AKP ព្រះសីហនុ ថ្ងៃទី២ ខែមេសា ឆ្នាំ២០២៥--ក្រុមកាងារកម្មវិធី ASPIRE-AT នៃមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ ដឹកនាំដោយ លោក តឹក ជីវ៉ាយ អនុប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះសីហនុ  ជាអ្នក គ្រប់គ្រងកម្មវិធីថ្នាក់ខេត្ត បានចុះសម្របសម្រួលរៀបចំវគ្គបណ្តុះបណ្តាលផ្សព្វផ្សាយចែករំលែកចំណេះដឹង និងបទពិសោធន៍ពីភាពជោគជ័យពីកសិករនាំមុខលើខ្សែច្រវាក់ផលិត និងតម្លៃបន្លែ ដល់ថ្នាក់ដឹកនាំ និងសមាជិកសហគមន៍កសិកម្មបន្លែសុវត្ថិភាពនៅឃុំសំរុងក្រោម នៅអាគារប្រមូលផ្តុំបន្លែ ស្ថិតក្នុងភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ កាលពីថ្ងៃអង្គារទី០១ ខែមេសា ឆ្នាំ២០២៥ ។ 

+លទ្ធផល និងមេរៀនស្តីពីការបណ្តុះបណ្តាលមានដូចខាងក្រោម៖ 

១-ការធ្វើជីកំប៉ុស្ដិ៍ដោយប្រើអកម៉ូន អី អឹម (បង្ហាញអំពីអត្ថប្រយោជន៍នៃ EM, សម្ភារៈប្រើប្រាស់ និងវិធីធ្វើជី) ។

២-វិធានការចម្រុះលើការគ្រប់គ្រងកត្ដាចង្រៃ IPM (ពិភាក្សាពីថ្នាំពុលកសិកម្ម)។

៣-បច្ចេកទេសរៀបចំដី និងប្រព័ន្ធទឹកស្រោចស្រប់ (បង្ហាញពីសារៈប្រយោជន៍នៃបច្ចេកទេសរៀបចំដី និងប្រព័ន្ធទឹក)។

៤-បច្ចេកទេសបណ្ដុះកូនបន្លែ (បង្ហាញពីសម្ភារៈ វិធីបណ្ដុះគ្រាប់ ការថែទាំ និងបញ្ហាដែលជួបប្រទះ)។

៥-ការគ្រប់គ្រងកសិដ្ឋាន (រួមមាន៖ 

១.ការគ្រប់គ្រងបុគ្គលិក ២.ការគ្រប់គ្រងថវិកា ៣.ការគ្រប់គ្រងហេដ្ឋារចនាសម្ព័ន្ធផ្ទះសំណាញ់ សម្ភារៈ និង ៤.ការគ្រប់គ្រងប្រព័ន្ធទឹក និងដីដាំដុះ)។

សូមរម្លឹកថា មន្ទីរកសិកម្មរុក្ខាប្រមាញ់ និងនេសាទខេត្តព្រះសីហនុ បានបង្កើតសហគមន៍ដាំដុះបន្លែធម្មជាតិ នៅតាមឃុំនានាក្នុងស្រុកព្រៃនប់ និងស្រុកកំពង់សិលា ទន្ទឹមនោះ មន្ទីរក៏បានបង្កើតសហគមន៍ចិញ្ចឹមត្រីបែបវារីវប្បកម្ម ក្តាមថ្ម  និងបង្ដារ ដើម្បីបង្កើនជីវភាពដល់ប្រជាពលរដ្ឋនៅតាមសហគមន៍កាន់តែមានជីវភាពប្រសើរឡើងពីមួយឆ្នាំទៅមួយឆ្នាំ ជាពិសេសប្រជាពលរដ្ឋមានការយល់ដឹងបានចូលរួមក្នុងសហគមន៍ដាំដុះបន្លែ ចិញ្ចឹមត្រី ក្តាម បង្គារ  ដើម្បីជួយកាត់បន្ថយការនាំចូលពីប្រទេសជិតខាង ម្យ៉ាងទៀតមន្ត្រីបច្ចេកទេស នៃមន្ទីរកសិកម្ម តែងតែចុះផ្ទាល់ជាមួយសហគមន៍ប្រជាពលរដ្ឋព្រមទាំងបានផ្តល់ប្រឹក្សាបច្ចេកទេសដាំដុះ ការចិញ្ចឹមត្រី ក្តាម បង្គារដល់ប្រជាសហគមន៍ជាបន្តបន្ទាប់ និងបានផ្តល់គ្រាប់ពូជដំណាំថែមទៀតផង ៕

ដោយ៖ ងូ សុមុនី