AKP ភ្នំពេញ ថ្ងៃទី១៤ ខែមីនា ឆ្នាំ២០២៥--អង្គការ CI និង រាជរដ្ឋាភិបាល គាំទ្រសហគមន៍ព្រៃឡង់ ដើម្បីបង្កើតវិធីសាស្រ្តចិញ្ចឹមជីវិតប្រកបដោយនិរន្តរភាព ។ ដែនជម្រកសត្វព្រៃព្រៃឡង់ គឺជាព្រៃវាលទំនាបត្រូពិចចុងក្រោយ និងធំជាងគេបំផុតក្នុងចំណោមព្រៃវាលទំនាបនៅតំបន់អាស៊ីអាគ្នេយ៍ ។ 

ប្រភពពី អង្គការ CI បានឱ្យថឹងនៅរសៀលថ្ងៃទី១៣ ខែមីនា ឆ្នាំ២០២៥ថា អង្គការអភិរក្សអន្តរជាតិ កម្ពុជា (អង្គការ CI) សហការជាមួយរាជរដ្ឋាភិបាលកម្ពុជា និងដៃគូសំខាន់នានា គាំទ្រសហគមន៍ព្រៃឡង់ ដើម្បីបង្កើតវិធីសាស្រ្តចិញ្ចឹមជីវិតប្រកបដោយនិរន្តរភាព ខណៈបន្តរក្សាការពារធនធានធម្មជាតិដែលពួកគាត់ពឹងអាស្រ័យ។ កិច្ចអភិរក្សក្នុងភាពជាដៃគូនេះ ក៏រួមមានដំណោះស្រាយហិរញ្ញប្បទានអភិរក្សផង មានគោលបំណងរក្សាធនធានសំខាន់ៗសម្រាប់បច្ចុប្បន្ន និងអនាគត។ 

តាមរយៈការវិនិយោគលើការអភិរក្សនៅដែនជម្រកសត្វព្រៃនេះ យើងអាចធានាបាននូវអនាគតដែលមនុស្សអាចរួមរស់ជាមួយធម្មជាតិបានតជំនាន់ទៅមុខទៀត ៕

ដោយ៖ ណយ នឿន (ប្រភព៖CI)