AKP កំពង់ធំ ថ្ងៃទី០២ ខែមេសា ឆ្នាំ២០២៥-- 

លោក ហ៊ីង ទន់ អគ្គនាយករងនៃអគ្គនាយកដ្ឋានធនធានរ៉ែ លោក ងួន រាសី អភិបាលរងខេត្តកំពង់ធំ និងក្រុមការងារ មន្ទីរអង្គភាពជុំវិញខេត្ត បានអញ្ជើញចូលរួមក្នុងកិច្ចប្រជុំពិភាក្សាស្ដីពីការកំណត់តំបន់សក្តានុពលថ្មសំណង់ និងពិនិត្យវាយតម្លៃហានិភ័យលើបរិស្ថាន សង្គម វប្បធម៌ ទេសចរណ៍ សោភ័ណភាព លើទីតាំងធ្វើអាជីវកម្មសំណង់ សម្រាប់ការគ្រប់គ្រងរយៈពេលមធ្យម នៅស្រុកបារាយណ៍ និងស្រុកសន្ទុក ក្នុងភូមិសាស្ត្រខេត្តកំពង់ធំ នាព្រឹកថ្ងៃទី០២ ខែមេសា ឆ្នាំ២០២៥។

លោក ហ៊ីង ទន់ អគ្គនាយករងនៃអគ្គនាយកដ្ឋានធនធានរ៉ែ បានមានប្រសាសន៍ថា ចំពោះការដ្ឋានថ្មដែលបានចុះពិនិត្យ៤ទីតាំងរួចមកនេះ តើមានផលប៉ះពាល់ដល់ការរស់នៅរបស់បងប្អូនប្រជាពលរដ្ឋ ឬព្រះសង្ឃដែលរស់នៅជិតទីនោះ មានការរំខានឬក៏រាំងស្ទះក្នុងការធ្វើដំណើរ និងបញ្ហាផ្សេងៗនៅក្នុងមូលដ្ឋាន។ ប្រសិនបើករណីនេះមានការប៉ះពាល់ដល់ការរស់នៅ ប្រធានមន្ទីរពាក់ព័ន្ធ និងអាជ្ញាធរមូលដ្ឋានសូមផ្ដល់ដំណឹងភ្លាមៗជាបន្ទាន់ ដើម្បីក្រុមការងារក្រសួងនិងចុះអន្តរាគមន៍ឱ្យបានទាន់ពេលវេលាដើម្បីការពារសុខសុវត្ថិភាពដល់ពួកគាត់កុំឱ្យមានបញ្ហាគ្រោះថ្នាក់ដល់អាយុជីវិតដោយប្រការណាមួយ។

លោក ងួន រាសី បានមានប្រសាសន៍លើកឡើងថា ដោយសង្កេតឃើញពីការប្រកបអាជីវកម្មការដ្ឋានថ្មជាយូរឆ្នាំមកហើយ ពុំមានផលប៉ះពាល់ដល់ការរស់នៅនោះទេ ពិសេសម្ចាស់ការដ្ឋានថ្ម បើសិនជាមានការងារចាំបាច់អ្វីមួយនៅក្នុងការរដ្ឋានថ្មរបស់ខ្លួន ត្រូវតែផ្ដល់ដំណឹងជាទាន់ដល់បងប្អូនដែលរស់នៅជិតទីនោះ ឱ្យគាត់មានការប្រុងប្រយ័តចៀសសវាងកុំឱ្យមានការគ្រោះថ្នាក់ដល់អាយុជីវិត។ ក្រុមការងារដែលបានចុះពិនិត្យការដ្ឋានថ្មទាំង៤ទីតាំងនោះបានសម្រេចឯកភាពគ្នាឱ្យពួកគាត់នៅតែបន្តធ្វើអាជីវកម្មដដែល ពិសេសក្រុមការងារត្រូវតែផ្សព្វផ្សាយឱ្យបានទូលំទូលាយពីគោលការរបស់ក្រសួង និងមន្ទីរពាក់ព័ន្ធដើម្បីឱ្យការដ្ឋានថ្មអនុវត្តទៅតាមគោលការណ៍ដែលបានកំណត់។

សូមបញ្ជាក់ថាការចុះកំណត់តំបន់សក្តានុពលធនធានរ៉ែថ្មសំណង់ និងការពិនិត្យវាយតម្លៃហានិភ័យ ការដ្ឋានអាជីវកម្មថ្មសំណង់ក្នុងភូមិសាស្ត្រខេត្តកំពង់ធំ ទាំង៤ទីតាំងរួមមាន៖ ១.នៅការដ្ឋានថ្មសំណង់ ស្រ៊ុន់ ហេងងន់ ស្ថិតនៅឃុំគគីរធំ ស្រុកបារាយណ៍។ ២. នៅការដ្ឋានថ្មសំណង់ កូវ គឹមលាង ស្ថិតនៅឃុំក្រវ៉ា និងឃុំបាក់ស្នា ស្រុកបារាយណ៍។ ៣. នៅភូមិស្រឡៅទោង ឃុំបល្ល័ង្ក ស្រុកបារាយណ៍។ ៤. នៅការដ្ឋានថ្មសំណង់ ប៊ូ ពន្លឺ ស្ថិតនៅឃុំទីពោ ស្រុកសន្ទុក ខេត្តកំពង់ធំ៕

ដោយ ស៊ុម វណ្ណា