AKP ភ្នំពេញ ថ្ងៃទី១០ ខែមីនា ឆ្នាំ២០២៥-- ឯកឧត្ដម ឈឹម សៅគី រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្រ្ដីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីបើកការដ្ឋានសាងសង់ស្ពានបេតុង ១កន្លែង ប្រវែង៩០ម៉ែត្រ ស្ថិតនៅភូមិចេក និងភូមិដុបត្នោត ឃុំពង្រលើ ស្រុកជីក្រែង ខេត្តសៀមរាប នាព្រឹកថ្ងៃទី១០ ខែមីនា ឆ្នាំ២០២៥ ដោយមានការអញ្ជើញចូលរួមពីប្រធានក្រុមប្រឹក្សាស្រុក អភិបាលរងនៃគណៈអភិបាលស្រុក ឯកឧត្ដម ឧត្ដមសេនីយ៍ នរិន្រ្ទរិទ្ធិ នាយករងនាយកដ្ឋានវិស្វកម្ម ក្រសួងការពារជាតិ តំណាងនាយកដ្ឋានផ្លូវលំជនបទ ក្រុមការងារគ.ត.វនៃក្រសួងអភិវឌ្ឍន៍ជនបទ ក្រុមការងារនាយកដ្ឋានវិស្វកម្ម ប្រធាន និងក្រុមការងារមន្ទីរអភិវឌ្ឍន៍ជនបទខេត្តសៀមរាប អាជ្ញាធរមូលដ្ឋាន ឃុំ ភូមិ ព្រមទាំងក្រុមការងាររាជរដ្ឋាភិបាលចុះមូលដ្ឋាន អាជ្ញាធរមូលដ្ឋានភូមិ-ឃុំ ស្រុក និងប្រជាពលរដ្ឋសរុប ៧៥នាក់។

បន្ទាប់ពីអាជ្ញាធរមូលដ្ឋានបានសម្ដែងការស្វាគមន៍ និងធ្វើរបាយការណ៍រួចមក លោក រស់ ប៊ុន ថន អភិបាលរងនៃគណៈអភិបាលស្រុកជីក្រែង បានលើកឡើងពីសក្ដានុពលនៃការងារសាងសង់ស្ពានបេតុងនេះថានឹងបម្រើផលប្រយោជន៍ដល់ប្រជាពលរដ្ឋដោយផ្ទាល់ឃុំចំនួន២ គឺឃុំពង្រលើ និងឃុំគោកធ្លកលើ ព្រមទាំងបានតភ្ជាប់ការធ្វើចរាចរណ៍ ក៏ដូចជាការដឹកជញ្ជូនផលិតផលវិស័យកសិកម្មមួយចំនួនរបស់ក្នុងស្រុកសូត្រនិគម និងស្រុកជីក្រែងផងដែរ។

ក្នុងឱកាសនោះ ឯកឧត្ដម ឈឹម សៅគី បានពាំនាំនូវប្រសាសន៍ផ្ដាំផ្ញើសួរសុខទុក្ខពីសំណាក់សម្ដេចអគ្គមហាសេនាបតីតេជោ ហ៊ុន សែន មគ្គុទេសក៏ឯកនយោបាយឈ្នះឈ្នះ បិតាស្ថាបនិកសន្តិភាព និងជាប្រធានព្រឹទ្ធសភា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត និងឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទជូនដល់អង្គពិធី។

ជាមួយគ្នានោះដែរ ឯកឧត្ដមរដ្ឋលេខាធិការប្រចាំការ បានបញ្ជាក់ថា ស្ពានបេតុងប្រវែង៩០ម៉ែត្រ ទទឹងប្រវែង១០ម៉ែត្រ និងសាងសង់ផ្លូវល្បាយគ្រួសសងខាងក្បាលស្ពានដែលម្ខាងៗមានប្រវែង ១០០ម៉ែត្រ កម្រាស់ ០,២ម៉ែត្រ ឆ្លងកាត់ស្ទឹងជីក្រែង ត្រង់ចំណុចភូមិ ចេក និងភូមិដុបត្នោត ក៏ដូចជាការតភ្ជាប់ឃុំចំនួនពីរគឺ ឃុំពង្រលើ ស្រុកជីក្រែង មានចំនួន ១០ភូមិ ស្មើនឹង ២ ៤៦៥គ្រួសារ ប្រជាពលរដ្ឋ ១០ ៨១៦នាក់ ស្រី ៥ ៤៦៩ នាក់ និងឃុំគោកធ្លកលើ និងភ្ជាប់ទៅឃុំតាយ៉ែកស្រុកសូទ្រនិគមចំនួន ១៣ភូមិ ស្មើនឹង ២ ៧០២គ្រួសារ ប្រជាពលរដ្ឋ ១២ ០៩៤នាក់ ស្រី ៥ ៨៦៩នាក់។ ស្ពាននេះនឹងប្រើពេលសាងសង់ចន្លោះពី៤ ទៅ៥ខែ គឺគ្រោងនឹងបញ្ចប់នៅក្នុងខែសីហា ឆ្នាំ២០២៥។ ពិធីបើកការដ្ឋានសាងសង់ស្ពានបេតុងនាពេលនេះ អាចប្រព្រឹត្តទៅបានគឺដោយសារគុណបំណាច់នៃ “សុខសន្តិភាព” ដែលកើតចេញពីការលះបង់ដ៏ធំធេង និងការខិតខំប្រឹងប្រែងឥតឈប់ឈរដើម្បីជាតិ និងប្រជាជន ដោយយកជីវិតធ្វើជាដើមទុនរបស់ សម្តេចអគ្គមហាសេនាបតីតេជោ ហ៊ុន សែន ជាបិតាសន្តិភាព ស្ថាបនិកមគ្គុទេសក៍ឯក និងប្រតិបត្តិករនយោបាយឈ្នះ ឈ្នះ ដែលនាំមកនូវសន្តិភាព និងឯកភាពជាតិពេញលេញទូទាំងប្រទេស និងក្រោមការដឹកនាំបន្តវេនប្រកបដោយភាពឈ្លាសវៃ គតិបណ្ឌិត និងប៉ិនប្រសប់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ទន្ទឹមនឹងនេះ គណៈអធិបតីក៏បាននាំយកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ចែកជូនដល់មេឃុំ ក្រុមប្រឹក្សាឃុំ មេភូមិ និងប្រជាពលរដ្ឋរស់ ដែលបានចូលរួមដោយម្នាក់ៗទទួលបានក្រមាមួយ និងថវិកាមួយចំនួន និងបានសំណូមពរដល់បងប្អូនប្រជាពលរដ្ឋ និងអាជ្ញាធរមូលដ្ឋានគ្រប់លំដាប់ថ្នាក់ យោគយល់ និងអធ្យាស្រ័យដល់ក្រុមការងារសាងសង់ស្ពាននេះផងដែរ៕

ដោយ៖ ពេជ្រ សំអឿន (ប្រភព៖ ក្រសួងអភិវឌ្ឍន៍ជនបទ)