AKP ព្រះសីហនុ ថ្ងៃទី១៨ ខែមីនា ឆ្នាំ២០២៥-- ឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ និងលោកជំទាវ បានអញ្ជើញសំណេះសំណាល និងពិសាអាហារស្រាយបួសខែរ៉ាម៉ាឌននៃសាសនាឥស្លាមកម្ពុជាខេត្តព្រះសីហនុ នៅភូមិអូរត្រាវ ឃុំអណ្តូងថ្ម ស្រុកព្រៃនប់ ដោយមានការចូលរួមពីឯកឧត្តមតំណាងរាស្ត្រខេត្តព្រះសីហនុ លោក លោកស្រី អភិបាលរងខេត្ត លោកអភិបាលស្រុកព្រៃនប់ បងប្អូនសាសនិកឥស្លាម នារសៀលថ្ងៃទី១៧ ខែមីនា ឆ្នាំ២០២៥។

ឯកឧត្តម ម៉ាង ស៊ីណេត បានថ្លែងថា ពិធីពិសាអាហារស្រាយបួសខែរ៉ាម៉ាឌនរបស់សាសនាឥស្លាមកម្ពុជាខេត្តព្រះសីហនុលើកទី៣ ឆ្នាំ២០២៥ គឺជាការផ្តល់ឱកាសសម្រាប់ជួបប្រាស្រ័យទាក់ទងគ្នាកាន់តែជិតស្និទ្ធ ផ្លាស់ប្តូរគំនិតយោ បល់ ការចែករំលែកបទពិសោធន៍ល្អៗ និងការពង្រឹងកិច្ចសហប្រតិបត្តិការរួមចំណែកដល់ការលើកស្ទួយសុខដុមនីយកម្មវិស័យឥស្លាមសាសនានៅកម្ពុជា សំដៅរក្សានូវសុខសន្តិភាព ស្ថិរភាព សុវត្ថិភាពទាំងផ្លូវកាយ ផ្លូវចិត្ត និងស្មារតីនៅក្នុងការអភិវឌ្ឍសង្គម និងសេដ្ឋ កិច្ចជាតិ ប្រកបដោយក្តីមេត្តាករុណារវាងសហគមន៍ឥស្លាមខេត្ត។ ពិធីដ៏មានអត្ថន័យនេះបានបង្ហាញឱ្យឃើញពីសាមគ្គីភាព ការយោគយល់គ្នា ការរស់នៅជាមួយគ្នា ក្នុងគោលបំណងឱ្យមានអារម្មណ៍ជិតសិ្នទ្ធជាមួយព្រះជាម្ចាស់ចំណាយពេលវេលាជាមួយក្រុមគ្រួសារ និងមនុស្សជាទីស្រឡាញ់ ចូលរួមក្នុងសកម្មភាពសប្បុរសធម៌ និងរំលឹកដល់មនុស្សដែលមានវាសនាមិនល្អ។

ឯកឧត្តមអភិបាលខេត្ត បានកោតសរសើរ និងថ្លែងអំណរគុណចំពោះគណៈអ៊ីមុំាខេត្ត ក្រុង ស្រុក គណៈអ៊ីមុំាម៉ាស្ជិទ (ហាកឹម) គ្រូបង្រៀនឥស្លាម និងបងប្អូនសាសនិកឥស្លាមនៅទូទាំងខេត្តព្រះសីហនុ តែងតែចូលរួមចំណែកជាមួយអាជ្ញាធរដែនដីគ្រប់លំដាប់ថ្នាក់ ក្នុងការថែរក្សានូវសុខសន្តិភាព សុខដុមនីយកម្មជាតិសាសន៍ សាសនាក្នុងមូលដ្ឋាន និងនៅទូទាំងខេត្ត ជាពិសេសចូលរួមពន្លឿនការអភិវឌ្ឍខេត្តព្រះសីហនុឱ្យក្លាយទៅជាតំបន់សេដ្ឋកិច្ចពិសេសគំរូពហុបំណង។

ទន្ទឹមនឹងនេះ ឯកឧត្តមអភិបាលខេត្តបានបញ្ជាក់ថា រាជរដ្ឋាភិបាលបានបើកទូលាយឱ្យបងប្អូនខ្មែរឥស្លាម តាមរយៈការអនុញ្ញាតឱ្យសិស្ស និស្សិតឥស្លាមស្លៀកសំលៀកបំពាក់ប្រពៃណីនៅតាមគ្រឹះស្ថានសិក្សាគ្រប់កម្រិត និងការរៀបចំកន្លែងថ្វាយបង្គំនៅតាមទីសាធារណៈជាដើម។ ទន្ទឹមនឹងនេះ សម្តេចតេជោ ប្រធានព្រឹទ្ធសភា ក៏បានរៀបចំឱ្យមានការបង្កើតគណៈដឹកនាំជាន់ខ្ពស់នៃសាសនាឥស្លាមកម្ពុជា ដែលជាស្ថាប័នកំពូលឥស្លាម និងបានផ្តល់តួនាទីជាន់ខ្ពស់ដល់ថ្នាក់ដឹកនាំសហគមន៍ខ្មែរឥស្លាមជាច្រើនរូបនៅតាមក្រសួងស្ថាប័នទាំងថ្នាក់ជាតិ និងថ្នាក់ក្រោមជាតិ។ ម៉្យាងទៀតរាជរដ្ឋាភិបាលបានផ្តល់ថវិកា និងក្របខ័ណ្ឌគ្រូបង្រៀនដល់សហគមន៍ខ្មែរឥស្លាម ដើម្បីកាត់បន្ថយបន្ទុកចំណាយ និងលើកកម្ពស់កម្រិតជីវភាពរបស់សហគមន៍ និងគ្រួសារបងប្អូនខ្មែរឥស្លាមតាមរយៈការលើកកម្ពស់ការអប់រំ ការបណ្តុះបណ្តាលធនធានមនុស្ស ក្នុងវិស័យសាសនា បច្ចេកវិទ្យា និងនាវានុវត្តន៍។

ឯកឧត្តមអភិបាលខេត្តក៏បានលើកទឹកចិត្ត និងផ្តល់ទស្សនៈមួយចំនួនដូចជា៖ ទី១. ថ្នាក់ដឹកនាំ និងសាសនិកឥស្លាមទាំងអស់បន្តធ្វើទំនាក់ទំនងល្អ ជាមួយសាសនាដទៃទៀតទាំងក្នុងថ្នាក់ជាតិ និងអន្តរជាតិ ដោយឈរលើគោលការណ៍សុខុដុមនីយកម្មជាតិសាសន៍នៅក្នុងខេត្តព្រះសីហនុ។ ២.សូមបន្តរៀបចំដឹកនាំកិច្ចការសាសនាក្នុងសហគមន៍ខ្មែរឥស្លាម តាមរយៈកិច្ចសហការជិតស្និទ្ធជាមួយមន្ទីរធម្មការ និងសាសនា និងអាជ្ញាធរមានសមត្ថកិច្ចគ្រប់លំដាប់ថ្នាក់។ ទី៣. អាជ្ញាធរមានសមត្ថកិច្ចត្រូវជួយសម្រួលលើការសាងសង់សាលារៀន វិហារឥស្លាម សូរ៉ាវជូនបងប្អូនខ្មែរឥស្លាម និងការកសាងទីកន្លែងប្រតិបត្តិសាសនានៅតាមបណ្ដាភូមិស្របតាមក្រឹត្យក្រមច្បាប់សាសនាឥស្លាម។ ៤. បង្កើនសកម្មភាពសង្គមតាមរយៈកិច្ចការងារមនុស្សធម៌ អប់រំ ការអភិវឌ្ឍសកម្មភាពសាសនាដោយឈរលើគោលការណ៍នៃជំនឿឥស្លាម និងគោរពតាមរដ្ឋធម្មនុញ្ញនៃព្រះរាជាណាចក្រកម្ពុជា។ទី៥. ការជឿជាក់លើការដឹកនាំរបស់រាជរដ្ឋាភិបាល ក៏ដូចជារដ្ឋបាលខេត្តព្រះសីហនុ ធានាសិទ្ធិសេរីភាពខាងសាសនាឥស្លាម តាមរយៈសាមគ្គីភាពជាមួយអ្នកកាន់សាសនានានា ដើម្បីភាពសុខដុមនីយកម្មផ្នែកសាសនា។ ទី៦. បន្តកិច្ចសហប្រតិបត្តិការជាតិ-អន្តរជាតិដើម្បីកៀរគរថវិកា និងបច្ចេកទេសសម្រាប់គាំទ្រសកម្មភាពអភិវឌ្ឍសង្គម និងសហគមន៍ខ្មែរឥស្លាម៕

ដោយ ងូ សុមុនី