AKP ភ្នំពេញ ថ្ងៃទី០៧ ខែមេសា ឆ្នាំ២០២៥ -- ក្រោមកិច្ចសហការជាមួយសមាគមអ្នកសារព័ត៌មានកម្ពុជា-ចិន សមាគមយុវជនឌីជីថលកម្ពុជា-ចិន ស្ទូឌីយោវប្បធម៌ចិន Jun Guzheng និងសាលាមធ្យមវិចិត្រសិល្បៈ ទើបការិយាល័យមូលនិធិចិនដើម្បីសន្តិភាពនិងការអភិវឌ្ឍបានរៀបចំព្រឹត្តិការណ៍ផ្លាស់ប្តូរវប្បធម៌ ភ្លេងបុរាណកម្ពុជា-ចិន «ចិត្តនិងចិត្តភ្ជាប់គ្នាតាមផ្លូវសូត្រ» នារសៀលថ្ងៃទី០៦ ខែមេសា ឆ្នាំ២០២៥ នៅជាន់ទី៤៧ នៃអគារ Morgan ស្ថិតក្នុងបរិវេណកោះពេជ្រ រាជធានីភ្នំពេញ។

ក្នុងឱកាសអបអរសាទរសង្ក្រាន្តឆ្នាំម៉្សាញ់ នៃពិធីបុណ្យចូលឆ្នាំថ្មីប្រពៃណីជនជាតិខ្មែរ ព្រឹត្តិការណ៍នេះបាននាំយកនូវទស្សនីយភាព មហោស្រពតន្ត្រីឆ្លងព្រំដែន ដោយបានទាក់ទាញទស្សនិកជនប្រមាណ៥០០នាក់ចូលរួម ហើយព្រឹត្តិការណ៍នេះបានបង្ហាញពីភាពទាក់ទាញដ៏ជ្រាលជ្រៅនៃវប្បធម៌តន្ត្រីប្រពៃណីរបស់ប្រទេសទាំងពីរទៅកាន់ពិភពលោកតាមរយៈប្រព័ន្ធសារព័ត៌មាន និងវេទិកាផ្សព្វផ្សាយសង្គមរបស់ប្រទេសយើងទាំងពីរ ដើម្បីបន្ថែមភាពរឹងមាំដល់ការលើកកម្ពស់នៃការផ្លាស់ប្តូរវប្បធម៌រវាងកម្ពុជា និងចិន។

ការប្រគុំតន្ត្រីក្រោមប្រធានបទ «ភ្លេងខ្មែរបុរាណ សំឡេងថ្មី វិថីសូត្រ» បាននាំមកនូវមរតកសិល្បៈតន្ត្រីប្រពៃណីមកពីប្រទេសទាំងពីរ។ សិស្សតូរ្យតន្ត្រីនៃសាលាមធ្យមវិចិត្រសិល្បៈកម្ពុជាបានប្រគុំតន្ត្រី បុរាណដូចជាបទ «ខ្មែរតែងខ្លួន» «ដំណើរចិន» «ព្រះទីនាំង» និង «ហោមរោង» ជាមួយនឹងឧបករណ៍ដូចជាពិណ រនាថ ស្គរ និង ខ្លុយខ្មែរជាដើម ដោយបានប្រគុំរម្លឹកឡើងវិញនូវប្រវត្តិសាស្ត្រដ៏យូរលង់នៃអរិយធម៌ខ្មែរ។

ដោយឡែកនិស្សិតចិនបានប្រើប្រាស់ឧបករណ៍បុរាណចិនដូចជា ពិណ រនាថ និង ខ្លុយជាដើម ដើម្បីបង្ហាញពីភាពរស់រវើកនៃតន្ត្រីចិនជាមួយនឹងបំណែកល្បីៗដូចជា«ឆ្នេរសៀងហៃ» «ចម្រៀងនៅពេលល្ងាចពីនាវានេសាទ» និង «បម្រែបម្រួលទាំងបីរបស់ផ្កាម៉ីហ័រ» ជាដើម។

ព្រឹត្តិការណ៍នេះ បានឈានដល់ភាពកាន់តែជក់ចិត្តក្នុងពេលដែលតន្ត្រីករនៃប្រទេសយើងទាំងពីរបានប្រគុំរួមគ្នាដោយប្រើប្រាស់ឧបករណ៍តន្រ្តីបុរាណខ្មែរ និងចិន ក្រោមទំនុកបទភ្លេងដែលមានចំណងជើងថា «តន្ត្រីពីវិមានពពក» ហើយបទភ្លេងនេះទទួលបានការទះដៃយ៉ាងយូរប្រកបដោយភាពរំភើបក្រៃលែងពីទស្សនិកជនទាំងអស់។

ជាមួយគ្នានេះ លោក សយ សុភាព ប្រធានសមាគមអ្នកសារព័ត៌មានកម្ពុជា-ចិន បានមានប្រសាសន៍ថា ការប្រគុំតន្ត្រីនេះអនុញ្ញាតឱ្យយើងស្តាប់នូវភាពរស់រវើកនៃសិល្បៈប្រពៃណី ហើយព្រឹត្តិការណ៍នេះមិនត្រឹមតែជាការផ្លាស់ប្តូរវប្បធម៌ដ៏អស្ចារ្យប៉ុណ្ណោះទេ ថែមទាំងជាសាក្សីដ៏សំខាន់មួយទៀតនៃទំនាក់ទំនងមិត្តភាព និងកិច្ចសហប្រតិបត្តិការរវាងយើងទាំងពីរ កម្ពុជានិងចិន។ លោកប្រធានសមាគមក៏បានរំពឹងថា មនុស្សកាន់តែច្រើននឹងយកចិត្តទុកដាក់ និងស្រឡាញ់តន្ត្រីប្រពៃណី ហើយយុវជនកាន់តែច្រើននឹងបន្តភាពរួមចំណែកកាន់តែខ្លាំងក្នុងបុព្វហេតុនៃមរតកវប្បធម៌ និងនវានុវត្តនៃសិល្បៈតន្ត្រី។

សូមជម្រាបជូនផងដែរថា ភាពជោគជ័យនៃការប្រគុំតន្ត្រីនេះគឺទទួលបាននូវការគាំទ្រយ៉ាងពេញទំហឹងពីបុគ្គល សហគ្រាស និងសង្គមស៊ីវិលនានានៃប្រទេសយើងទាំងពីរ កម្ពុជានិងចិន។ ព្រឹត្តិការណ៍នេះ ក៏មានការអញ្ជើញផ្តល់កិត្តិយសពីឯកឧត្តម លឹម ឡោកពិសិដ្ឋ រដ្ឋលេខាធិការក្រសួងពាណិជ្ជកម្ម, ឯកឧត្តម ធៀង វណ្ណដារ៉ុង អនុរដ្ឋលេខាធិការក្រសួងវប្បធម៌និងវិចិត្រសិល្បៈ, អ្នកឧកញ៉ា សំ អាង ប្រធានក្រុមប្រឹក្សាភិបាលធនាគារ វឌ្ឍនៈ និងអ្នកតំណាងមកពីវេទិកាសម្ព័ន្ធសង្គមស៊ីវិល សមាគមអ្នកសារព័ត៌មានកម្ពុជា-ចិន ផ្សារមូលបត្រកម្ពុជា មូលនិធិចិនដើម្បីសន្តិភាពនិងការអភិវឌ្ឍ ក្រុមហ៊ុន Huawei ក្រុមហ៊ុន wownow ក្រុមហ៊ុន U-Mall ក្រុមហ៊ុនគ្រឿងអលង្ការ Luk Fook ក្រុមហ៊ុនអាកាសចរណ៍ Cambodia Airlines និងសង្គមស៊ីវិលនានា ជាច្រើនទៀត៕

ដោយ៖ រិទ្ធី