AKP កំពង់ចាម ថ្ងៃទី២៦ ខែមីនា ឆ្នាំ២០២៥-- ឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម កាលពីរសៀលថ្ងៃទី២៥ ខែមីនា ឆ្នាំ២០២៥ បានដឹកនាំកិច្ចប្រជុំដាក់ផែនការសន្តិសុខសណ្តាប់ធ្នាប់សាធារណៈ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ និងចាត់តាំងអនុវត្តសកម្មភាព រៀបចំសង្ក្រាន្តខេត្តកំពង់ចាម ចាប់ថ្ងៃទី១៣-១៦ ខែមេសា ឆ្នាំ២០២៥ ដើម្បីធ្វើ យ៉ាងណាបង្កលក្ខណៈបរិយាកាសឱ្យភាពសប្បាយរីករាយរបស់ប្រជាពលរដ្ឋ ក្រោមម្លប់សន្តិភាព។

ឯកឧត្តម អ៊ុន ចាន់ដា បានណែនាំដល់អាជ្ញាធរក្រុង ស្រុក និងមន្ត្រីពាក់ព័ន្ធគ្រប់លំដាប់ថ្នាក់ ត្រូវអនុវត្តភារកិច្ចធ្វើយ៉ាងណាដើម្បីបង្កបរិយាកាសសប្បាយរីករាយជូនប្រជាពលរដ្ឋ ក្នុងការលេងល្បែងប្រជាប្រិយ និងដើរលេងឱ្យបានល្អប្រសើរបំផុត នៅតាមទីកន្លែង និង រមណីយដ្ឋាននានា ក្នុងភូមិសាស្ត្រខេត្តកំពង់ចាម ដើម្បីចូលរួមអបអរសាទរ និងបង្កភាពសប្បាយរីករាយជូនប្រជាពលរដ្ឋនៅទូទាំងខេត្ត និងរក្សាបាននូវអត្តសញ្ញាណជាតិ ទំនៀមទម្លាប់ដ៏ល្អផូរផង់របស់ជាតិខ្មែរ ដែលពោរពេញដោយសន្តិភាព និងការអភិវឌ្ឍក្រោមការដឹកនាំរបស់រាជរដ្ឋាភិបាល អាណត្តិទី៧។

ទន្ទឹមនឹងនេះ ឯកឧត្តមបានធ្វើការណែនាំដល់អាជ្ញាធរគ្រប់លំដាប់ថ្នាក់ ត្រូវដឹកនាំ រៀបចំតុបតែង កែលម្អ បំភ្លឺភ្លើងពណ៌ និងលើកបដាពាក្យស្លោក ទង់ជាតិ ទង់សាសនា នៅតាមផ្លូវសាធារណៈ តាមគេហដ្ឋាន និងតាមមន្ទីរ-អង្គភាព ក្រុង ស្រុក ឃុំ-សង្កាត់ គ្រឹះស្ថានសាធារណៈ វត្តអារាម និងដឹកនាំ រៀបចំលេងល្បែងប្រជាប្រិយនៅតាមកន្លែងកម្សាន្ត តាមរមណីយដ្ឋាននានា ឬទីតាំងដែលបានរៀបចំ ចៀសវាង និងទប់ស្កាត់ឱ្យបាននូវល្បែងណាដែលប្រាសចាកនឹងប្រពៃណីជាតិ ដូចជាល្បែងស៊ីសង ជះទឹក លាបធ្យូង និងគ្រឿងផ្ទុះផ្សេងៗ ។ល។ 

ជាមួយគ្នានេះដែរ រដ្ឋបាលក្រុង ស្រុក ត្រូវ ធ្វើការផ្សព្វផ្សាយ និងណែនាំឱ្យបងប្អូនប្រជាពលរដ្ឋឱ្យមានការប្រុងប្រយ័ត្នបញ្ហាអគ្គិភ័យ និងថែរក្សាការពាររក្សាសន្តិសុខ សុវត្ថិភាព សណ្តាប់ធ្នាប់សង្គម និងជួយសម្រួលចរាចរណ៍គ្រប់ទីកន្លែង និងបង្កលក្ខណៈល្អប្រសើរតាមទីកន្លែងកម្សាន្តនានាជូនប្រជាពលរដ្ឋ ភ្ញៀវជាតិ-អន្តរជាតិ បានចូលរួមកម្សាន្តសប្បាយផងដែរ៕

ដោយ ឆាយ ម៉ុត