AKP កោះកុង ថ្ងៃទី១០ ខែមីនា ឆ្នាំ២០២៥--

តំបន់វិស្សមកាលតារាសាគរ ក្នុងខេត្តកោះកុង បានរៀបចំបុណ្យឆ្នេរលើកទី២របស់ខ្លួន ក្នុងគោលបំណងដើម្បីផ្សព្វផ្សាយពីសក្តានុពលដែលកំពុងមានទៅកាន់ពិភពលោក និងបង្កើនការទាក់ទាញកំណើនអ្នកវិនិយោគមកអភិវឌ្ឍន៍សេដ្ឋកិច្ចសង្គមនៅកម្ពុជា។

ថ្លែងក្នុងពិធីបុណ្យឆ្នេរ កាលពីយប់ថ្ងៃទី០៨ ខែមីនា ឆ្នាំ២០២៥ លោក លី ម៉េងឈិន អគ្គនាយកក្រុមប្រឹក្សាភិបាលក្រុមហ៊ុន ខូសថប ស៊ីធី ឌីវេឡុបម៉ិន បានបញ្ជាក់ថា ពិធីបុណ្យឆ្នេរនេះ ធ្វើឡើងរយៈពេល២ថ្ងៃ ដែលជាព្រឹត្តិការណ៍របស់គម្រោងតារាសាគរ បានចូលរួមចំណែកយ៉ាងធំក្នុងការអភិវឌ្ឍន៍ និងការផ្សព្វផ្សាយទេសចរណ៍របស់ខេត្តកោះកុង។ លោកអគ្គនាយកបានបន្ដថា ពិធីបុណ្យនេះមិនត្រឹមតែលើកកម្ពស់វិបុលភាពនៃវិស័យទេសចរណ៍ប៉ុណ្ណោះទេ ថែមទាំងលើកកម្ពស់គុណភាពជីវិតរបស់អ្នកស្រុកផងដែរ។ ឆ្នេរដ៏មានមន្តស្នេហ៍នៃខេត្តកោះកុង នឹងបើកភាពទាក់ទាញដល់ប្រជាជនកម្ពុជាតាមពិធីបុណ្យឆ្នេរនេះ ហើយចំពោះការចូលរួមប្រមូលផ្តុំរបស់យុវជនជាង១ពាន់នាក់ ដើម្បីផ្សព្វផ្សាយលើកកម្ពស់ពីសក្តានុពលវិស័យទេសចរណ៍ឱ្យរីកចម្រើន។

លោក លី ម៉េងឈិន បានបញ្ជាក់បន្ថែមថា ចាប់តាំងពីការបង្កើតឡើងមក ក្រុមហ៊ុន ខូសថល ស៊ីធី ឌីវេឡុបម៉ិន គ្រុបឯ.ក បានបំពេញភារកិច្ចដ៏សំខាន់ក្នុងការលើកកម្ពស់ការអភិវឌ្ឍសេដ្ឋកិច្ច និងសង្គមនៃខេត្តកោះកុង ប្រទេសកម្ពុជា។ ទន្ទឹមនេះ មិនត្រឹមតែបានរួមចំណែកលេចធ្លោក្នុងវិស័យសេដ្ឋកិច្ច និងការវិនិយោគប៉ុណ្ណោះទេ បន្ថែមពីនេះយើងបានសម្រេចនូវសមិទ្ធផលគួរឱ្យកត់សម្គាល់ក្នុងវិស័យទេសចរណ៍ផងដែរ។

សូមជម្រាបជូនថា ក្រុមហ៊ុន ខូសថល ស៊ីធី បាននិងកំពុងជំរុញយ៉ាងសកម្មនូវការសាងសង់គម្រោងធំៗ រួមទាំងការដឹកជញ្ជូនតាមផ្លូវគោក ការដឹកជញ្ជូនតាមផ្លូវទឹក ហេដ្ឋារចនាសម្ព័ន្ធអាកាសយានដ្ឋានអន្តរជាតិខ្នាត 4F និងកំពង់ផែទឹកជ្រៅ។ គម្រោងទាំងនេះមិនត្រឹមតែធ្វើឱ្យប្រសើរឡើងនូវហេដ្ឋារចនាសម្ព័ន្ធប៉ុណ្ណោះទេ ប៉ុន្តែក៏ជាការប្តេជ្ញាចិត្តរបស់យើងក្នុងការបង្កើតឱកាសការងារ និងការលើកកម្ពស់កម្រិតជីវភាពសម្រាប់ប្រជាជនក្នុងតំបន់ផងដែរ។ កន្លងទៅ តំបន់តារសាគរ បានសម្ពោធបើកការហោះហើរនៃអាកាសយានដ្ឋានអន្តរជាតិ តារាសាគរ នៅចុងឆ្នាំ២០២៤ បង្ហាញពីសមិទ្ធផលរបស់យើងក្នុងការអភិវឌ្ឍទេសចរណ៍។

កាលពីពេលថ្មីៗកន្លងទៅនេះ សម្តេចបវរធិបតី ហ៊ុន ម៉ាណែត នាយករដ្ឋមន្ត្រី ធ្លាប់លើកឡើងថា "ទេសចរណ៍រីកលូតលាស់ក្នុងសន្តិភាព" ដោយសង្កត់ធ្ងន់ថា សន្តិភាពគឺជាមូលដ្ឋានគ្រឹះនៃការអភិវឌ្ឍន៍វិស័យទេសចរណ៍។ បរិយាកាសដែលមានសន្តិរភាព និងសុវត្ថិភាពអាចទាក់ទាញភ្ញៀវទេសចរជាលំដាប់ និងជំរុញសេដ្ឋកិច្ចឱ្យរីកចម្រើន។

ជាមួយគ្នានេះដែរ លោក ជា តិចហុក អគ្គនាយកផ្នែកទំនាក់ទំនងសាធារណៈ នៃក្រុមហ៊ុន ខូសថល ស៊ីធី ឌីវេឡុបម៉ិន គ្រុបឯ.ក បានឱ្យដឹងដែរថា គម្រោងអភិវឌ្ឍន៍នៅតំបន់តារាសាគរ បានស្ថិតនៅក្នុងការអភិវឌ្ឍយ៉ាងឆាប់រហ័សនាពេលប៉ុន្មានឆ្នាំក្រោយនេះ ដែលរួមមានអាកាសយានដ្ឋានអន្តរជាតិ តារាសាគរដែលបានបើកទទួលជើងហោះហើរដំបូងកាលពីថ្ងៃទី ២៦ ខែធ្នូ ឆ្នាំ ២០២៤ ហើយនឹងមានគម្រោងសម្រាប់ធ្វើការដំណើរការនៅក្នុងឆ្នាំនេះ។ លើសពីនេះ តំបន់វិស្សមសកាល កំពុងអភិវឌ្ឍន៍ទៅលើការវិនិយោគកំពុងផែរសមុទ្រទឹកជ្រៅ ដែលបច្ចុប្បន្នមានដៃគូជាច្រើនកំពុងមានគម្រោងនឹងធ្វើការការវិនិយោគ។

លោក ជា តិចហុក ក៏សូមថ្លែងអំណរគុណថ្នាក់ដឹកនាំខេត្តកោះកុង និងក្រុមហ៊ុនដៃគូ ដែលបានរួមគ្នាបង្កើតកម្មវិធីបុណ្យឆ្នេរនេះជាលើកទី២ដែលប្រព្រឹត្តអបអរសាទរដោយក្តីសប្បាយរីករាយពីវិស័យទេសចរណ៍។

ក្នុងឱកាសនោះ លោក អន សុធារិទ្ធ អភិបាលរងខេត្តកោះកុង បានចាត់ទុកព្រឹត្តការណ៍បុណ្យឆ្នេរលើកទី២ ជាឱកាសដ៏វិសេសវិសាលផ្តោតលើការផ្សព្វផ្សាយពីវិស័យទេសចរណ៍របស់ខេត្តដែលកំពុងមានស្រាប់ទៅកាន់ពិភពលោកបានដឹង និងអញ្ជើញមកលេងកម្សាន្តនៅតំបន់វិស្សមកាលតារាសាគរ។ លោកអភិបាលរងខេត្ដជឿជាក់យ៉ាងមុតមាំថា មហាជន និងអ្នកទេសចរជួយផ្សព្វផ្សាយឱ្យបានកាន់តែច្រើនពីសក្តានុពលរបស់ខេត្តកោះកុង សំដៅទទួលបានកំណើនភ្ញៀវទេសចរ និងអភិវឌ្ឍន៍សេដ្ឋកិច្ចនៅក្នុងខេត្ត ស្របពេលផ្លូវជាតិលេខ៤៨ និងផ្លូវជាតិលេខ១០ ស្ថាបនាជិតរួចរាល់ជាស្ថាពរនាពេលខាងមុខ។

យោងតាមទិន្នន័យដែលផ្តល់ដោយក្រសួងទេសចរណ៍ក្នុងឆ្នាំ២០២៤បានឱ្យដឹងថា  ប្រាក់ចំណូលពីទេសចរណ៍បានកើនឡើងដល់៣.៦៦ពាន់លានដុល្លារ កើនឡើង១៨% ប្រៀបទៅនឹងឆ្នាំ២០២៣។ ក្នុងឆ្នាំ២០២៥នេះ រដ្ឋមន្ត្រីក្រសួងទេសចរណ៍ក៏បានស្នើនូវគំនិតផ្តួចផ្តើមយុទ្ធសាស្ត្រជាបន្តបន្ទាប់ ដើម្បីពង្រឹង និងផ្សព្វផ្សាយផលិត​ផល​ទេសចរណ៍ចម្រុះក្នុងស្រុក ដោយមានគោលដៅទាក់ទាញភ្ញៀវទេសចរបរទេសចំនួន ៧,៥ លាននាក់នៅឆ្នាំនេះផងដែរ។

សូមបញ្ជាក់ផងដែរថា តំបន់តារាសាគរ បានកែលម្អយ៉ាងសំខាន់លើតំបន់គោលដៅ ក្នុងការពង្រឹងការផ្សព្វផ្សាយទេសចរណ៍ ការប្រយុទ្ធប្រឆាំង និងកែតម្រូវព័ត៌មានក្លែងក្លាយ ការកែលម្អសុវត្ថិភាពទេសចរណ៍ ការផ្តល់ឱ្យភ្ញៀវទេសចរនូវបទពិសោធន៍ធ្វើដំណើរដ៏ងាយស្រួល ការកែលម្អសេវាកម្មទេសចរណ៍ ជាពិសេសពង្រឹងការតភ្ជាប់ផ្លូវអាកាស និងផ្តោតលើការដាំដុះធនធានមនុស្សក្នុងវិស័យទេសចរណ៍។ យុទ្ធសាស្ត្រនេះ មិនត្រឹមតែផ្តោតលើការទាក់ទាញភ្ញៀវ​​ទេសចរឱ្យបានច្រើនប៉ុណ្ណោះទេ ថែមទាំងផ្តោតលើការផ្តល់បទពិសោធន៍ទេសចរណ៍ដែលមានគុណភាពខ្ពស់ផងដែរ៕ដោយ៖ រិទ្ធី