AKP កំពង់ស្ពឺ ថ្ងៃទី១៥ ខែមីនា ឆ្នាំ២០២៤ -- សហគមន៍កសិកម្ម និងគម្រោងពិពិធកម្មកសិកម្មកម្ពុជា (CASDP) បានចុះកិច្ចព្រមព្រៀងហិរញ្ញប្បទានឥតសំណងបំពេញបន្ថែមលើទុនវិនិយោគ ក្រោមអធិបតីភាព លោក ណុប សុភឿន ប្រធានគ្រប់គ្រងគម្រោងពិពិធកម្មកសិកម្មកម្ពុជា តំណាងឯកឧត្តម ឃឹម ហ្វីណង់ អនុរដ្ឋលេខាធិការនៃក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោងពិពិធកម្មកសិកម្មកម្ពុជា និងលោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺ។

ពិធីចុះហត្ថលេខាលើកិច្ចព្រមព្រៀងហិរញ្ញប្បទានឥតសំណងបំពេញបន្ថែមលើទុនវិនិយោគនេះ ត្រូវបានប្រារព្ធធ្វើឡើងនៅទីស្នាក់ការសហគមន៍កសិកម្មរីកចម្រើនទួលអំពិល ស្ថិត នៅភូមិសង្គ្រាមបូរណ៍ ឃុំទួលអំពិល ស្រុកបសេដ្ឋ ខេត្តកំពង់ស្ពឺ ដោយមានការអញ្ជើញចូលរួមពីលោកអភិបាលរងស្រុក និងលោក លោកស្រី តំណាងភ្នាក់ងារអនុវត្តគម្រោងនៃក្រសួងកសិកម្ម រុក្ខាប្រមាញ់ និងនេសាទ ក្រសួងធនធានទឹក និងឧតុនិយម ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ តំណាងអង្គភាពជំនាញ អាជ្ញាធរដែនដី ថ្នាក់ដឹកនាំសហគមន៍កសិកម្ម និងសមាជិកក្រុមផលិត។

នៅក្នុងឱកាសនោះ លោក យឹម ណន បានមានប្រសាសន៍ថា ផែនការធុរកិច្ចនេះត្រូវបានរៀបចំឡើងដោយសហគមន៍ និងមានការចូលរួមពីក្រុមផលិតចំនួន ៤៧គ្រួសារ ដែលបានគ្រោងសាងសង់ផ្ទះសំណាញ់ចំនួន ១០៣ខ្នង ក្នុងគោលដៅទទួលបានប្រាក់ចំណេញសម្រាប់សហគមន៍ និងក្រុមផលិតក្នុងចំនួនទឹកប្រាក់ជាមធ្យម ៦១.៧៨៥ដុល្លារអាម៉េរិក និង ៣២៩.៦០២ដុល្លារអាម៉េរិកសម្រាប់រយៈពេល ៣ឆ្នាំ។ ជាមួយគ្នានោះដែរ លោក យឹម ណន បានធ្វើការណែនាំ និងលើកទឹកចិត្តដល់មន្ត្រីកសិកម្មគ្រប់លំដាប់ថ្នាក់ឱ្យខិតខំប្រឹងប្រែងធ្វើការងារឱ្យបានល្អក្នុងការបម្រើកសិករតាមសហគមន៍ ជាពិសេសជម្រុញការកាត់បន្ថយថ្លៃដើម និងការផលិតកសិផលប្រកបដោយគុណភាពដោយផ្សារភ្ជាប់មកទីផ្សារដើម្បីកសិករយើងទទួលបានប្រាក់ចំណូលខ្ពស់៕

ដោយ៖ លឹម សាន្ត