AKP ភ្នំពេញ ថ្ងៃទី១៨ ខែមីនា ឆ្នាំ២០២៥-- មន្ត្រីក្រសួងថាមពលសហរដ្ឋអាមេរិកបានថ្លែងថា បើទោះបីជាមានការផ្លាស់ប្តូររដ្ឋបាលនាពេលថ្មីៗនេះ នៅក្នុងសហរដ្ឋអាមេរិកយ៉ាងណាក្តី ក៏ការិយាល័យស៊ើបអង្កេត និងទប់ស្កាត់ការរត់ពន្ធនុយក្លេអ៊ែរ (Nuclear Smuggling Detection and Deterrence Program) ហៅកាត់ថា NSDD របស់អាមេរិក នៅតែប្តេជ្ញាចិត្តចំពោះបេសកកម្មប្រឆាំងការរត់ពន្ធនុយក្លេអ៊ែរ និងភាពជាដៃគូរបស់NSDD ជាមួយអាជ្ញាធរជាតិអាវុធគីមីកម្ពុជា។ ការធានាអះអាងនេះបានធ្វើឡើងក្នុងជំនួបកិច្ចប្រជុំរបស់អគ្គលេខាធិការដ្ឋានអាជ្ញាធរជាតិអាវុធគីមី ជាមួយប្រតិភូNSDD កាលពីថ្ងៃទី១៧ ខែមីនា ឆ្នាំ២០២៥ នៅទីស្តីការក្រសួងការពារជាតិ។

លោក Benjamin Lee ប្រធានគម្រោងNSDD បានបន្តថា យើងបានផ្តល់តម្លៃលើការងារ និងទទួលស្គាល់តួនាទីសំខាន់របស់អាជ្ញាធរអាវុធគីមីកម្ពុជា ហើយវត្តមានរបស់យើងនៅទីនេះ គឺជាសក្ខីភាពមួយចំពោះការប្តេជ្ញាចិត្តរបស់NSDD ក្នុងការជំរុញភាពជាដៃគូនេះទៅថ្ងៃអនាគត។

ក្នុងជំនួបនោះ ឯកឧត្តម នាយឧត្តមសេនីយ៍ បណ្ឌិត ផន ណារ៉ា អគ្គលេខាធិការអាជ្ញាធរជាតិអាវុធគីមី បានសម្ដែងការស្វាគមន៍យ៉ាងកក់ក្តៅចំពោះប្រតិភូ NSDD ដែលអញ្ជើញបានមកដល់កម្ពុជា និងបាននាំមកនូវក្តីសង្ឃឹមជាគោលការណ៍ ក្នុងការបន្តកិច្ចសហប្រតិបត្តិការណ៍តទៅអនាគត ដោយបានគូសបញ្ជាក់ថា ឯកឧត្តម និងសហការីទាំងអស់ ត្រៀមខ្លួនជានិច្ចដើម្បីសហការ និងធ្វើអ្វីៗដែលអាចធ្វើបាន ដើម្បីជោគជ័យនៃកិច្ចសហប្រតិបត្តិការ។

គួរបញ្ជាក់ថា កម្មវិធីស្រាវជ្រាវ និងទប់ស្កាត់ការរត់ពន្ធនុយក្លេអ៊ែរ (NSDD) គឺជាគំនិតផ្តួចផ្តើមរបស់ក្រសួងថាមពលសហរដ្ឋអាមេរិក ដែលមានគោលបំណងពង្រឹងសមត្ថភាពអន្តរជាតិ ក្នុងការស្វែងរកបង្ក្រាប និងស៊ើបអង្កេត ការជួញដូរខុសច្បាប់នៃសារធាតុនុយក្លេអ៊ែរ និងសារធាតុវិទ្យុសកម្ម ដោយរារាំងមិនឱ្យមានការប្រើប្រាស់សារធាតុនេះ ក្នុងអំពើភេរវកម្មជាដាច់ខាត។ បេសកកម្មរបស់ (NSDD) គឺដើម្បីពង្រឹងសមត្ថភាពរបស់អាជ្ញាធរប្រទេសជាដៃគូ ក្នុងការស្វែងរក បង្ក្រាប និងស៊ើបអង្កេត ការជួញដូរដោយខុសច្បាប់នូវសារធាតុនុយក្លេអ៊ែរ និងសារធាតុវិទ្យុសកម្ម។ បេសកកម្មនេះ រួមបញ្ចូលទាំងការផ្តល់ឱ្យប្រទេសជាដៃគូ (NSDD) ជាមួយនឹងប្រព័ន្ធរាវរកវិទ្យុសកម្ម ឧបករណ៍រាវរកវិទ្យុសកម្ម ប្រព័ន្ធទំនាក់ទំនង ឧបករណ៍សន្តិសុខ និងឧបករណ៍សុវត្ថិភាព ដើម្បីកាត់បន្ថយការគំរាមកំហែងនៃការរីកសាយភាយ និងការវាយប្រហារភេរវករ ដែលពាក់ព័ន្ធនឹងសម្ភារនុយក្លេអ៊ែរ។ តាមរបៀបវារៈដែលបានគ្រោងទុក ភាគីទាំងពីរនឹងបន្តជួបគ្នារហូតដល់ថ្ងៃទី២០ ខែមីនា ដើម្បីស្វែងយល់ពីគ្នាទៅវិញទៅមក ដោយរួមមានទស្សនកិច្ចនៅវិទ្យាស្ថានស្រាវជ្រាវ និងសាកល្បងអាវុធគីមីនៅលង្វែកផងដែរ៕

ដោយ សំ សាម៉ន