AKP ភ្នំពេញ ថ្ងៃទី១២ ខែមីនា ឆ្នាំ២០២៤--អាជ្ញាធរជាតិព្រះវិហារ បានរៀបចំកម្មវិធីអប់រំផ្សព្វផ្សាយបេតិកភណ្ឌ សារមន្ទីរ និងបរិស្ថាន នៅរមណីយដ្ឋានប្រាសាទព្រះវិហារ ដើម្បីអបអរទិវាវប្បធម៌ជាតិ៣មីនា លើកទី២៧ ឆ្នាំ២០២៥។

កម្មវិធីក្នុងគោលបំណងឱ្យសិស្សានុសិស្សបានទទួលបានចំណេះដឹងទាក់ទងនឹងប្រវត្តិសាស្រ្ត តួនាទីសារមន្ទីរធម្មជាតិសកលសម្តេចតេជោ ហ៊ុន សែន ព្រះវិហារ បំផុសគំនិតឱ្យយុវជនចូលរួមការពារបេតិកភណ្ឌវប្បធម៌ បរិស្ថាន ធនធានធម្មជាតិ និងអបរំសិស្សានុសិស្សចៀសឱ្យឆ្ងាយពីគ្រឿងញៀន ។ 

មន្ត្រី អាជ្ញាធរជាតិព្រះវិហារ បានឱ្យដឹងនៅថ្ងៃទី១១ ខែមីនា ឆ្នាំ២០២៥ថា កម្មវិធីនេះបានប្រារព្ធឡើងក្រោមអធិបតីភាព លោក ផេង សំអឿន អគ្គនាយករងប្រចាំនៅរមណីយដ្ឋានប្រាសាទព្រះវិហារ និងមានការចូលរួមពីសំណាក់ឯកឧត្តមប្រធាន/លោកអនុប្រធាននាយកដ្ឋាន មន្រ្តី  លោកគ្រូ និងសិស្សានុសិស្សដែលអញ្ជើញមកពីអនុវិទ្យាល័យភ្នំឆត្រសែនជ័យ អនុវិទ្យាល័យស្រះក្តុល និងអនុវិទ្យាល័យស្រអែម សរុបចំនួន ៤៦នាក់ ស្រីចំនួន ២២នាក់។ 

កម្មវិធីរួមមានការធ្វើបទបង្ហាញអំពី សម្បត្តិបេតិកភណ្ឌវប្បធម៌រូបី អរូបី និងសារមន្ទីរនៅ រមណីយដ្ឋានប្រាសាទព្រះវិហារ បង្ហាញពីការអភិរក្សវត្ថុបុរាណនៅសារមន្ទីរធម្មជាតិសកលសម្តេចតេជោ ហ៊ុន សែន ព្រះវិហារ និងបង្ហាញពីគុណតម្លៃធនធានធម្មជាតិ។ 

នៅក្នុងកម្មវិធីនេះផងដែរ លោក ម៉ក់ ឌឿង រួមជាមួយមន្រ្តីបច្ចេកទេស បាននាំសិស្សានុសិស្សទៅទស្សនកិច្ចសិក្សាស្វែងយល់បន្ថែមលើការ ដាក់តាំងវត្ថុសិល្បៈនៅ សារមន្ទីរធម្មជាតិសកល សម្តេចតេជោ ហ៊ុន សែន ព្រះវិហារ និងកិច្ចការងារជួសជុល អភិរក្សប្រាសាទព្រះវិហារ ៕

ដោយ៖ណយ នឿន ,ប្រភព៖អាជ្ញាធរជាតិព្រះវិហារ