AKPភ្នំពេញថ្ងៃទី១២ ខែ មីនា ឆ្នាំ ២០២៥ -- ការពង្រឹងវិន័យការងារ និងវិជ្ជាជីវៈរបស់ចៅក្រម ព្រះរាជអាជ្ញា ក្រឡាបញ្ជី អាជ្ញាសាលា និងមន្រ្តីរាជការទាំងអស់នៅក្នុងវិស័យយុត្តិធម៌គឺជាការងារអាទិភាពមួយដែលត្រូវអនុវត្តឱ្យបានម៉ឺងម៉ាត់ ឱ្យបានតឹងរឹង និងគ្មានការយោគយល់ចំពោះអ្នកដែលល្មើសវិន័យឡើយ។នេះជាការបញ្ជាក់ពីសំណាក់ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌។

ថ្លែងក្នុងសន្និបាតបូកសរុបលទ្ធផលការងារវិស័យយុត្តិធម៌ឆ្នាំ២០២៤ និងកំណត់ទិសដៅការងារជាអាទិភាពឆ្នាំ២០២៥ នារសៀលថ្ងៃទី១២ ខែមីនា ឆ្នាំ ២០២៥ នៅសណ្ឋានគារសុខាភ្នំពេញ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌បានឱ្យដឹងថាតាមរយៈឧត្តមក្រុមប្រឹក្សានៃអង្គចៅក្រមនាកន្លងមកថ្មីៗមកនេះ បានសម្រេចដាក់ពិន័យចំពោះចៅក្រម និងព្រះរាជអាជ្ញាសរុបចំនួន២៣ករណីក្នុងនោះចៅក្រមចំនួន១៤ករណីនិងព្រះរាជអាជ្ញាចំនួន១៤ករណី។ការដាក់ពិន័យនាពេលនេះមានលក្ខណៈតឹងរឹង និងរហូតដល់មានការផ្លាស់ប្តូរដោយបង្ខំមួយករណី និងតម្រូវឱ្យបណ្តុះបណ្តាលបន្ថែមចំនួន២ករណី ការផ្លាស់ប្តូរបង្ខំ និងទម្លាក់ឋានៈមួយករណី ការព្យួរការងារ មិនឱ្យមានប្រាក់បៀវត្យចំនួន៦ខែជាដើម។

ឯកឧត្តម ឧបនាយករដ្ឋមន្រ្តី កើត រិទ្ធ បានបង្ហាញការគាំទ្រដល់ក្រុមប្រឹក្សាវិន័យនៃឧត្តមក្រុមប្រឹក្សាអង្គចៅក្រមដែលបានសម្រេចចិត្ត ដាក់វិធានការវិន័យដោយភាពម៉ឺងម៉ាត់ និងមិនលើកលែងចំពោះចៅក្រម ព្រះរាជអាជ្ញា ដែលបានប្រព្រឹត្តិខុសច្បាប់ និងថែមទាំងបានប្រព្រឹត្តិខុសក្រមសីលធម៌ និងបានជំរុញឱ្យអនុវត្តវិធានការនេះកាន់តែមានប្រសិទ្ធភាពបន្ថែមទៀតដើម្បីសំដៅលើកកម្ពស់ កិត្តិយស និងសេចក្តីថ្លៃថ្នូរនៃអង្គចៅក្រម និងក៏ដូចជាសំដៅលើកកម្ពស់ ជំនឿទុកចិត្តរបស់សាធារណៈជន មកលើវិស័យយុត្តិធម៌នៅកម្ពុជា។

ឯកឧត្តម ឧបនាយករដ្ឋមន្រ្តី កើត រិទ្ធបានថ្លែងដែរថា៖”បើបមានបញ្ហាប្រឈមយើងត្រូវទទួលស្គាល់ការពិត។ឥឡូវយើងហ៊ានទទួលការពិតទៀតបើរឿងក្តីនោះទទួលរងអយុត្តិធម៌។ យើងត្រូវទទួលយកការពិតនេះមកធ្វើការដោះស្រាយ ។ពេលនេះយុទ្ធនាការដែលយើងបានដាក់ចេញជាយុទ្ធនាការទី២ ហើយក៏ស្ថិតនៅក្នុងវិធានគន្លឹះទី៥របស់សម្តេចមហាបវរធិបតី គឺជាការសម្រេចចិត្តខាងនយោបាយមួយថាវិស័យយុត្តិធម៌របស់យើងត្រូវតែប្រឈមជាមួយបញ្ហាដើម្បីដោះស្រាយបញ្ហានោះ មិនរត់គេចពីបញ្ហានោះទេ។អញ្ចឹងយើងបើកទ្វារចំហ។ កុំឱ្យគេរត់ទៅកន្លែងនេះកន្លែងនោះ។ អញ្ចឹង!បើមានរឿងអយុត្តិធម៌សូមមកដាក់ពាក្យប្តឹងនៅកន្លែងនេះដែលជាយុទ្ធនាការទី២របស់យើង គឺយើងនឹងទទួលយកពាក្យបណ្តឹងទាំងអស់ យកមកចាត់ការ។ដូចយើងនិយាយហើយបើពិនិត្យឃើញថាអយុត្តិធម៌គឺគ្មានរឿងអ្វីក្រៅពីធ្វើរឿងនោះឱ្យយុត្តិធម៌វិញនោះទេ។ខិតខំរកវិធីដើម្បីដោះស្រាយ។ សម្រាប់អ្នកដែលសម្រេចដោយអយុត្តិធម៌ត្រូវឆ្លើយតបនឹងភាពម៉ឺងម៉ាត់មួយទាំងផ្នែកខាងវិន័យ និងផ្នែកផ្លូវច្បាប់ ដែលយើងត្រូវតែធ្វើ។ទោះបីយ៉ាងណាផ្ទុយទៅវិញបើសិនការចោទប្រកាន់ទៅលើតុលាការមិនត្រឹមត្រូវថាតុលាការអយុត្តិធម៌ ប៉ុន្តែយើងរកឃើញថាតុលាការមិនបានធ្វើរឿងនោះខុសទេ ហើយធ្វើត្រឹមត្រូវតាមច្បាប់ យើងត្រូវធ្វើការដោះស្រាយរឿងនោះដែរ មានន័យថាយើងត្រូវតែហ៊ានការពារ ។ពោលគឺខុសយើងហ៊ានកែ ត្រឹមត្រូវយើងហ៊ានការពារ នេះហើយដែលជាជំហយើងប្រកាន់យកក្នុងការអនុវត្តយុទ្ធនាការទាំង២ររបស់យើង។

ឯកឧត្តម ជីវ កេង ប្រធានតុលាការកំពូលបានថ្លែងក្នុងពិធីនេះដែរថាកន្លងមកចៅក្រម ព្រះរាជអាជ្ញា យ៉ាងច្រើន គេសង្កេតឃើញថាបានអនុវត្តការងារបានត្រឹមត្រូវ ផ្ទុយទៅវិញក៏នៅមានមន្រ្តីខ្លះនៅមិនទាន់យកចិត្តទុកដាក់ពង្រឹងសមត្ថភាព គោរពវិន័យក្រមសីលធម៌ ដោយបំពេញភារៈកិច្ចមិនស្ថិតនៅក្នុងក្របខណ្ឌ មនសិការវិជ្ជាជីវៈឡើយ បើទោះបីមានការរំលឹកដាស់តឿនជាប្រចាំក៏ដោយ។ការនេះបានជះឥទ្ធិពលយ៉ាងអាក្រក់ដល់ស្នូលនៃស្ថាបនាទំនុកចិត្តលើស្ថាប័នយុត្តិធម៌យើង។ហេតុនេះយើងក្រុមប្រឹក្សាវិន័យនៃអង្គចៅក្រមដែលមានសមាសភាពចំនួន ៩រូប ចាំបាច់ត្រូវបង្ខំចិត្តអនុវត្តក្រោមពាក្យស្លោកថា”បើត្រីណាមួយស្អុយត្រូវដក ត្រីនោះចេញកុំទុកឱ្យស្អុយដល់ត្រីដទៃដែលគេល្អក្នុងកន្រ្តក”។

ដោយឡែកលោកជំទាវ ជា លាង អគ្គព្រះរាជអាជ្ញា នៃមហាអយ្យការអមតុលាការកំពូលបានថ្លែងថា៖ក្នុងឆ្នាំ២០២៤កន្លងមកនេះឧត្តមក្រុមប្រឹក្សានៃអង្គចៅក្រម ក៏បានសម្រេចដាក់វិន័យចៅក្រម និងព្រះរាជអាជ្ញាសរុបចំនួន៤៧ក្រោមរូបភាពបណ្តេញចេញពីក្របខណ្ឌ ផ្លាស់ដោយបង្ខំ ទំលាក់ឋានៈព្យួរការងារមិនឱ្យមានប្រាក់បៀវត្យ ស្តីបន្ទោសដោយផ្ទាល់មាត់ ស្តីបន្ទោសដោយចុះសំណុំលិខិតផ្ទាល់ ផ្អាកមិនឱ្យឡើងឋានៈដោយតម្រូវឱ្យបណ្តុះបណ្តាលបន្ថែមជាដើម។

លោកជំទាវថ្លែងថា”ការអនុវត្តមុខការនេះ មិនមែនយើងមានចេតនាចង់ដាក់ពិន័យនោះទេ ប៉ុន្តែវាជាយន្តការ ត្រួតពិនិត្យតាមដាននីតិវិធីច្បាប់មួយ ដែលធានាបានថាអង្គចៅក្រមរបស់យើងនៅតែឯកភាពគ្នាលើទស្សនៈ និងគោលជំហយុត្តិធម៌ និងត្រឹមត្រូវដើម្បីពង្រឹង និងលើកកម្ពស់គុណភាព ប្រសិទ្ធភាពនៃប្រព័ន្ធយុត្តិធម៌ ហើយបើនិយាយចំពោះយើងមា្នក់ៗគឺស្តា មុខមាត់ កេរ្តិ៍ឈ្មោះ វិស័យយុត្តិធម៌នៅកម្ពុជារបស់យើង។

គួរបញ្ជាក់ថាបើយោងតាមរបាយការណ៍ក្រសួងយុត្តិធម៌ក្នុងសន្និបាតបូកសរុបលទ្ធផលការងារវិស័យយុត្តិធម៌ឆ្នាំ២០២៤ និងកំណត់ទិសដៅការងារជាអាទិភាពឆ្នាំ២០២៥ឱ្យដឹងដែរថា ក្នុងពាក្យបណ្តឹងដែលទទួលបានសរុបរួមគិតពីថ្ងៃទី៩ ខែមករា ឆ្នាំ២០២៤ ដល់ថ្ងៃទី៩ ខែមករា ឆ្នាំ២០២៥ (រយៈពេល ១ឆ្នាំ នៃយុទ្ធនាការ)ពាក្យបណ្តឹងទទួលបានសរុបមានចំនួន ២៤១៣ សំណុំរឿង ស្មើនឹងជាង៦រឿងក្នុងមួយថ្ងៃ។ហើយបើគិតមដល់ត្រឹមថ្ងៃ១១ ខែមីនា ឆ្នាំ២០២៥នេះដែរ ពាក្យបណ្តឹងមានចំនួនសរុប ២៦៥៤ បណ្ដឹង ដោយក្នុងនេះពាក្យបណ្តឹងអាចបញ្ជូនបានសរុបចំនួន២៣៩៦ សំណុំរឿង ហើយពាក្យបណ្ដឹងដែលមិនអាចបញ្ជូនបានមានចំនួន ១៧ សំណុំរឿង៕ដោយ៖ដេប៉ូ