AKP ភ្នំពេញ ថ្ងៃទី១៥ ខែមីនា ឆ្នាំ២០២៤ -- ក្រសួងមុខងារសាធារណៈ បានប្រារព្ធពិធីអបអរសាទរទិវានារីអន្តរជាតិលើកទី១១៤ ក្រោមប្រធានបទ «សិទ្ធិ សមភាព និងភាពអង់អាចចំពោះស្រ្តី និងក្មេងស្រីគ្រប់រូប» ក្រោមអធិបតីដ៏ខ្ពង់ខ្ពស់របស់ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានកិត្តិយសគណៈកម្មការសាខាសមាគមន៍នារីកម្ពុជាដើម្បីសន្តិភាព និងអភិវឌ្ឍន៍ក្រសួងមុខងារសាធារណៈ កាលពីព្រឹកថ្ងៃទី១៤ ខែមីនា ឆ្នាំ២០២៥។ ពិធីនេះមានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រី ជាថ្នាក់ដឹកនាំ ព្រមទាំងមន្រ្តីរាជការនៃក្រសួងមុខងារសាធារណៈសរុបចំនួន ២៥០រូប។

នាឱកាសនៃពិធីអបអរសាទរទិវានារីអន្តរជាតិនោះ លោកជំទាវ សៅ សុគន្ធារី រដ្ឋលេខាធិការ និងជាប្រធានក្រុមការងារយេនឌ័រនៃក្រសួងមុខងារសាធារណៈ បានធ្វើរបាយការណ៍ និងបង្ហាញលទ្ធផលសង្ខេបសំខាន់ៗរបស់ក្រុមការងារយេនឌ័រនៃក្រសួងមុខងារសាធារណៈ ក្នុងការលើកកម្ពស់សមភាពយេនឌ័រនៅក្នុងវិស័យមុខងារសាធារណៈទាំងមូល។ ទន្ទឹមនេះដែរ លោកជំទាវបានប្ដេជ្ញាចិត្តបន្តអភិវឌ្ឍន៍ការងារ និងសមត្ថភាពស្រ្តីឱ្យកាន់តែមានការរីកចម្រើនលូតលាស់ទៅមុខទៀត ស្របតាមពាក្យស្លោក «ស្ត្រីជាឆ្អឹងខ្នងសេដ្ឋកិច្ចជាតិ»។

ក្រោយបានស្តាប់របាយការណ៍របស់លោកជំទាវរដ្ឋលេខាធិការរួច ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ បានថ្លែងអំណរគុណ កោតសរសើរ និងវាយតម្លៃខ្ពស់ចំពោះក្រុមការងារ និងមន្រ្តីរាជការជាស្រ្តី ដែលបានខិតខំប្រឹងប្រែងបំពេញភារកិច្ចយ៉ាងមោះមុតក្នុងការដឹកនាំ គ្រប់គ្រង និងអភិវឌ្ឍន៍វិស័យមុខងារសាធារណៈ។

ឯកឧត្តមឧបនាយករដ្ឋមន្រ្តីបានមានប្រសាសន៍បន្ថែមថា រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានកំណត់ការលើកកម្ពស់សមភាពយេនឌ័រ និងការបង្កើនភាពអង់អាចរបស់ស្រ្តី និងក្មេងស្រីក្នុងគ្រប់វិស័យជាកត្តាអាទិភាពនៅក្នុងរបៀបវារៈគោលនយោបាយ និងយុទ្ធសាស្រ្តបញ្ចកោណ ដំណាក់កាលទី១ តាមរយៈការពង្រឹងភាពជាពលរដ្ឋក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន ដែលក្នុងនោះ «ស្រ្តីគឺជាស្នូល»។

ក្រសួងមុខងារសាធារណៈតែងតែយកចិត្តទុកដាក់ខ្ពស់ក្នុងការរៀបចំ និងគ្រប់គ្រងអាជីពមន្ត្រីរាជការស៊ីវិលទាំងនៅតាមក្រសួង ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ ដែលតែងតែផ្តល់អាទិភាព និងលើកទឹកចិត្តដល់មន្រ្តីរាជការស៊ីវិលជាស្រ្តី ដើម្បីចូលរួមចំណែកជាមួយរាជរដ្ឋាភិបាលក្នុងការលើកកម្ពស់សមភាពយេនឌ័រ៕

ដោយ ៖ពេជ្រ សំអឿន(ប្រភព៖ ក្រសួងមុខងារសាធារណៈ)