AKP កំពង់ស្ពឺ ថ្ងៃទី១២ ខែមីនា ឆ្នាំ២០២៥ -- ឯកឧត្តម ស៊្រុន ស៊្រន់ អភិបាលរងនៃគណៈអភិបាលខេត្តកំពង់ស្ពឺ បង្ហាញអារម្មណ៍ក្តុកក្តួល ខណៈរម្លឹកដល់ការលំបាក និងបញ្ហាប្រឈមរបស់ស្រ្តីកម្ពុជារាប់ម៉ឺននាក់ ដែលបានលះបង់កម្លាំងកាយចិត្ត និងជម្នះនូវរាល់ឧបសគ្គ ដើម្បីការពារប្រជាពលរដ្ឋខ្មែរ ការពារកូនៗ និងក្រុមគ្រួសារ ដើម្បីរួមចំណែកក្នុងការអភិវឌ្ឍជាតិមាតុភូមិ។ ការថ្លែងកោតសរសើរ និងដឹងគុណជូនចំពោះថ្នាក់ដឹងនាំស្រ្តី មន្ត្រីរាជការជាស្ត្រីនៃរដ្ឋបាលខេត្ត មន្ទីរអង្គភាពជុំវិញខេត្ត រដ្ឋបាលស្រុក ឃុំ សង្កាត់និងស្រ្តីគ្រប់រូបដែលជាម្តាយ ជាបងស្រីនិងជាប្អូនស្រី បានធ្វើឡើងនៅក្នុងពិធីអបអរសាទរខួបលើកទី១១៤ ទិវាអន្តរជាតិនារី ៨មីនា ឆ្នាំ២០២៥ ក្រោមប្រធានបទ "សិទ្ធិ សមភាព និងភាពអង់អាចចំពោះស្ត្រី និងក្មេងស្រីគ្រប់រូប" នាថ្ងៃទី១២ ខែមីនា ឆ្នាំ២០២៥ នៅក្នុងបរិវេណសាលាឃុំមហាឫស្សី ស្រុកគងពិសី ខេត្តកំពង់ស្ពឺ។

ជាមួយនឹងការទទូលស្គាល់ចំពោះគុណតម្លៃ និងស្នាដៃរបស់ស្ត្រីនៅក្នុងសង្គមកម្ពុជា លើគ្រប់វីស័យ មានទាំងស្ថាប័នរដ្ឋ ឯកជននិងស្ត្រីមេផ្ទះផងដែរ និងសំដៅធ្វើយ៉ាងណាឱ្យមានការចូលរួមកាន់តែច្រើន និងប្រកបដោយគុណភាព ប្រសិទ្ធភាពការងារ ក្នុងកិច្ចដំណើរការអភិវឌ្ឍន៍សង្គម និងសេដ្ឋកិច្ចជាតិ ឯកឧត្តម ស៊្រុន ស៊្រន់ បានបញ្ជាក់ថា រដ្ឋបាលខេត្តកំពង់ស្ពឺនឹងបន្តសហការជាមួយគ្រប់ភាគីពាក់ព័ន្ធ ដើម្បីលើកកម្ពស់ស្ត្រីនិងក្មេងស្រីឱ្យសម្រេចបាននូវសមភាពយេនឌ័រ និងភាពអង់អាចរបស់ស្ត្រី និងក្មេងស្រី ស្របតាមយុទ្ធសាស្ត្របញ្ចកោណ ដំណាក់កាលកាលទី១ រាជរដ្ឋាភិបាលកម្ពុជា នីតិកាលទី៧នៃរដ្ឋសភា៕

ដោយ លឹម សាន្ត