AKP ភ្នំពេញ ថ្ងៃទី០៤ ខែមេសា ឆ្នាំ២០២៥--បន្ទាប់ពីមានការដំឡើងអត្រាពន្ធគយ របស់រដ្ឋបាលប្រធានាធិបតីសហរដ្ឋអាមេរិក ដូណាល់ ត្រាំ មក លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្មកម្ពុជាក៏បានធ្វើការពន្យល់ពាក់ព័ន្ធនឹងការដំឡើងពន្ធគយនេះដោយបញ្ជាក់ថា ការកំណត់ដំឡើងពន្ធរបស់រដ្ឋបាលអាម៉េរិកជាធម្មតាការដំឡើងពន្ធ ធ្វើឱ្យទំនិញឡើងថ្លៃ ដូច្នេះអ្នកប៉ះពាល់ គឺអ្នកបញ្ជាទិញ ដែលជាប្រជាជនអាម៉េរិករងប៉ះពាល់ដំបូងគេ បន្ទាប់មកលើកម្ពុជា និងអ្នកវិនិយោគលើវិស័យសំខាន់ៗ ដូចជា៖ វាយណភណ្ឌ និងសម្លៀកបំពាក់ ជាដើម។ 

ថ្លែងក្នុងកិច្ចសម្ភាសន៍ពិសេសជាមួយ ទូរទស្សន៍ជាតិកម្ពុជា ស្ដីពីការដំឡើងពន្ធគយ របស់សហរដ្ឋអាម៉េរិក លើទំនិញនាំចូលពីកម្ពុជា នៅថ្ងៃទី០៣ ខែមេសា ឆ្នាំ២០២៥ លោកជំទាវ ចម និម្មល បានគូសបញ្ជាក់ថា ច្បាស់ណាស់ការដំឡើង ពន្ធ៤៩% របស់អាម៉េរិកលើប្រទេសកម្ពុជានេះធ្វើឱ្យប៉ះពាល់ដល់ប្រទេសកម្ពុជា។ ប៉ុន្ដែអ្នកប៉ះពាល់ដំបូងគេ គឺអ្នកបញ្ជាទិញ (អាម៉េរិក) និងអ្នកផលិត (កម្ពុជា) ។ លោកជំទាវរដ្ឋមន្រ្ដីបានថ្លែងបញ្ជាក់ថា៖ «ដូច្នេះការដំឡើងពន្ធបន្ថែមនេះ គឺមានន័យថា គឺប្រជាជនៅសហរដ្ឋអាមេរិក ដែលលោកជាអ្នកបញ្ជាទិញ នូវផលិតផលពីកម្ពុជានោះ គឺលោកជាអ្នកផលប៉ះពាល់ដំបូងនៅទីនោះ ហើយផលប៉ះពាល់បន្ទាប់ពិតណាស់គឺកម្ពុជា ជាពិសេសគឺអ្នកដែលធ្វើធុរកិច្ចក្នុងវិស័យដូចជាវិស័យវាយនភណ្ឌ ស្បែកជើង សម្ភារសម្រាប់ធ្វើដំណើរជាដើម»។ លោកជំទាវបានលើកឡើងថា កិច្ចការដំឡើងអត្រាពន្ធនេះ គឺជាវិធានការរបស់សហរដ្ឋអាមេរិក ដើម្បីឱ្យមានតុល្យភាពនៃជញ្ជីញពាណិជ្ជកម្មរបស់ខ្លួនជាមួយដៃគូទាំងអស់នៅលើពិភពលោក មិនមែនធ្វើដាច់ដោយឡែកតែជាមួយកម្ពុជានោះទេ។ «ជាការពិត នៅពេលដែលតម្លើងនូវបន្ទាត់ពន្ធគយ ឬអត្រាពន្ធទៅលើផលិតផលដែលនាំចេញទៅនោះ ជាការពិត នៅពេលដែលតម្លើងអត្រាពន្ធ មានន័យថា ផលិតផលនឹងឡើងថ្លៃ ហើយដែលឡើងថ្លៃគឺនៅប្រទេសដែលជាប្រទេសគោលដៅ ឬជាប្រទេសនាំចូល»។ នេះគឺជាការលើកឡើងបន្ថែមរបស់លោកជំទាវ ចម និម្មល រដ្ឋមន្រ្ដីក្រសួងពាណិជ្ជកម្ម។

ជាមួយគ្នានេះ លោកជំទាវ ចម និម្មល ក៏បានអំពាវនាវដល់ប្រជាពលរដ្ឋកុំមានការព្រួយបារម្ភចំពោះបញ្ហានេះហើយការងារនេះ រាជរដ្ឋាភិបាលបានយកចិត្តទុកដាក់ខ្ពស់ ដើម្បីដោះស្រាយបញ្ហាទាំងនេះ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជាបានដាក់ចេញនូវវិធានការជាបន្ទាន់ ឱ្យឯកឧត្តមឧបនាយករដ្ឋមន្រ្ដី អូន ព័ន្ធមុនីរ័ត្ន ដែលជាប្រធានគោលនយោបាយ និងសេដ្ឋកិច្ច ដឹកនាំកោះប្រជុំជាមួយក្រសួងពាណិជ្ជកម្ម និងក្រសួងពាក់ព័ន្ធ វិស័យឯកជន ប្រមូលធាតុចូលដាក់ជូនសម្ដេចធិបតី ដើម្បីឆ្លើយតប និងការជំរុញវិស័យសេដ្ឋកិច្ចកម្ពុជា។

លោកជំទាវរដ្ឋមន្រ្ដីបានឱ្យដឹងទៀតថា កម្ពុជាក្នុងនាមជាសមាជិកអង្គការពាណិជ្ជកម្មពិភពលោក (WTO) ដែលមាន ១៦៦ប្រទេស យើងមានការកំណត់នូវបន្ទាត់ពន្ធគយ ជាមួយគ្នាជារួម ក្នុងនោះកម្ពុជាបានកំណត់នៅក្នុងកាតព្វកិច្ចរបស់ខ្លួន គឺការយកពន្ធនៃផលិតផលនាំចូលមិនថា សហរដ្ឋអាមេរិក ឬក៏របស់ដៃគូពាណិជ្ជកម្មផ្សេងទៀតនោះទេ គឺកម្ពុជាបានយកចន្លោះពី ០ រហូតដល់ ៣៥% ដែលជាចំនួនខ្ពស់បំផុត។ លោកជំទាវរដ្ឋមន្ត្រីបានពន្យល់បញ្ជាក់បន្ថែមថា៖ «នៅក្នុងឆ្នាំ២០២៤ ជញ្ជីងពាណិជ្ជកម្មលើការនាំចូលរបស់ផលិតផលសហរដ្ឋអាមេរិកមកកម្ពុជា ដែលមានតម្លៃប្រមាណ ៣០០លានដុល្លារ បន្ទាត់ពន្ធខ្ពស់បំផុត ដែលយើងមានទៅលើផលិតផលនាំចូលរបស់សហរដ្ឋអាមេរិក គឺមានត្រឹមតែ ២៩.៤% នោះទេ មានន័យថាទាបជាង ៣៥% ដែលជាបន្ទាត់ពន្ធដែលមានជារួម លើផលិតផលនៃពាណិជ្ជកម្មដៃគូទាំងអស់ផងដែរ»៕

ដោយ៖ ប៊ុនរិទ្ធ