AKP កំពង់ធំ ថ្ងៃទី១៩ ខែមីនា ឆ្នាំ២០២៥-- ឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ បានដាក់គោលការណ៍៦ចំណុចដល់មន្ត្រីនគរបាលជាតិនៃស្នងការនគរបាលខេត្តកំពង់ធំយកទៅអនុវត្តឱ្យទទួលបានប្រសិទ្ធភាពខ្ពស់ ក្នុងឱកាសអញ្ជើញដឹកនាំកិច្ចប្រជុំបូកសរុបលទ្ធផលការងារប្រចាំខែមីនា និងលើកទិសដៅអនុវត្តបន្តសម្រាប់ខែមេសាឆ្នាំ២០២៥ នៅសាលប្រជុំស្នងការដ្ឋាននគរបាលខេត្តកំពង់ធំ កាលពីថ្ងៃទី១៨ ខែមីនា ឆ្នាំ២០២៥។

ក្នុងឱកាសនោះ ឧត្តមសេនីយ៍ទោ ហេង សុផល បានថ្លែងអំណរគុណ និងកោតសរសើរដល់កងកម្លាំងនគរបាលជាតិគ្រប់លំដាប់ថ្នាក់ទូទាំងខេត្ត ដែលបងប្អូនខិតខំប្រឹងប្រែងយកអស់កម្លាំងកាយចិត្ត ក្នុងការអនុវត្តតួនាទី/ភារកិច្ច ប្រកបដោយស្មារតីទទួលខុសត្រូវខ្ពស់ធ្វើឱ្យបទល្មើសគ្រប់ប្រភេទ មានការថយចុះជាបន្តបន្ទាប់គួរជាទីមោទនៈ និងមានប្រសិទ្ធភាពបំផុត។

ឧត្តមសេនីយ៍ស្នងការនគរបាលខេត្តបានដាក់ចេញនូវគោលការណ៍៦ចំណុច ដល់ផែនការងារជំនាញ រួមមាន៖ ១. ការងារប្រឆាំងបទល្មើសគ្រឿងញៀនត្រូវបង្ក្រាបដូចភ្លៀងរលឹម អនុវត្តតាមទិសស្លោកប្រយុទ្ធប្រឆាំងគ្រឿងញៀនបីកុំ មួយរាយការណ៍ គឺ "កុំពាក់ព័ន្ធ កុំជួញដូរ កុំចែកចាយ កុំធ្វើខ្នងបង្អែក កុំឃុបឃិត និងកុំប្រើប្រាស់គ្រឿងញៀន)។ កុំអន្តរាគមន៍ កុំរារាំងការអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឫមិត្តភក្កិក៏ដោយ។ កុំលើកលែង  កុំបន្ធូរបន្ថយការអនុវត្តច្បាប់ចំពោះឧក្រិដ្ឌជនគ្រឿងញៀន។ សមត្ថកិច្ចពាក់ព័ន្ធទាំងអស់ត្រូវអនុវត្តច្បាប់ដោយម៉ឺងម៉ាត់ និងស្មោះត្រង់វិជ្ជាជីវ:របស់ខ្លួន ហើយជនគ្រប់រូបត្រូវគោរពនិងអនុវត្តច្បាប់។ មួយរាយការណ៍៖ ត្រូវរាយការណ៍ ផ្តល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិតនិងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច។ ២. ការងារព្រហ្មទណ្ឌ ប្រើប្រាស់វិធានការជំនាញ បង្ការ ទប់ស្កាត់ និងបង្ក្រាបបទល្មើស លួច ឆក់ ប្លន់ និងល្បែងស៊ីសងខុសច្បាប់។ ៣. ការងារចរាចរណ៍ផ្លូវគោក បង្កើនការផ្សព្វផ្សាយច្បាប់ចរាចរណ៍ តាមគ្រឹះស្ថាន សាលារៀន គោលដៅងាយរងគ្រោះ បញ្ជ្រាបចំណេះដឹង និងពញ្ញាក់ស្មារតីដល់ប្រជាពលរដ្ឋឱ្យមានការយល់ដឹង និងមានការប្រុងប្រយ័ត្នដើម្បីចូលរួមគោរពច្បាប់គ្រប់ៗគ្នា បន្តរឹតបន្តឹងការអនុវត្តច្បាប់សំដៅកាត់បន្ថយគ្រោះថ្នាក់ឱ្យមានកម្រិត រក្សាបាន អាយុជីវិត ទ្រព្យសម្បត្តិ។ ៤. ពង្រឹងការងារគ្រប់គ្រងមុខសញ្ញាក្មេងទំនើង មុខសញ្ញាចេញពីពន្ធនាគារ ការងារគ្រប់គ្រងដីកា។ ៥. ពង្រឹងការគ្រប់គ្រង ដឹកនាំបញ្ជាក្នុងការអនុវត្ត តួនាទី ភារកិច្ច ប្រកបដោយស្មារតីទទួលខុសត្រូវខ្ពស់ និង៦.បង្កើនការសាមគ្គីភាពកិច្ចសហការល្អជាមួយមន្ត្រីរាជការ ប្រជាពលរដ្ឋ គ្រប់ស្រទាប់វណ្ណៈ ទូទាំងខេត្ត។ ដោយឡែកការងារអគ្គិភ័យ និងសង្រ្គោះ បន្តត្រួតពិនិត្យ សម្ភារមធ្យោបាយ ឧបករណ៍ បច្ចេកទេស បម្រើឱ្យកិច្ចប្រតិបត្តិការសង្គ្រោះ បន្តចុះផ្សព្វផ្សាយ អប់រំ បញ្ហាអគ្គិភ័យ និងចែកលេខទូរសព្ទទំនាក់ទំនងសម្រាប់កិច្ចអន្តរាគមន៍ដល់ប្រជាពលរដ្ឋ។

ឧត្តមសេនីយ៍ទោស្នងការបានផ្ដាំផ្ញើដល់កងកម្លំាងត្រូវគោរពអនុវត្តឱ្យបានខ្ជាប់ខ្ជួននូវអភិក្រមទាំង៥ របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ប្រធានព្រឹទ្ធសភានៃព្រះរាជាណាចក្រកម្ពុជា៕

ដោយ ស៊ុម វណ្ណា (ប្រភព៖ ស្នងការនគរបាលខេត្តកំពង់ធំ)