AKP ភ្នំពេញ ថ្ងៃទី០១ ខែមេសា ឆ្នាំ២០២៥-- លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា អញ្ជើញជាអធិបតីក្នុងយុទ្ធនាការបរិច្ចាគឈាម ក្រោមប្រធានបទ "ផ្តល់ឈាមផ្តល់ស្នាមញញឹម" កាលពីថ្ងៃទី៣១ ខែមីនា ឆ្នាំ២០២៥ ដោយមានការអញ្ជើញចូលរួមពីឯកឧត្តមបណ្ឌិត អ៊ុំ រតនា សាកលវិទ្យាធិការរង តំណាងលោកជំទាវ ឃឹម រ៉ានី សាកលវិទ្យាធិការ និងជាប្រធានកិត្តិយសក្លឹបយុវជនកាកបាទក្រហមកម្ពុជា ប្រចាំសាកលវិទ្យាល័យកម្ពុជា លោកស្រីវេជ្ជ. ឯកទេស ហេង សុខចំរើន អនុប្រធានមជ្ឈមណ្ឌលជាតិផ្តល់ឈាមនិងអ្នកចូលរួមបរិច្ចាគឈាមចំនួន ១០០នាក់ ដោយទទួលបានឈាមចំនួន ៧៦ប្លោក ដែលក្នុងនោះមានបុរស៣៥នាក់ និងនារី ៤១នាក់ នៅសាលបណ្ឌិតហាន់ដានៃសាកលវិទ្យាល័យកម្ពុជា។

នាឱកាសនោះ លោកជំទាវអគ្គលេខាធិការ បានមានប្រសាសន៍ថាកាកបាទក្រហមកម្ពុជា ដែលមានហ្លួងម៉ែ នរោត្តម មុនិនាថ សីហនុ គង់ប្រថាប់ជាព្រះប្រធានកិត្តិយស និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដែលលោកទាំងទ្វេយកចិត្តទុកដាក់ចំពោះ កម្លាំងយុវជន និងអ្នកស្ម័គ្រចិត្ត ជំរុញ និងបណ្ដុះឆន្ទៈ ផ្នត់គំនិត បំពេញការងារស្ម័គ្រចិត្តស្របតាមគោលការណ៍គ្រឹះទាំង៧របស់ចលនា និងអនុវត្តតាមយុទ្ធសាស្ដ្រ ២០២១-២០៣០ របស់កាកបាទក្រហមកម្ពុជា ដែលមានវិស័យអាទិភាពចំនួន៤ ក្នុងនោះវិស័យអាទិភាពទី២ គឺសុខភាព និងការថែទាំសុខភាពសហគមន៍ រួមចំណែកជាមួយរាជរដ្ឋាភិបាល កាត់បន្ថយអត្រាឈឺ និងស្លាប់នៃមាតា ទារក និងកុមារ ការពារ និងលុបបំបាត់ជំងឺឆ្លង មិនឆ្លង អន្ដរាគមន៍សុខភាពគ្រាអាសន្ន សុខភាពមនុស្សចាស់ សង្គ្រោះបឋម និងលើកកម្ពស់សុខភាពបឋម។

លោកជំទាវបានបញ្ជាក់ថា ជាការពិតណាស់ ការស្ម័គ្រចិត្តបរិច្ចាគឈាម ចែករំលែកឈាម គឺជាការចែករំលែកក្ដីស្រឡាញ់ ពិសេសគឺជួយសង្គោះជីវិតមនុស្ស និងផ្តល់ស្នាមញញឹម ជាមួយស្មារតីនៃវប្បធម៌ចែករំលែក គ្រឹះស្ថានសិក្សារបស់ខ្លួនជាមួយសហគមន៍។ យុទ្ធនាការបរិច្ចាគឈាមនាពេលនេះមិនត្រឹមតែផ្តល់ការលើកទឹកចិត្តដល់អ្នកបរិច្ចាគឈាមនោះទេ  ថែមទាំងផ្សព្វផ្សាយពីការយល់ដឹង និងសារៈសំខាន់នៃការបរិច្ចាគឈាមជាប្រចាំក្នុងការជួយសង្គ្រោះជីវិត និងការលើកកម្ពស់ការយល់ដឹងវិជ្ជាសង្រ្គោះបឋម។ប្រធានបទក្នុងយុទ្ធនាការបរិច្ចាគឈាម “ផ្តល់ឈាម ផ្តល់ស្នាមញញឹម” គូសបញ្ជាក់ពីមោទនាភាពដ៏វិសេសវិសាលដែលយើងអាចធ្វើបុណ្យជួយជីវិតមនុស្សតាមរយៈទង្វើដ៏សាមញ្ញមួយគឺការបរិច្ចាគឈាម និងសង្រ្គោះបឋម៕

ដោយ ពេជ្រ សំអឿន (ប្រភព៖ កាកបាទក្រហមកម្ពុជា)