AKP ភ្នំពេញ ថ្ងៃទី១២ ខែមីនា ឆ្នាំ២០២៥--

ឯកឧត្តម វង្សី វិស្សុត ឧបនាយករដ្ឋមន្ដ្រីប្រចាំការ រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រី និងជាប្រធានក្រុមការងារសហប្រតិបត្តិការជាមួយអង្គការសហប្រជាជាតិ និងដៃគូអភិវឌ្ឍន៍សម្រាប់ការអនុវត្តមុខងារសេសសល់នៃអង្គជំនុំជម្រះវិសាមញ្ញក្នុងតុលាការកម្ពុជា(អ.វ.ត.ក.) បានដឹកនាំកិច្ចប្រជុំក្រុមការងារជាលើកទី២ ដែលមានការអញ្ជើញចូលរួមពីឯកឧត្តម កែវ រ៉េមី ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានគណៈ
កម្មាធិការសិទ្ធិមនុស្សកម្ពុជា រួមទាំងថ្នាក់ដឹកនាំតំណាងក្រសួង ស្ថាប័នពាក់ព័ន្ធចំនួន១៤។ កិច្ចប្រជុំនេះបានធ្វើឡើង នាព្រឹកថ្ងៃពុធ ១៤កើត ខែផល្គុន ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១២ ខែមីនា ឆ្នាំ២០២៥ នៅអគារមិត្តភាពនៃទីស្តីការគណៈរដ្ឋមន្ត្រី។

ឯកឧត្តមឧបនាយករដ្ឋមន្ត្រីប្រចាំការ វង្សី វិស្សុត បានរម្លឹកដល់គុណឧបក្ការៈដ៏ជ្រាលជ្រៅបំផុតដល់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ដែលបានផ្តួចផ្តើមគំនិតក្នុងការបង្កើតឱ្យមាន អ.វ.ត.ក. ដែលតុលាការកូនកាត់គំរូមួយ, បានអនុញ្ញាតឱ្យជនរងគ្រោះចូលរួមដោយផ្ទាល់ក្នុងនីតិវិធីតុលាការ, ជាតុលាការដែលបានចូលរួមចំណែកក្នុងការផ្សះផ្សាជាតិ ដោយសម្រេចបានតាមគោលដៅនៃការកសាងសន្តិភាព ដោយផ្អែកតាមស្មារតីនៃកិច្ចព្រមព្រៀងសន្តិភាពទីក្រុងប៉ារីស គោលនយោបាយ ឈ្នះ ឈ្នះ ហើយជាពិសេស ក៏បានចូលរួមចំណែកក្នុងការឯកភាពទឹកដីដែលជាងរយៈពេលជាង៥០០ឆ្នាំមកនេះ មិនដែលមាន។ ឯកឧត្តមឧបនាយករដ្ឋមន្ដ្រីប្រចាំការបានលើកឡើងអំពីទស្សនៈវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលផ្តល់សារៈសំខាន់ដល់ការងារកេរដំណែលរបស់សម្តេចតេជោ ក្នុងគោលដៅពង្រឹងនិងថែរក្សាសន្តិភាពយូរអង្វែង និងការអភិវឌ្ឍប្រកបដោយចីរភាព។

ក្នុងឱកាសនោះ ឯកឧត្តមឧបនាយករដ្ឋមន្រ្តីប្រចាំការបានវាយតម្លៃខ្ពស់ចំពោះសមិទ្ធផលរបស់ អ.វ.ត.ក. ដែលកំពុងសម្រេចបានទាំងនៅក្នុងកំឡុងពេលដំណើរការកាត់សេចក្តីរយៈពេល១៦ឆ្នាំ ពីឆ្នាំ២០០៦ ដល់២០២២ ​និងទាំងដំណើរការអនុវត្តន៍មុខងារសេសសល់របស់ អ.វ.ត.ក. សម្រាប់ឆ្នាំ២០២៣-២០២៤ និងដែលបានបន្សល់ទុកនូវកេរដំណែលដ៏សំខាន់ និងមានគុណតម្លៃខ្ពស់ក្នុងការពង្រឹងសន្តិភាព និងការផ្សះផ្សារជាតិ តាមរយៈការផ្សព្វផ្សាយនិងការអប់រំអំពីសច្ចភាពប្រវត្តិសាស្រ្ត ក្នុងន័យយល់ដឹង ចងចាំ និងបង្ការការវិលត្រឡប់មកវិញមកវិញនូវអំពើសាហាវយង់ឃ្នង និងប្រល័យពូជសាសន៍នៅកម្ពុជា។

ជាមួយគ្នានេះដែរ អង្គប្រជុំ ក៏បានពិភាក្សានិងឯកភាពលើខ្លឹមសាររួមស្តីពីសេចក្តីព្រាងឯកសារទស្សនាទានស្តីពីការបង្កើតស្ថាប័នកេរដំណែលរបស់ អ.វ.ត.ក. នាពេលអនាគត។ ស្ថាប័នកេរដំណែលដែលគ្រោងបង្កើតនេះ មានគោលដៅ៖ ទី១-គ្រប់គ្រងនិងថែរក្សាបណ្ណសារ ព្រមទាំងបង្កើតឡើងនូវសារៈមន្ទីរស្តីពីដំណើរការកាត់សេចក្តីរបស់ អ.វ.ត.ក. ដែលមានលក្ខណៈជាប្រវត្តិសាស្រ្ត; ទី២-លើកកម្ពស់ការបណ្តុះបណ្តាលនិងជំរុញឱ្យមានការស្រាវជ្រាវទៅលើសមិទ្ធផល បទពិសោធន៍ និងយុត្តិសាស្រ្តដ៏មានតម្លៃរបស់ អ.វ.ត.ក.;  ទី៣-លើកកម្ពស់ដល់ការអប់រំនិងការផ្សព្វផ្សាយឱ្យបានទូលំទូលាយដល់យុវជនជំនាន់ក្រោយនិងសាធារណជន ក្នុងការទប់ស្កាត់អំពើសាហាវឃោរឃៅ និងអំពើប្រល័យពូជសាសន៍នៅកម្ពុជា ថ្នាក់តំបន់និងអន្តរជាតិ  និងទី៤-បង្កើតឱ្យមានភាពជាដៃគូជាមួយស្ថាប័នពាក់ព័ន្ធជាតិ និងអន្តរជាតិ ក្នុងគោលដៅលើកកម្ពស់ដល់ការអប់រំសន្តិភាព ការទប់ស្កាត់អំពើប្រល័យពូជសាសន៍ និងយុត្តិធម៌អន្តរកាល។

ទាក់ទងនឹងការបង្កើតស្ថាប័នកេរដំណែលរបស់ អ.វ.ត.ក. នាពេលអនាគត ឯកឧត្តមឧបនាយករដ្ឋមន្រ្តីប្រចាំការ​ វង្សី វិស្សុត បានបញ្ជាក់បន្ថែមថា៖ «ស្ថាប័នកេរដំណែលនេះ ជាស្ថាប័នជាតិដែលមានភាពជាម្ចាស់ និងក៏មានលក្ខណៈបើកទូលាយផងដែរដល់អង្គការជាតិនិងអន្តរជាតិ និងដៃគូពាក់ព័ន្ធចូលរួមសហប្រតិបត្តិការ ជាពិសេសទាក់ទងទៅនឹងការលើកកម្ពស់កេរដំណែលរបស់ អ.វ.ត.ក. ការអប់រំ ការផ្សព្វផ្សាយ ការស្រាវជ្រាវស៊ីជម្រៅកម្រិត​ជាតិ និងអន្តរជាតិ និងការគាំទ្រដល់ជនរងគ្រោះនិងអ្នករស់រានមានជីវិតពីរបបខ្មែរក្រហម ក៏ដូចជាការលើកស្ទួយនៃវប្បធម៌សន្តិភាព ការអភិវឌ្ឍ និងយុត្តិធម៌ជាសកល ដែលជាគុណតម្លៃស្នូលរបស់កម្ពុជានាពេលបច្ចុប្បន្ន»។

សូមជម្រាបជូនថា អង្គប្រជុំ បានពិភាក្សានិងសម្រេចផងដែរទៅលើគម្រោងរៀបចំប្រារព្ធទិវាជាតិនៃការចងចាំនាថ្ងៃ២០ ឧសភា ២០២៥ខាងមុខ ឱ្យបានអធិកអធម និងប្រកបដោយអត្ថន័យ និងខ្លឹមសារ និងដើម្បីបន្តអនុវត្តន៍ការងារផ្សព្វផ្សាយអំពីសមិទ្ធផល និងកេរដំណែលរបស់ អ.វ.ត.ក. ឱ្យកាន់តែទូលំទូលាយ នៅក្នុងក្របខ័ណ្ឌក្រសួង ស្ថាប័នជាតិ និងអន្តរជាតិ ដើម្បីចូលរួមទប់ស្កាត់អំពើឃោរឃៅបែបនេះកុំឱ្យកើតឡើងសាជាថ្មីនៅកម្ពុជា ក៏ដូចជាការលើកកម្ពស់កិត្យានុភាពរបស់កម្ពុជាលើការងារនេះ ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត បានស្នើសុំក្រសួង ស្ថាប័នពាក់ព័ន្ធបន្តចូលរួម និងពង្រឹងកិច្ចសហការឱ្យមានលក្ខណៈជវភាព ដើម្បីសំដៅទប់ស្កាត់ការវិលត្រឡប់មកវិញនូវអំពើប្រល័យពូជសាសន៍នៅកម្ពុជា និងរក្សាបាននូវសន្តិភាពយូរអង្វែង និងការអភិវឌ្ឍប្រកបដោយចីរភាព៕

ដោយ៖ រិទ្ធី ប្រភព៖ អ.វ.ត.ក.