AKP ព្រះវិហារ​ ថ្ងៃទី២ ខែមេសា ឆ្នាំ២០២៥--លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានណែនាំដល់មន្ត្រីសុខាភិបាលទាំងអស់ក្នុងខេត្ត ត្រូវយកចិត្តទុកដាក់ផ្តល់សេវាជូនដល់បងប្អូនប្រជាពលរដ្ឋ​ដែលប្រើប្រាស់បណ្ណមូលនិធិសមធម៌ និងបណ្ណ ប.ស.ស សូមកុំឱ្យមានការបែងចែក អ្នកបង់លុយយកចិត្តទុកដាក់ និងអ្នកដែលកាន់កាតមិនយកចិត្តទុកដាក់ និងសំណូមពរកុំឱ្យកើតមានឱ្យសោះ នៅក្នុងខេត្តព្រះវិហារយើង​ ព្រមទាំងលើកទឹកចិត្តដល់ប្រជាពលរដ្ឋដែលប្រើប្រាស់បណ្ណទាំងនេះ សូមមានសេចក្តីក្លាហានរាយការណ៍ជូនថ្នាក់ដឹកនាំ ក្នុងករណីដែលមន្ត្រីសុខាភិបាលមិនយកចិត្តទុកដាក់បងប្អូនដែលអ្នកប្រើប្រាស់បណ្ណទាំងអស់នេះ ។​

លោកវេជ្ជបណ្ឌិត ធ្វើឡើងក្នុងឱកាសដែលលោកអញ្ជើញចូលរួមក្នុងពិធីបើកសន្និបាតបូកសរុបលទ្ធផលការងារសុខាភិបាលប្រចាំឆ្នាំ២០២៤ និងលើកទិសដៅបន្តឆ្នាំ២០២៥ របស់មន្ទីរសុខាភិបាលខេត្តព្រះវិហារ នាព្រឹកថ្ងៃអង្គារ ៤កើត ខែចេត្រ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី០១ ខែមេសា ឆ្នាំ២០២៥ ដោយមានការចូលរួមពីថ្នាក់ដឹកនាំមន្ទីរ អាជ្ញាធរក្រុង ស្រុក លោក លោកស្រី ប្រធាន អនុប្រធាន មន្ទីរ អង្គភាព ជុំវិញខេត្ត លោក លោកស្រី ប្រធាន អនុប្រធាន មន្ទីរពេទ្យបង្អែក មណ្ឌលសុខភាព ប៉ុស្តិ៍​សុខភាព ព្រមទាំងដៃគូរជាច្រើនទៀត ។​

លោកវេជ្ជបណ្ឌិត គួង ឡូ បានលើកឡើងបន្តថា សន្និបាតដែលយើងធ្វើនាថ្ងៃនេះ គឺដើម្បីពិនិត្យមើលសកម្មភាពមួយចំនួនដែលយើងបានជួបប្រទះនៅក្នុងឆ្នាំ២០២៤ ដើម្បីរកដំណោះស្រាយសម្រាប់ឆ្នាំ២០២៥ ធ្វើយ៉ាងណាឱ្យការផ្តល់ ​និងការបម្រើសេវាសុខភាពជូនប្រជាពលរដ្ឋកាន់តែល្អប្រសើរនៅក្នុងខេត្តព្រះវិហារ។​ 

លោកសូមថ្លែងអំណរគុណដល់ដៃគូរអភិវឌ្ឍន៍ទាំងអស់ ដែលបានចូលរួមចំណែកយ៉ាងសកម្ម នៅក្នុងការធ្វើយ៉ាងណាឱ្យសេវាសុខភាពនៅក្នុងខេត្តព្រះវិហារដំណើរការកាន់តែប្រសើរ។​

លោកថ្លែងបញ្ជាក់ទៀតថា បទពិសោធន៍មួយដ៏ល្អសម្រាប់យើងនៅក្នុងការប្រយុទ្ធប្រឆាំងជំងឺកូវីដ១៩ បើមិនមានការចូលរួមយ៉ាងសកម្មពីអាជ្ញាធរគ្រប់លំដាប់ថ្នាក់ ពីដៃគូរអភិវឌ្ឍន៍ ពីបងប្អូនប្រជាពលរដ្ឋ ពីសហគមន៍ ពីក្រុមគ្រួសារ យើងមិនអាចសម្រេចបាននូវភាពជោគជ័យដ៍ធំនៃការប្រយុទ្ធប្រឆាំងជំងឺកូវីដ១៩ នៅក្នុងប្រទេសកម្ពុជាបាននោះទេ។​

លោកក៏បានណែនាំដល់មន្ត្រីសុខាភិបាលទាំងអស់ សូមធ្វើយ៉ាងណាពង្រឹងការផ្តល់សេវា ទៅតាមអនុសាសន៍របស់លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នូវពាក់្យ២ឃ្លាដែលយើងទាំងអស់គ្នាត្រូវតែចងចាំនិងអនុវត្តន៍គឺ ពាក្យពង្រឹង និង ពង្រីក​។ 

​

លោកវេជ្ជបណ្ឌិត ក៏បានថ្លែងពីបញ្ហាជម្ងឺមិនឆ្លង គឺជាជម្ងឺមួយដែលកំពុងដើរតួយ៉ាងសំខាន់នៅក្នុងការសម្លាប់ប្រជាពលរដ្ឋនៅលើពិភពលោក ក្នុងនោះក៏មានប្រទេសកម្ពុជាដែរ។​ តាមការសិក្សាស្រាវជ្រាវបានបង្ហាញច្បាស់ថា នៅប្រទេសជឿនលឿន៧០ភាគរយ នៃអ្នកស្លាប់ គឺបណ្តាលមកពីជម្ងឺមិនឆ្លង ដោយឡែកនៅប្រទេសកម្ពុជាគឺមាន៦៥ភាគរយ នៃអ្នកស្លាប់ដោយជម្ងឺមិនឆ្លង មានដូចជា ជម្ងឺទឹកនោមផ្អែម ជម្ងឺលើសសំពាធឈាម ជម្ងឺគាំងបេះដូងជាដើម ៕

ដោយ ៖ ទិត ស្រ៊