AKP ភ្នំពេញ ថ្ងៃទី២៧ ខែមីនា ឆ្នាំ២០២៥ -- លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី បានអនុញ្ញាតឱ្យឯកឧត្តម Santo Darmosumarto ឯកអគ្គរដ្ឋទូតនៃសាធារណរដ្ឋឥណ្ឌូនេស៊ីប្រចាំនៅកម្ពុជា ចូលជួបពិភាក្សានៅទីស្ដីការក្រសួង អំពីការងារអាទិភាពសំខាន់ៗជុំវិញការលើកកម្ពស់សមភាពយេនឌ័រ និងការពង្រឹងភាពអង់អាចដល់ស្រ្តី និងក្មេងស្រី។

លោកជំទាវកិត្តិបណ្ឌិតរដ្ឋមន្រ្តី បានគូសបញ្ជាក់ពីយុទ្ធសាស្រ្តរបស់ក្រសួងកិច្ចការងារនារីក្នុងបញ្ជ្រាបយេនឌ័រទៅក្នុងក្រសួងស្ថាប័ន គោលនយោបាយជាតិ ក្របខណ្ឌជាតិ និងផែនការយុទ្ធសាស្រ្ត រួមមានផែនការយុទ្ធសាស្រ្តចតុកោណ និងផែនការយុទ្ធសាស្រ្តបញ្ចកោណ។  ក្របខ័ណ្ឌនៃការបញ្ជ្រាបយេនឌ័រ ដោយប្រើប្រាស់វិធីសាស្រ្តផ្លាស់ប្តូរយេនឌ័រក្នុងក្របខ័ណ្ឌច្បាប់ គោលនយោបាយជាតិ និងក្របខ័ណ្ឌកម្មវិធីតាមវិស័យ និងការផ្លាស់ប្តូរអាកប្បកិរិយាសាធារណៈ រួមមានយុទ្ធសាស្រ្តចំនួន៦៖ (១) ការពង្រឹងភាពអង់អាចផ្នែកសេដ្ឋកិច្ចស្ត្រី (២) សីលធម៌សង្គម តម្លៃស្ត្រី និងគ្រួសារ (៣) សុខុមាលភាពរបស់ស្ត្រី និងក្មេងស្រី (៤) ការការពារផ្នែកច្បាប់របស់ស្ត្រី និងកុមារី (៥) ស្ត្រីក្នុងភាពជាអ្នកដឹកនាំ និងអភិបាលកិច្ច និងទី(៦) ស្ត្រី និងការប្រែប្រួលអាកាសធាតុ។

ទន្ទឹមនឹងនេះ ឯកឧត្តម Santo Darmosumarto បានបង្ហាញពីចំណាប់អារម្មណ៍នៃកិច្ចសហការជាមួយក្រសួងកិច្ចការនារីមួយចំនួន លើការផ្សារភ្ជាប់សហគ្រាសខ្នាតតូច និងមធ្យម និងសហគ្រិនភាពរវាងស្រ្តីនៃប្រទេសទាំងពីរ ការផ្តល់អាហារូបករណ៍ថ្នាក់បរិញ្ញាបត្រ ថ្នាក់អនុបណ្ឌិត និងថ្នាក់បណ្ឌិត ដល់និស្សិតស្រ្តី និងមន្រ្តីរាជការ និងពង្រីកកិច្ចសហការក្នុងក្របខ័ណ្ឌអាស៊ាន។

ក្នុងឱកាសនោះដែរ លោកជំទាវកិត្តិបណ្ឌិតរដ្ឋមន្រ្តីបានស្វាគមន៍ចំពោះចំណុចសំខាន់ៗនៃកិច្ចសហការខាងលើ ដោយបានស្នើថា ស្ថានទូតឥណ្ឌូនេស៊ី គួរមានកិច្ចសហការជាមួយក្រសួងអប់រំ យុវជន និងកីឡា ក្នុងការផ្សព្វផ្សាយពីអាហារូបករណ៍ ហើយក្រសួងកិច្ចការនារីនឹងជួយផ្សព្វផ្សាយផងដែរ។

លោកជំទាវកិត្តិបណ្ឌិតបានស្នើឱ្យមានការធ្វើទស្សនកិច្ចសិក្សាលើការចែករំលែកចំណេះដឹង និងការអនុវត្តល្អស្តីពីសមភាពយេនឌ័រ និងលើកទឹកចិត្តដល់ភាពជាដៃគូរវាងអាជីវកម្មដែលដឹកនាំដោយស្ត្រីដើម្បីស្វែងរកទីផ្សារថ្មីៗ ព្រមទាំងការសិក្សាពីប្រទេសឥណ្ឌូនេស៊ីលើការរៀបចំ និងអនុវត្តផែនការសកម្មភាពជាតិស្តីពីស្រ្តី សន្តិភាព និងសន្តិសុខ៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)