AKP កំពង់ធំ ថ្ងៃទី០១ ខែមេសា ឆ្នាំ២០២៥-- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ និងលោកជំទាវ កាលពីរសៀលថ្ងៃទី៣១ ខែមីនា ឆ្នាំ២០២៥ បានអញ្ជើញជាអធិបតីភាពក្នុងពិធីអភិសេករូបសំណាកសម្ដេចព្រះសង្ឃរាជ ជួន ណាត រូបសំណាកព្រះបាទជ័យវរ្ម័នទី ៧ និងអ្នកភិរម្យភាសាអ៊ូ ហៅង៉ុយ ដើម្បីតម្កល់ទុកជាទីសក្ការៈជូនប្រជាពុទ្ធបរិស័ទគោរពបូជានៅវត្តក្រសាំងមានជ័យ ស្ថិតនៅក្នុងឃុំសាន់គរ ស្រុកកំពុងស្វាយ ខេត្តកំពង់ធំ។

ឧត្តមសេនីយ៍ទោ សោម ស៊ុន បានមានប្រសាសន៍ថា ដើម្បីចូលរួមចំណែកក្នុងការកសាងសមិទ្ធផលនានាក្នុងវិស័យព្រះពុទ្ធសាសនា ដែលជាសាសនារបស់រដ្ឋ កន្លងទៅនេះ ថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងក្រុម គ្រួសារបានចូលរួមបច្ច័យ និងសម្ភារសំណង់មួយចំនួន ចូលរួមចំណែកក្នុងការកសាងសមិទ្ធផលនានារួចមកហើយនៅក្នុងទីអារាមនេះ។ បច្ចុប្បន្ននេះវិស័យព្រះពុទ្ធសាសនាមានការរីកចម្រើនគួរជាទីមោទន: ក្រោមដំបូលសុខសន្តិភាព និងការឯកភាពជាតិពេញលេញ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ហើយមកដល់ពេលនេះមានព្រះសង្ឃគង់នៅជាង៧ម៉ឺនអង្គ និងមានវត្តអារាមជាង៥ពាន់វត្តនៅទូទាំងប្រទេស។

ឧត្តមសេនីយ៍ទោ សោម ស៊ុន បានកោតសរសើរ និងថ្លែងអំណរគុណដល់ព្រះគ្រូចៅអធិការ និងគណៈកម្មការអាចារ្យវត្ត ដែលបានកសាងរូបសំណាកសម្ដេចព្រះសង្ឃរាជ ជួន ណាត រូបសំណាកព្រះបាទជ័យវរ្ម័នទី ៧ និងអ្នកភិរម្យភាសាអ៊ូ ហៅង៉ុយ ដើម្បីតម្កល់ទុកជាទីសក្ការៈសម្រាប់កូនខ្មែរគ្រប់ៗរូប បានស្គាល់ និងដឹងគុណនូវស្នាដៃរបស់បុព្វបុរសខ្មែរយើង។

ក្នុងឱកាសនោះ ឧត្តមសេនីយ៍ទោ សោម  ស៊ុន និងលោកជំទាវ ព្រមទាំងសហការី និងក្រុមគ្រួសារ បាននាំយកអំណោយមនុស្សធម៌របស់សម្តេចធិបតី និងលោកជំទាវបណ្ឌិត ប្រគេនព្រះសង្ឃ និងប្រគល់ជូនគណៈកម្មការអាចារ្យវត្ត រួមមានអង្ករចំនួន២៥០គីឡូក្រាម និងថវិកាមួយចំនួនរបស់ថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងក្រុមគ្រួសារ  ដើម្បីចាត់ចែងផ្គត់ផ្គង់ចង្ហាន់ព្រះសង្ឃ និងបន្តរួមចំណែកកសាងសមិទ្ធផលនានានៅក្នុងទីអារាមនេះ បន្ថែមទៀត។

ព្រះតេជគុណ បូ សារីម ព្រះគ្រូចៅអធិការវត្តក្រសាំងមានជ័យ បានថ្លែងអំណរគុណចំពោះឧត្តមសេនីយ៍ទោ សោម ស៊ុន និងលោកជំទាវ ព្រមទាំងសហការីទាំងអស់នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលតែងតែបានជួយដោះស្រាយនូវរាល់ការលំបាកផ្សេងៗ នាពេលកន្លងទៅ និងបានចូលរួមចំណែកក្នុងការកសាងសមិទ្ធផលនានាជាច្រើន នៅក្នុងទីអារាមវត្តក្រសាំងមានជ័យ ឃុំសាន់គរ ស្រុកកំពង់ស្វាយ ខេត្តកំពង់ធំនេះ និងសូមជូនពរឯកឧត្តម លោកជំទាវ លោកលោកស្រីទាំងអស់នៃបញ្ជាការដ្ឋានតំបន់ប្រវត្តិការសឹករងកំពង់ធំ សូមទទួលបាននូវពុទ្ធពរទាំង៤ ប្រការ កុំបីឃ្លៀងឃ្លាតឡើយ៕

ដោយ ស៊ុម វណ្ណា (ប្រភព៖ តំបន់សឹករងកំពង់ធំ)