្ទាត់ឈ្មោះ និងទិន្នន័យរបស់ខ្លួនក្នុងបញ្ជីបោះឆ្នោតចុងក្រោយឆ្នាំ២០២៤ ដែលមានបិទផ្សាយនៅតាមសាលាឃុំ សង្កាត់ ចាប់ពីថ្ងៃទី២០ ខែមេសា ឆ្នាំ២០២៥ ខាងមុខ។ សម្រាប់ការពិនិត្យបញ្ជីឈ្មោះ និងចុះឈ្មោះបោះឆ្នោត ចាប់ពីថ្ងៃទី០១ ដល់ថ្ងៃទី២៦ ខែឧសភា ឆ្នាំ២០២៥៕ ដោយ៖ រិទ្ធី