AKP បន្ទាយមានជ័យ ថ្ងៃទី១៨ ខែមីនា ឆ្នាំ២០២៥ -- ដោយមានការគាំទ្រ និងផ្ដល់នូវទំនុកចិត្ដពីប្រជាជនកម្ពុជាលើគុណភាព សុវត្ថិភាព ស្ដង់ដារ និងសេវាកម្មទាន់ចិត្ដ លឿនឆាប់រហ័ស ជាពិសេសគ្រូពេទ្យដែលមានជំនាញ និងបទពិសោធន៍ផងនោះ មន្ទីរពេទ្យ រ៉ូយ៉ាល់ អង្គរ បានបើកពង្រីកសាខាថ្មី នៅក្រុងប៉ោយប៉ែត ខេត្ដបន្ទាយមានជ័យ ដើម្បីឆ្លើយតបទៅនឹងតម្រូវការក្នុងការផ្ដល់សេវាសុខាភិបាលនៅក្នុងខេត្ដឱ្យបានកាន់តែទូលំទូលាយថែមទៀត។

ថ្លែងក្នុងពិធីបើកសម្ពោធជាផ្លូវការសាខាមន្ទីរពេទ្យ រ៉ូយ៉ាល់ អង្គរ ក្រុងប៉ោយប៉ែត នាព្រឹកថ្ងៃទី១៨ ខែមីនា ឆ្នាំ២០២៥ នៅក្រុងប៉ោយប៉ែត ខេត្ដបន្ទាយមានជ័យ លោកសាស្ត្រាចារ្យ Attapoom Susupaus នាយកមន្ទីរពេទ្យ រ៉ូយ៉ាល់អង្គរបានបញ្ជាក់ថា  ការពង្រីកសាខាមន្ទីរពេទ្យ រ៉ូយ៉ាល់អង្គរនៅក្រុងប៉ោយប៉ែត ខេត្ដបន្ទាយមានជ័យនេះ គឺជាការយកចិត្ដទុកដាក់លើសុខភាព គុណភាព សុវត្ថិភាព និងការផ្ដល់នូវសេវាកម្មផ្នែកសុខាភិបាលប្រកបដោយស្ដង់ដារជូនប្រជាជនកម្ពុជាដែលមន្ទីរពេទ្យមានផ្ដល់សេវាព្យាបាលជំងឺទូទៅ សេវាសង្គ្រោះបន្ទាន់ សេវាពិគ្រោះជំងឺទូទៅ បើកចាប់ពីម៉ោង ៩៖០០នាទី ព្រឹក រហូតដល់ម៉ោង ៩៖០០នាទី យប់ ។ 

លោកសាស្រ្ដាចារ្យលើកឡើងថា មន្ទីរពេទ្យ រ៉ូយ៉ាល់អង្គរ គឺជាមន្ទីរពេទ្យមួយស្ថិតក្រោម ក្រុមហ៊ុន BDMS និងជាសាខារបស់មន្ទីរពេទ្យបាងកក ប្រចាំនៅខេត្ដសៀមរាប ហើយ សម្រាប់ប្រជាពលរដ្ឋដែលរស់នៅក្រុងប៉ោយប៉ែត អាចមកពិគ្រោះជំងឺ ឬមកទទួលសេវាព្យាបាលជំងឺប្រកបដោយស្កង់ដារខ្ពស់ និងមានគុណភាព គឺអាចមកមន្ទីរពេទ្យ រ៉ូយ៉ាល់អង្គរ បាន។ លោកសាស្រ្ដាចារ្យក៏បានអះអាងថា ការព្យាបាលនៅមន្ទីរពេទ្យ រ៉ូយ៉ាល់អង្គរសាខាប៉ោយប៉ែតនេះ គឺមានគុណភាពដូចគ្នាទៅនឹងការព្យាបាលនៅមន្ទីរពេទ្យ រ៉ូយ៉ាល់អង្គរ ក្នុងខេត្ដសៀមរាបដែរ ប៉ុន្ដែគ្រាន់តែសេវាមិនមានច្រើនមុខដូចនៅមន្ទីរពេទ្យធំ ក្នុងខេត្ដសៀមរាបទេ ខណៈដែលករណីមួយចំនួនមិនសូវធ្ងន់ធ្ងរ អាចព្យាបាលនៅមន្ទីរពេទ្យ រ៉ូយ៉ាល់អង្គរ សាខាក្រុងប៉ោយប៉ែតបាន។ ចំពោះគុណភាពថ្នាំ និងគុណភាពគ្រូពេទ្យវិញគឺផ្ដល់សេវាកម្មប្រកបដោយស្ដង់ដារដូចការព្យាបាលនៅក្នុងមន្ទីរពេទ្យ រ៉ូយ៉ាល់អង្គរ សៀមរាប ឬមន្ទីរពេទ្យបាងកក ប្រទេសថៃ ឬក៏មន្ទីរពេទ្យ រ៉ូយ៉ាល់ភ្នំពេញ នៅរាជធានីភ្នំពេញដូចគ្នា។

លោកសាស្ត្រាចារ្យ Attapoom Susupaus បានបញ្ជាក់បន្ថែមថា មន្ទីរពេទ្យ រ៉ូយ៉ាល់អង្គរ គឺជាមន្ទីរពេទ្យក្នុងស្រុកមួយដែលបាននិងកំពុងប្រើប្រាស់ឧបករណ៍ និងបរិក្ខារពេទ្យទំនើបៗ បច្ចេកវិទ្យាទាន់សម័យ ប្រកបដោយគុណភាពស្ដង់ដារអន្ដរជាតិ ធានាសុវត្ថិភាព សេវាកម្មសម្បូរបែប តម្លៃសមរម្យ ជាមួយគ្រូពេទ្យដែលមានជំនាញ និងបទពិសោធន៍ច្រើនឆ្នាំក្នុងវិស័យពេទ្យ និងសុខាភិបាល។
សូមជម្រាបជូនថា មន្ទីរពេទ្យ រ៉ូយ៉ាល់ អង្គរ គឺជាមន្ទីរពេទ្យដែលផ្តល់ជូននូវការថែរក្សាសុខភាព ដ៏ល្អប្រសើរជាមួយនឹងគុណភាពកម្រិត ស្តង់ដារអន្តរជាតិ ដែលទទួលបានសេចក្តីទុកចិត្ត និងសេចក្តីពេញចិត្តពីប្រជាជនកម្ពុជា ជនបរទេស និងអ្នកទេសចរ ដែលបានមកដល់ប្រទេសកម្ពុជា និងមានឆន្ទៈយ៉ាងមោះមុតក្នុងការផ្តល់ជូននូវគុណភាពសេវាកម្ម និងវេជ្ជសាស្រ្តដ៏ល្អបំផុត ដូចគ្នាទៅនឹងមន្ទីរពេទ្យ បាងកក ប្រទេសថៃ ៕

ដោយ៖ រិទ្ធី