AKP កំពង់ធំ ថ្ងៃទី១៥ ខែមីនា ឆ្នាំ២០២៤ -- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង ប្រធានសមាគមអតីតយុទ្ធជនកម្ពុជាខេត្តកំពង់ធំ ត្រូវបានអមដំណើរដោយលោក ជួន សិលាវ៉ិត ប្រធានមូលនិធិជំនួយសង្គមនៃមន្ទីរសង្គមកិច្ចខេត្តកំពង់ធំ កាលពីព្រឹកថ្ងៃទី១៥ ខែមីនា ឆ្នាំ២០២៥ ដោយបានដឹកនាំសហការីនៃសមាគមអតីតយុទ្ធជនកម្ពុជាខេត្ត រួមជាមួយថ្នាក់ដឹកនាំនៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានគោរពវិញ្ញាណក្ខន្ធ និងចូលរួមក្នុងពិធីបុណ្យសពលោកអនុសេនីយ៍ឯក ថុន ស៊ីធឿន អាយុ ៥៩ឆ្នាំ ដែលបានទទួលមរណភាពនៅវេលាម៉ោង៥:៥០នាទីព្រឹកថ្ងៃទី១៥ ខែមីនា ឆ្នាំ២០២៥ ដោយរោគាពាធ នៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។ 

ឧត្តមសេនីយ៍ទោ សោម ស៊ុន បានថ្លែងនូវការសោកស្ដាយ និងអាឡោះអាល័យជាពុនពេកចំពោះការបាត់បង់លោកអនុសេនីយ៍ឯក ថុន ស៊ីធឿន អតីតប្រធានកងអនុសេនាធំស៊ើបការណ៍នៃយោធាខេត្តកំពង់ធំដែលធ្លាប់ជាសហការី និងជាយុទ្ធមិត្តដ៏ល្អក្នុងសម័យសង្គ្រាមនាទសវត្សរ៍ឆ្នាំ១៩៩០ ដោយធ្លាប់បានចូលរួមប្រយុទ្ធជាច្រើនសមរភូមិក្នុងភារកិច្ចការពារទប់ស្កាត់មិនឱ្យរបបប្រល័យពូជសាសន៍ប៉ុលពត អៀងសារី ខៀវសំផន វិលត្រឡប់មកវិញបាន និងបានចូលរួមចំណែកអនុវត្តនូវនយោបាយឈ្នះ-ឈ្នះជាមួយ សម្ដេចអគ្គមហាសេនាបតីតេជោ ហ៊ុន សែន ដែលបានបញ្ចប់សង្គ្រាមស៊ីវីលដ៏រាំរ៉ៃនៅកម្ពុជា ដោយបាននាំមកនូវសន្តិភាព និងការឯកភាពជាតិពេញលេញនៅចុងឆ្នាំ១៩៩៨។

ឧត្តមសេនីយ៍ទោ សោម ស៊ុន និងសហការី បានគោរពវិញ្ញាណក្ខន្ធ និងបានសូមបួងសួងដល់វិញ្ញាណក្ខន្ធលោកអនុសេនីយ៍ឯក ថុន ស៊ីធឿន បានទៅកាន់សុគតិភពកុំបីឃ្លៀងឃ្លាតឡើយនិងបាននាំយកនូវថវិកាបេឡាមរណៈសង្គ្រោះចំនួន ៤លានរៀល និងស្បៀងអាហារ គ្រឿងឧបភោគបរិភោគ រួមមានអង្ករចំនួន ១០០គីឡូក្រាម មីជាតិចំនួន ៤កេស ត្រីខកំប៉ុងចំនួន ៤យួរ និងទឹកត្រី ទឹកស៊ីអ៊ីវចំនួន ៤យួរ ដែលជាអំណោយរបស់ សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដើម្បីចូលរួមក្នុងពិធីបុណ្យសព ព្រមទាំងបានរំលែកទុក្ខជាមួយក្រុមគ្រួសារសពនៅពេលនោះផងដែរ៕

ដោយ៖ ស៊ុម វណ្ណា (ប្រភព៖ តំបន់សឹករងកំពង់ធំ)