AKP កណ្ដាលថ្ងៃទី៣ ខែមេសា ឆ្នាំ២០២៥ -- ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរជិតឈានមកដល់នៅពេលដ៏ខ្លីខាងមុចនេះ លោកវរសេនីយ៍ឯក លន់ លុច មេបញ្ជាការ កងការពារព្រំដែនលេខ ៦០១ យោធភូមិភាគពិសេស នៅថ្ងៃទី០៣ ខែមេសា ឆ្នាំ២០២៥ បានរៀបចំពិធីបដិសណ្ឋារកិច្ចទទួលស្វាគមន៍ការអញ្ជើញចូលរួមសួរសុខទុក្ខ ជូនពរចូលឆ្នាំថ្មីប្រពៃណីជាតិខ្មែរ ពីលោកវរសេនីយ៍ឯក ជិន គួកខាញ់ មេបញ្ជាការ យោធាការពារព្រំដែនខេត្តអានយ៉ាង ប្រទេសវៀតណាម ។

នៅក្នុងឱកាសនោះ លោកវរសេនីយ៍ឯក លន់ លុច មេបញ្ជាការ កងការពារព្រំដែនលេខ ៦០១ បានសម្ដែងនូវការស្វាគមន៍ជូនចំពោះ លោកវរសេនីយ៍ឯក ជិន គួកខាញ់ មេបញ្ជាការ យោធាការពារព្រំដែនខេត្តអានយ៉ាង បានដឹកនាំប្រតិភូ នៃយោធាការពារព្រំដែនខេត្តអានយ៉ាង អញ្ជើញមកសំណេះសំណាល សួរសុខទុក្ខ និងជូនពរបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្ដស័ក ពុទ្ធសករាជ ២៥៦៩ ដល់នាយ នាយទាហានរង និងពលទាហានកងការពារព្រំដែនលេខ ៦០១ ដែលនឹងឈានមកដល់នៅពេលខាងមុខនេះ ។ លោកមេបញ្ជាការ កងការពារព្រំដែនលេខ ៦០១ បានធ្វើការវាយតម្លៃលើកិច្ចសហប្រតិបត្តិការ ក្នុងពេលកន្លងមក ក្នុងការផ្ដាល់ប្ដូរព័ត៌មានឲ្យគ្នាទៅវិញទៅមក រួមគ្នាដោះស្រាយរាល់បញ្ហាកើតមានឡើងនៅតាមខ្សែបន្ទាត់ព្រំដែនដោយសន្តិវិធី និងរួមគ្នាកសាងព្រំដែន ប្រែក្លាយជាព្រំដែនសន្តិភាព មិត្តភាព សហប្រតិបត្តិការល្អ និងការអភិវឌ្ឍន៍ ។

លោកវរសេនីយ៍ឯក មេបញ្ជាការ កងការពារព្រំដែនលេខ ៦០១ បានពរដល់លោកវរសេនីយ៍ឯក ជិន គួកខាញ់ មេបញ្ជាការ យោធាការពារព្រំដែនខេត្តអានយ៉ាង និងប្រតិភូអមដំណើរ មានសុខភាពល្អ រកទទួលទានមានបាន និងទទួលបានជោគជ័យគ្រប់ភារកិច្ច ។

ជាមួយគ្នានោះដែរលោកវរសេនីយ៍ឯក ជិន គួកខាញ់ មេបញ្ជាការយោធាការពារព្រំដែនខេត្តអានយ៉ាង នៃកងទ័ពប្រជាជនវៀតណាម បានពាំនាំនូវការផ្ដាំផ្ញើសាកសួរសុខទុក្ខពីសំណាក់ថ្នាក់ដឹកនាំ បក្សរដ្ឋាភិបាល កងទ័ព និងប្រជាជនវៀតណាម និងបានជូនពរក្នុងឱកាសបុណ្យឆ្នាំថ្មីប្រពៃណីជាតិខ្មែរ នាក្នុងឱកាសនោះ សូមទទួលបាននូវសេចក្តីសុខ សេចក្តីចម្រើន និងទទួលបានជោគជ័យថ្មីៗបន្ថែមទៀត លើគ្រប់ភារកិច្ច និងសូមឲ្យចំណងសាមគ្គីភាព មិត្តភាព និងកិច្ចសហប្រតិបត្តិការឲ្យនៅគង់វង្សស្ថិតស្ថេរជារៀងរហូត៕ 

ដោយ៖ ណយ នឿន (ប្រភព៖កងទ័ពជើងគោក)