AKP កំពង់ស្ពឺ ថ្ងៃទី៨ ខែមីនា ឆ្នាំ២០២៥ -- ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺកាលពីថ្ងៃទី៧ខែមីនាឆ្នាំ២0២៥ បានអញ្ជើញជាអធិបតីក្នុង ពិធីបុណ្យបញ្ចុះបឋមសិលាកសាងមហាប្រាសាទ ព្រះធម្មចេតិយទី២ នៅមជ្ឈមណ្ឌលវប្បធម៌ព្រះពុទ្ធសាសនាកម្ពុជា ស្ថិតនៅភូមិថ្មី ឃុំចំបក់ ស្រុកភ្នំស្រួច ខេត្តកំពង់ស្ពឺ ។ 

កម្មវិធីមានការនិមន្តនិងអញ្ជើញរួមមាន គណៈមហានិកាយ ទាំងពីរគណៈឯកឧត្តម លោកជំទាវ សមាជិករដ្ឋសភា ព្រឹទ្ធសភា ឯកឧត្តមប្រធានក្រុមប្រឹក្សាខេត្ត  ឯកឧត្តមបណ្ឌិត អភិបាលខេត្ត ក្រុមការងារចុះជួយមូលដ្ឋាន មន្រ្តីរាជការបងប្អូនប្រជាពលរដ្ឋ និងពុទ្ធបរិស័ទទាំងអស់ ចំនួន ៨៤៥ អង្គនិងនាក់។

ក្នុងឱកាសនោះ ឯកឧត្តមហ៊ុន ម៉ានី បានកោតសរសើរចំពោះគំនិតផ្តួចផ្តើមក្នុងការកសាងមជ្ឈមណ្ឌលវប្បធម៌ព្រះពុទ្ធសាសនានេះ និងថ្លែងអំណរគុណចំពោះទឹកចិត្ត និងសទ្ធាជ្រះថ្លារបស់ អ្នកឧកញ៉ាអគ្គមហាឧបាសិកាធម្មបណ្ឌិត ញឹក ប៊ុនថាប្រធានមជ្ឈមណ្ឌលវប្បធ៏មព្រះពុទ្ធសាសនា ចំពោះការខិតខំប្រឹងប្រែង និងការលះបង់ទាំងកម្លាំងកាយចិត្ត ពេលវេលា និងការបរិច្ចាគថវិកាផ្ទាល់ខ្លួនយ៉ាងច្រើនសន្ធឹកសន្ធាប់ ព្រមទាំងបានអំពាវនាវ កៀរគរថវិកាពីសប្បុរជន និងថ្នាក់ដឹកនាំរាជរដ្ឋាភិបាល ដើម្បីចូលរួមចំណែកកសាងសមិទ្ធផលនានាជាច្រើននៅក្នុងមជ្ឈមណ្ឌលដ៏ធំនេះ សម្រាប់ទុកជាបូជនីយដ្ឋានព្រះពុទ្ធសាសនា និងជាមត៌កវប្បធម៌ជាតិផងដែរ។

ឯកឧត្តមបានមានប្រសាសន៍បន្តថា តាមរយៈសមិទ្ធផលនាថ្ងៃនេះ បានគូសបញ្ជាក់ពីការខិតខំប្រឹងប្រែង និងការជឿទុកចិត្តមកលើការដឹកនាំ និងការអនុវត្តការងារ របស់ដឹកថ្នាក់នាំគ្រប់ជាន់ថ្នាក់ ក្នុងការកែប្រែកន្លែងដែលមានអតីតកាលចូរចត់ មកជាកន្លែងសម្រាប់អប់រំផ្លូវចិត្ត និងបម្រើដល់ប្រយោជន៍ព្រះពុទ្ធសាសនា។  ឯកឧត្តមបានគូសបញ្ជាក់ពីទស្សនៈប្រវត្តិសាស្រ្តរបស់កម្ពុជា ដោយផ្សាភ្ជាប់ថា ផ្អែកលើអតីតកាលដែលបានឆ្លងកាត់ដោយលំបាក គឺយើងត្រូវខំប្រឹងប្រែងគិតគូរបន្ថែមឆ្ពោះទៅអនាគត ក្នុងនោះក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត គឺយើងត្រូវបន្តថែរក្សា និងការពារ និងអភិវឌ្ឍបន្ថែម ទៅលើថ្នាលមានស្រាប់ ដែលយុវជនជំនាន់មុនបានកសាង និងថែរក្សាដើម្បីយើង។ដោយឯកឧត្តមឧបនាយករដ្ឋមន្ត្រីបានមានប្រសាសន៍សង្កត់ធ្ងន់ថា ប្រជាពលរដ្ឋទាំងអស់គ្នា មានឱកាសរៀបចំពិធីដ៍អធិកអធមនៅពេលនេះ ក៍ដោយសារកម្ពុជារក្សាបាននូវស្ថិរភាពនយោបាយ ជាពិសេសគឺសន្តិភាពដែលកើតចេញពីការខិតខំប្រឹងប្រែងរបស់រាជរដ្ឋាភិបាលអាណត្តិមុននិងអាណត្តិបន្តដែលមានសម្តេច មហាបវរធិបតីហ៊ុន ម៉ាណែតជាប្រមុខ ហើយពាក្យថា "អរគុណសន្តិភាព"បានលាន់រន្ទឺពាសពេញផ្ទៃប្រទេសនោះគឺដោយសារប្រជាពលរដ្ឋកម្ពុជាយល់អំពីតម្លៃនៃសន្តិភាពដែលរកបានដោយលំបាកបំផុត ហេតុនេះពលរដ្ឋទាំងអស់គ្នាប្តេជ្ញាចិត្ត រក្សាសន្តិភាពឲ្យបានទោះត្រូវលះបង់ក្នុងតម្លៃណាក៍ដោយ៕

ដោយ៖ លឹម សាន្ត