AKP ភ្នំពេញ ថ្ងៃទី០៧ ខែមីនា ឆ្នាំ២០២៥-- ឯកឧត្តមបណ្ឌិត ហ៊ឺ វីរៈ តំណាងរាស្ត្រមណ្ឌលខេត្តកំពង់ឆ្នាំង តំណាងសមាគមឱសថការីខ្មែរ នៅប្រទេសបារាំង Nexty Pharm និងឯកឧត្ដម សុះ ស៊បអ៊ី អនុរដ្ឋលេខាធិការតំណាងដ៏ខ្ពង់ខ្ពស់លោកជំទាវបណ្ឌិត្យសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ រួមជាមួយសហការី កាលពីថ្ងៃទី០៦ ខែមីនា ឆ្នាំ២០២៥ បានអញ្ជើញនាំយកថវិកាចំនួន ១២ ០០០ ដុល្លារអាមេរិក ដែលទទួលបានពីសប្បុរសជន ក្នុងកម្មវិធីរាត្រីសមោសរសប្បុរសធម៌នៅសារមន្ទីរជាតិ រាជធានីភ្នំពេញនាពេលកន្លងទៅ មកប្រគល់ជូនមជ្ឈមណ្ឌលព្យាបាលកុមារ បេះដូងជប៉ុន ស្ថិតនៅឃុំវិហារហ្លួង ស្រុកពញាឮ ខេត្តកណ្តាល។

កម្មវិធីរាត្រីសមោសរសប្បុរសធម៌នេះ បានរៀបចំឡើងក្រោមកិច្ចសហការរវាង ក្រសួងវប្បធម៌ និងវិចិត្រសិល្បៈ ជាមួយសមាគមឱសថការីខ្មែរ នៅប្រទេសបារាំង ដោយប្រព្រឹត្តទៅក្រោមអធិបតីភាពដ៏ខ្ពង់ខ្ពស់ លោកជំទាវបណ្ឌិត្យសភាចារ្យ ភឿង សកុណា រដ្ឋមន្ត្រី ក្រសួងវប្បធម៌ និងវិចិត្រសិល្បៈ នៅសារមន្ទីរជាតិ រាជធានីភ្នំពេញ និងមានការអញ្ជើញចូលរួមពីថ្នាក់ដឹកនាំតាមក្រសួង-ស្ថាប័នមួយចំនួន ភ្ញៀវកិត្តិយសជាតិ និងអន្តរជាតិជាច្រើន។

កម្មវិធីរាត្រីសមោសរសប្បុរសធម៌ប្រារព្ធធ្វើឡើងក្នុងគោលបំណងស្វែងរកថវិកាឧបត្ថម្ភគាំទ្រដល់ មន្ទីរពេទ្យកុមារនានានៅក្នុងព្រះរាជាណាចក្រកម្ពុជា ដោយក្នុងនោះបានឧបត្ថម្ភទៅដល់មន្ទីរពេទ្យចំនួនបី ទី១. មន្ទីរពេទ្យគន្ធបុប្ផាខេត្តសៀមរាបចំនួន៣៦,០០០ ដុល្លារអាមេរិក ទី២. មន្ទីរពេទ្យកុមារអង្គរចំនួន១២,០០០ដុល្លារអាមេរិក និងទី៣. មជ្ឈមណ្ឌលព្យាបាលកុមារ បេះដូងជប៉ុនចំនួន១២,០០០ ដុល្លារអាមេរិក។

ឆ្លៀតក្នុងឱកាសនោះ ឯកឧត្តមបណ្ឌិតបានមានប្រសាសន៍ថ្លែងអំណរគុណដល់ក្រុមគ្រូពេទ្យទាំងបរទេស និងក្រុមគ្រូពេទ្យខ្មែរ ដែលបានលះបង់កម្លាំងកាយ ចិត្តចូលរួមព្យាបាល និងជួយសង្គ្រោះអាយុជីវិតកុមារ ដែលមានជំងឺជាច្រើននាក់ក្នុង ១ឆ្នាំៗ។ ក្រសួងនឹងរៀបចំព្រឹត្តិការណ៍សប្បុរសធម៌បែបនេះបន្តទៀតដើម្បីអំពាវនាវស្វែងរកថវិកាជួយទៅដល់មន្ទីរកុមារដែលមានការខ្វះខាតផ្សេងៗទៀត ក្នុងប្រទេសកម្ពុជា។

សូមបញ្ជាក់ជូនផងដែរ នៅចុងឆ្នាំ២០២៥នេះ មជ្ឈមណ្ឌលព្យាបាលកុមារ បេះដូងជប៉ុន នឹងបើកដំណើរការមន្ទីរពេទ្យថ្មីមួយបន្ថែមទៀត  ដើម្បីផ្តល់សេវាព្យាបាលជំងឺមហារីកកុមារ ដោយឥតគិតថ្លៃ ក្នុងបរិវេណមន្ទីរពេទ្យជ័យជម្នះ ដែលមានទីតាំស្ថិតនៅក្រុងតាខ្មៅ ខេត្តកណ្ដាល៕

ដោយ ណយ នឿន (ប្រភព៖ ក្រសួងវប្បធម៌)