AKP បន្ទាយមានជ័យ ថ្ងៃទី១០ ខែមីនា ឆ្នាំ២០២៥-- 

លោក រ័ត្ន ដាស៊ីណង់ អភិបាលនៃគណៈអភិបាលស្រុកមង្គលបូរី ខេត្តបន្ទាយមានជ័យ នាព្រឹកថ្ងៃចន្ទ ទី១០ ខែមីនា ឆ្នាំ២០២៥ បានដឹកនាំកិច្ចប្រជុំមួយដើម្បីជំរុញការកែតម្រូវទិន្នន័យអត្រានុកូលដ្ឋាន អត្តសញ្ញាណប័ណ្ណ និងសៀវភៅគ្រួសារជូនប្រជាពលរដ្ឋតាមខ្នងផ្ទះ ដើម្បីពិនិត្យឡើងវិញនូវលទ្ធផលនៃការកែតម្រូវទិន្នន័យដែលបានអនុវត្តកន្លងមក និងដើម្បីធានាថាទិន្នន័យទាំងអស់ត្រូវបានកែសម្រួលឱ្យបានត្រឹមត្រូវ និងបញ្ជូនទៅស្ថាប័នពាក់ព័ន្ធទាន់ពេលវេលានោះ។

លោកអភិបាលស្រុកបានបញ្ជាក់ថា ការកែតម្រូវទិន្នន័យទាំងនេះមានសារៈសំខាន់ណាស់សម្រាប់ប្រជាពលរដ្ឋ ព្រោះជួយសម្រួលដល់ការទទួលបានសេវាសាធារណៈផ្សេងៗ និងការពារសិទ្ធិរបស់ពួកគេ និងបានជំរុញឱ្យមន្ត្រីពាក់ព័ន្ធទាំងអស់ធ្វើការសហការគ្នាឱ្យបានល្អ ដើម្បីធានាថាការងារនេះប្រព្រឹត្តទៅដោយរលូន និងមានប្រសិទ្ធភាព។

ឆ្លៀតក្នុងឱកាសនោះ រលោកអភិបាលស្រុកបានក្រើនរម្លឹកដល់ថ្នាក់ដឹកនាំ និងអាជ្ញាធរសមត្ថកិច្ចមូលដ្ឋានទាំងអស់ ត្រូវបន្តខិតខំបន្ថែមទៀត ក្នុងការបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋ ជាពិសេសត្រូវយកចិត្តទុកដាក់ខ្ពស់ទៅលើការដោះស្រាយបញ្ហាប្រឈមនានា ក៏ដូចជាបម្រើសេវាសាធារណៈជូនប្រជាពលរដ្ឋ ឱ្យបានឆាប់រហ័ស ទាន់សភាពការណ៍ និងមានប្រសិទ្ធភាពខ្ពស់ ស្របទៅនឹងគោលនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល អាណត្តិទី៧នេះ។

គួរបញ្ជាក់ថា ការកែតម្រូវទិន្នន័យអត្រានុកូលដ្ឋាន អត្តសញ្ញាណប័ណ្ណ និងសៀវភៅគ្រួសារ គឺជាផ្នែកមួយនៃកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការកែលម្អការគ្រប់គ្រងទិន្នន័យប្រជាពលរដ្ឋ និងផ្តល់សេវាសាធារណៈឱ្យកាន់តែប្រសើរឡើងថែមទៀត៕

ដោយ ឈុន សារ៉ាត