AKP សៀមរាប ថ្ងៃទី០៧ ខែមេសា ឆ្នាំ២០២៥-- កាន់តែកៀកជិតដល់ថ្ងៃនៃការរៀបចំព្រឹត្តិការណ៍អង្គរសង្ក្រាន្តឆ្នាំ២០២៥ អបអរសាទពិធីបុណ្យចូលឆ្នាំប្រពៃណីជាតិខ្មែរនាពេលខាងមុខនេះ គេឃើញថាសំណង់ និងការតុបតែងផ្សេងៗនៃព្រឹត្តិការណ៍អង្គរសង្ក្រាន្ត នៅបរិវេណមុខប្រាសាទអង្គរវត្តបានចាប់ផ្តើមបង្ហាញសម្រស់ និងមានភាពទាក់ទាញ ដោយភ្ញៀវទេសចរជាតិ និងអន្តរជាតិ ដែលបានទៅទស្សនាប្រាសាទអង្គរវត្ត បានផ្តិតយករូបភាព នៃការរៀបចំនេះដោយក្តីសប្បាយរីករាយ។

នៅទីតាំងបរិវេណមុខប្រាសាទអង្គរវត្តនេះ មានកម្មវិធីសំខាន់ៗដូចជា កម្មវិធីភូមិខ្ញុំ កម្មវិធីភូមិត្នោត កម្មវិធីភូមិរចនា កម្មវិធីតស់ៗលេងទឹក កម្មវិធីសួនញញឹមអង្គរ និងពិព័រណ៍ខ្លែង រួមជាមួយកម្មវិធីផ្សេងៗជាច្រើនទៀត។ហើយការរៀបចំនៅក្នុងកម្មវិធីនីមួយៗ ឃើញថា ស្ទើរតែរួចរាល់អស់ទៅហើយ។

ឯកឧត្តម សុខ សង្វា ប្រធានក្រុមការងារភូមិខ្ញុំនៃព្រឹត្តិការណ៍អង្គរសង្ក្រាន្ត បានឱ្យដឹងថា សំណង់ និងការតុបតែងនៅកម្មវិធីភូមិខ្ញុំ គិតត្រឹមថ្ងៃទី០៦ ខែមេសា ឆ្នាំ២០២៥ គឺសម្រេចបាន ៩០%ហើយ ដោយឯកឧត្តមបានបន្តថា នៅក្នុងកម្មវិធីភូមិខ្ញុំតែងតែបានគិតគូររៀបចំធ្វើយ៉ាងម៉េចឱ្យមានភាពទាក់ទាញ ជាពិសេសពាក់ព័ន្ធវប្បធម៌ប្រពៃណីជាតិខ្មែរ ល្បែងប្រជាប្រិយ ដែលឆ្នាំនេះ មានក្រុមការងាររហូតដល់ទៅ១៥០នាក់ មានន័យថា ល្បែងប្រជាប្រិយដែលនឹងលេងនៅក្នុងភូមិខ្ញុំមានការកើនឡើងជាងឆ្នាំមុនៗទៅទៀត។ ជាមួយគ្នានេះ ក៏មានកម្មវិធីផ្សេងៗជាច្រើន ដោយសូមបងប្អូនអញ្ជើញមកទស្សនាទាំងអស់គ្នានៅថ្ងៃអង្គរសង្ក្រាន្តខាងមុខនេះ។

ដោយឡែកនៅក្នុងកម្មវិធីសួនញញឹមអង្គរឯនេះវិញ ក៏ឃើញកំពុងតែបង្ហាញសម្រសដ៏ទាក់ទាញ ដោយមានភ្ញៀវទេសចរ និងបងប្អូនប្រជាពលរដ្ឋនៅក្នុងខេត្តសៀមរាប បាននាំគ្នាទៅទស្សនា និងផ្តិតរូបទាំងយប់ និងថ្ងៃ ដោយបង្ហាញទឹកមុខរីករាយ សើចសប្បាយក្អក់ក្អាយជាមួយ និងក្រុមគ្រួសារ ក្រោមម្លប់សន្តិភាព៕

ដោយ ឃុត សៅ