AKP ភ្នំពេញ ថ្ងៃទី១៨ ខែមីនា ឆ្នាំ២០២៥ -- សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានមានប្រសាសន៍ចង់ឱ្យប្រទេសទាំង១១ជួយកម្ពុជាបន្ថែមទៀត ក្នុងការរបណ្ដុះបណ្ដាលធនធានមនុស្សរបស់កម្ពុជា។ នេះបើតាមការឱ្យដឹង របស់ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បន្ទាប់ពីសម្តេចអគ្គមហាសេនាបតីតេជោ ហ៊ុន សែនប្រមុខរដ្ឋស្តីទីនៃព្រះរាជាណាចក្រកម្ពុជា បានអនុញ្ញាតឱ្យប្រតិភូបណ្តាកុងស៊ុលកិត្តិយសចំនួន១១ប្រទេសដឹកនាំដោយលោកបណ្ឌិត Salah Essa កុងស៊ុលកិត្តិយសនៃសាធារណរដ្ឋស៊ីប (Cyprus) ប្រចាំនៅកម្ពុជាចូលជួបសម្តែងការគួរសម នាព្រឹកថ្ងៃទី ១៨ ខែមីនា ឆ្នាំ២០២៥ នៅវិមានព្រឹទ្ធសភា។

ក្នុងជំនួបនោះ សម្ដេចតេជោ ហ៊ុន សែន បានសម្ដែងនូវក្តីករាយនិងស្វាគមន៍ចំពោះវត្តមាននៃបណ្ដាប្រតិភូកុងស៊ុលកិត្តិយសទាំង១១ប្រទេស ដែលបានជួបសម្ដែងការគួរសមនាពេលនេះ។ សម្ដេចតេជោរំពឹងថា តាមរយៈជំនួបនេះនឹងធ្វើឱ្យទំនាក់ទំនងរវាងប្រទេសកម្ពុជាជាមួយនឹងបណ្ដាប្រទេសទាំង១១ មានភាពរីកចម្រើនបន្ថែមទៀត។

នៅក្នុងឱកាសនោះលោកបណ្ឌិត Salah Essa ដែលជាតំណាងកុងស៊ុលកិត្តិយសបានលើកឡើង ដោយថ្លែងនូវអំណរគុណចំពោះសម្ដេចតេជោ ដែលបានដល់ឱកាសនិងអនុញ្ញាតឱ្យតំណាងកុងស៊ុលកិត្តិយសទាំង១១បានជួបសម្ដែងការគួរសមនៅវិមានព្រឹទ្ធសភានៅថ្ងៃនេះ។ លោកបណ្ឌិតក៏បានអបអរសាទរសម្ដេចតេជោ ដែលបានទទួលតួនាទីជាប្រធានព្រឹទ្ធសភានៃព្រះរាជាណាចក្រកម្ពុជា និងបង្ហាញនូវក្តីរីករាយចំពោះការអភិវឌ្ឍរបស់ប្រទេសកម្ពុជាក្រោមការដឹកនាំរបស់សម្ដេចតេជោ កាលពីនៅជានាយករដ្ឋមន្ត្រី និងភាពរីកចម្រើនរបស់កម្ពុជា  មកដល់ពេលនេះ ដែលដឹកនាំបន្តដោយសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី។

នៅក្នុងឱកាសនោះសម្ដេចតេជោប្រមុខរដ្ឋស្ដីទីបានរំលេចអំពីកិច្ចសហប្រតិបត្តិការរវាងកម្ពុជាជាមួយនឹងប្រទេសទាំង១១ ជាពិសេសគឺផ្ដោតទៅលើការធ្វើពាណិជ្ជកម្មវិនិយោគទេសចរណ៍ជាមួយនឹងបណ្ដាប្រទេសទាំងនោះ ឱ្យមានការកើនឡើងបន្ថែមទៀតដែលជាការចង់បានរបស់ប្រទេសកម្ពុជា។ សម្ដេចតេជោក៏ចង់ឱ្យប្រទេសទាំង១១នោះគឺជួយបន្ថែមទៀតដល់ប្រទេសកម្ពុជាមិនត្រឹមតែក្នុងក្របខ័ណ្ឌនៃហិរញ្ញវត្ថុប៉ុណ្ណោះទេ ក៏ប៉ុន្តែអ្វីដែលកម្ពុជាចង់បាននោះគឺការបណ្ដុះបណ្ដាលនូវធនធានខួរក្បាល គឺសំដៅទៅលើធនធានមនុស្សរបស់ប្រទេសកម្ពុជាឱ្យមានភាពល្អប្រសើរនិងកើនឡើងបន្ថែមទៀត ដែលជាក្តីចង់បានដ៏ធំបំផុតសម្រាប់ប្រទេសកម្ពុជាទាំង   មូល។

លោកបណ្ឌិត Salah Essa  ក៏បានលើកឡើងផងដែរថា លោកនឹងខិតខំប្រឹងប្រែងជាមួយនឹងតំណាងនៃកុងស៊ុលកិត្តិយសទាំង១០រូបទៀត ក្នុងការធ្វើយ៉ាងណាឱ្យការធ្វើវិនិយោគពាណិជ្ជកម្មអភិវឌ្ឍន៍សេដ្ឋកិច្ច  និងទេសចរណ៍រវាងប្រទេសកម្ពុជា ជាមួយបណ្ដាប្រទេសទាំង១១ មានការរីកចម្រើនបន្ថែមទៀត ជាពិសេសលោកនឹងខិតខំប្រឹងប្រែងក្នុងការទាក់ទាញអ្នកវិនិយោគក្នុងចំណោមប្រទេសទាំង១១នោះ មកវិនិយោគរកស៊ីធ្វើពាណិជ្ជកម្ម ឬបង្កើតនូវទេសចរណ៍នៅក្នុងប្រទេសកម្ពុជាឱ្យមានការកើនឡើងបន្ថែមទៀត។ លោកបណ្ឌិត Salah Essa ក៏បានសរសើរដែរពីលក្ខណៈអំណោយផលរបស់ប្រទេសកម្ពុជាដែលមានកត្តាសុខសន្តិភាព ក្រោមការដឹកនាំដោយសម្ដេចតេជោ ហ៊ុន សែន កន្លងទៅ និងបន្តដឹកនាំដោយសម្ដេចមហាបវរធិបតី ហ៊ុន       ម៉ាណែត នាពេលបច្ចុប្បន្ន ដែលធ្វើឱ្យប្រទេសមានសុខសន្តិភាព និងរីកការកចម្រើននិងកត្តាសន្តិសុខល្អប្រសើរថែមទៀតដែលអំណោយផលនៃបណ្ដាប្រទេសទាំង១១ មកទស្សនានៅក្នុងប្រទេសកម្ពុជាឱ្យមានការកើនឡើងបន្ថែមទៀតដែរ។

ជាការឆ្លើយតប សម្ដេចតេជោ ហ៊ុន សែន ក៏បានអរគុណអ្នកចំពោះលោកបណ្ឌិត Salah Essa ក៏ដូចជាតំណាងនៃកុងស៊ុលកិត្តិយសទាំង១០ផ្សេងទៀត ដែលបានវាយតម្លៃដោយសុទិដ្ឋិយមចំពោះការអភិវឌ្ឍនិងភាពរីកចម្រើនរបស់ប្រទេសកម្ពុជារួមទាំងកត្តាសន្តិសុខផងដែរ។ សម្ដេចតេជោក៏បានវាយតម្លៃខ្ពស់ចំពោះការលើកឡើងរបស់ប្រតិភូកុងស៊ុលកិត្តិយសដែលបានជួបសម្ដេចនៅក្នុងឱកាសនេះ ហើយសម្ដេចតេជោបានមានប្រសាសន៍បន្ថែមថា កម្ពុជារង់ចាំធ្វើការជាមួយនឹងបណ្ដាស្ថាប័នក៏ដូចជាបណ្ដានៃប្រទេសទាំង១១នោះ ដើម្បីធ្វើយ៉ាងណាជំរុញនូវវិស័យសេដ្ឋកិច្ចពាណិជ្ជកម្មទេសចរណ៍និងការវិនិយោគឱ្យកាន់តែល្អប្រសើរនៅក្នុងក្របខ័ណ្ឌរវាងកម្ពុជានិងបណ្តាប្រទេសទាំង១១។

ក្នុងជំនួបនោះដែរ សម្ដេចតេជោក៏បានចែករំលែកទស្សនៈ អំពីបញ្ហាពិភពលោកដែលកំពុងកើតមាន ដូចជាបញ្ហាសង្គ្រាមរុស្ស៊ី-អ៊ុយក្រែន បញ្ហាសង្គ្រាមពាណិជ្ជកម្មជាដើម ដែលចាំបាច់អោយភាគីទាំងអស់ត្រូវធ្វើរួមគ្នាក្នុងកិច្ចសហប្រតិបត្តិការរវាងគ្នាបន្ថែមទៀត ដើម្បីគោលដៅប្រយោជន៍នៃបណ្ដាប្រទេសទាំងសងខាងទាំងតំបន់ក៏ដូចជាពិភពលោកដែរ៕

ដោយ៖ ជឹម ណារី