AKP កំពង់ធំ ថ្ងៃទី១០ ខែមីនា ឆ្នាំ២០២៥-- ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានក្រុមការងារចុះមូលដ្ឋានស្រុកស្ទោង បានមានប្រសាសន៍លើកឡើងក្នុងឱកាសអញ្ជើញកាត់ខ្សែបូសម្ពោធដាក់ឱ្យប្រើប្រាស់អគារស្នាក់ការគណបក្សប្រជាជនកម្ពុជាឃុំទ្រា ស្រុកស្ទោង ខេត្តកំពង់ធំ កាលពីថ្ងៃទី០៩ ខែមីនា ឆ្នាំ២០២៥ ថា កត្តាសុខសន្តិភាព ស្រុកស្ទោងបានរួមចំណែកយ៉ាងធំធេងក្នុងការនាំផលិតផលកសិកម្មទៅលក់នៅក្រៅប្រទេស។

ឯកឧត្តម ថោ ជេដ្ឋា បានបញ្ជាក់ថា កត្តាសុខសន្តិភាពនេះបាននាំឱ្យព្រះរាជាណាចក្រកម្ពុជាមានការរីកចម្រើន និងអភិវឌ្ឍគ្រប់វិស័យក្រោមការដឹកនាំដ៏ប៉ិនប្រសប់របស់សម្ដេចមហាបវរធិបតី ហ៊ុន ម៉ាណែត ជាពិសេសខេត្តកំពង់ធំទទួលបាននូវប្រព័ន្ធធារាសាស្ត្រស្អេកស្កះ ដូចជា ទំនប់ស្ទាក់ទឹកដងកាំបិតនៅស្រុកសណ្ដាន់ ទំនប់ស្ទាក់ទឹកកំពង់គោ ការកែលម្អអាងទឹក៣០កញ្ញាទំនប់ស្ទាក់ទឹកស្ទឹងស្ទោង(ពាម) និងប្រព័ន្ធប្រឡាយជាច្រើនទៀតនៅតាមបណ្ដាភូមិឃុំនានានៅក្នុងខេត្តកំពង់ធំដែលបានស្តុកទឹករាប់លានម៉ែត្រគូប និងចែកចាយស្រោចស្រពស្រែស្រូវជាច្រើនម៉ឺនហិកតាដែលជាផ្នែកមួយក្នុងការលើកកម្ពស់វិស័យកសិកម្ម និងកសិឧស្សាហកម្មហើយបានលើកកម្ពស់សេដ្ឋកិច្ចប្រជាពលរដ្ឋក្នុងមូលដ្ឋាន និងបង្កើតកម្លាំងពលកម្មជាពិសេសរោងចក្រស្វាយចន្ទីដែលកំពុងដំណើរការសាងសង់ និងប្រមូលទិញគ្រាប់ស្វាយចន្ទីពីម្ចាស់ចម្ការ។

ឯកឧត្តមបានបញ្ជាក់ទៀតថា ស្នាក់ការគណបក្សដែលដាក់សម្ពោធឱ្យប្រើប្រាស់នៅពេលនេះពិតជារួមចំណែកយ៉ាងធំធេងក្នុងការលើកកម្ពស់ប្រសិទ្ធភាពការងារជាពិសេសការកសាងនូវភាពរឹងមាំរបស់គណបក្សក្នុងមូលដ្ឋានក្នុងការឈានទៅទទួលបានជ័យជំនះគ្រប់សមរភូមិបោះឆ្នោត។ ដើម្បីឱ្យគណបក្សប្រជាជនកម្ពុជាកាន់តែមានភាពរឹងមាំគ្រប់មូលដ្ឋានស្នាក់ការគណបក្សប្រជាជនកម្ពុជាស្រុកស្ទោងនឹងលេចរូបរាងជាបណ្ដើរៗហើយនៅគ្រប់ឃុំទាំងអស់ពេលអនាគតដ៏ខ្លីខាងមុខនេះ។ ទីនេះនឹងក្លាយជាកន្លែងនយោបាយដ៏រឹងមាំហើយប្រជាពលរដ្ឋអាចចូលទៅកម្សាន្តសប្បាយជាមួយនឹងសួនច្បារដ៏ស្រស់បំព្រង។ សារមន្ទីរបក្សជាកន្លែងហាត់កីឡា និងជាក្លឹបហាត់គុនបុរាណខ្មែរដែលជាការចូលរួមអភិរក្សនូវសម្បត្តិវប្បធម៌ដ៏ផូរផង់របស់ដូនតាយើងឱ្យនៅជាអមតៈ។

ក្នុងឱកាសនោះ ឯកឧត្តមបានអំពាវនាវដល់ប្រជាពលរដ្ឋក្នុងមូលដ្ឋាន សូមជួយថែរក្សាសម្បត្តិសាធារណៈដែលរាជរដ្ឋាភិបាលបានសាងសង់ជូនជាពិសេសអគារស្នាក់ការគណបក្សនេះឱ្យបានរឹងមាំស្ថិតស្ថេរប្រើប្រាស់បានយូរអង្វែង និងរួមរស់សុខដុមនីយកម្មជាមួយគ្នា។ អគារស្នាក់ការគណបក្សដែលដាក់សម្ពោធនៅពេលនេះមានទំហំ១៤ម៉ែត្រគុណ៨ម៉ែត្រ។

ជាមួយគ្នានោះដែរ គណៈអធិបតីបានចែកជូនដល់អ្នកចូលរួមចំនួន៧២៨នាក់ម្នាក់ៗទទួលបាននូវថវិកាចំនួន២ម៉ឺនរៀល៕

ដោយ ស៊ុម វណ្ណា