AKP ភ្នំពេញ ថ្ងៃទី០៦ ខែមីនា ឆ្នាំ២០២៦–សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា នាព្រឹកថ្ងៃទី០៦ ខែមីនា ឆ្នាំ ២០២៥នេះ អញ្ជើញជាអធិបតី បើកកិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៥ នៅសណ្ឋាគារ សូហ្វីតែលភូគីត្រា រាជធានីភ្នំពេញ ។

 អ្នក​ឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធាន​ក្រុម​ប្រឹក្សា​ពិគ្រោះយោបល់​ធុរកិច្ច​អាស៊ាន-កម្ពុជា បានមានប្រសាសន៍ថា ខណៈដែលពាណិជ្ជកម្មក្នុងតំបន់អាស៊ានរបស់យើងត្រូវការរីកចម្រើនលឿនជាងនេះ សូមកត់សម្គាល់ថា អាស៊ាន​មានកំណើនពាណិជ្ជកម្មជាប្រចាំលើសកំណើនពាណិជ្ជកម្មសកល។ សក្ដានុពលដ៏ខ្លាំងក្លាទាំងនេះអាចសម្រេចបាន តាមរយៈចក្ខុវិស័យច្បាស់លាស់ និងយុទ្ធសាស្រ្តដែលផ្អែកលើសកម្មភាព។

ក្នុងន័យនេះ អ្នក​ឧកញ៉ា ប្រធានសភាពាណិជ្ជកម្មកម្ពុជា និងជាប្រធាន​ក្រុម​ប្រឹក្សា​ពិគ្រោះយោបល់​ធុរកិច្ច​អាស៊ាន-កម្ពុជា ជឿជាក់ថា បណ្តាញថាមពលអាស៊ាន គឺជាគំនិតផ្តួចផ្តើមសំខាន់មួយ សម្រាប់បន្តកំណើននិង​និរន្តរភាព ហើយអ្នក​ឧកញ៉ា សុំជំរុញឱ្យថ្នាក់ដឹកនាំអាស៊ានផ្តល់អាទិភាព។

បណ្តាញថាមពលអាស៊ានផ្តល់ឱកាសពិសេស និងមានសារៈសំខាន់ក្នុងការជំរុញពាណិជ្ជកម្ម និង​ការ​ប្រើប្រាស់​អគ្គិសនី​ឆ្លងដែន ដែលជំរុញនិងពន្លឿនការអភិវឌ្ឍសេដ្ឋកិច្ចក្នុងតំបន់។

ដូចដែលយើងទាំងអស់គ្នាដឹងហើយថា ការអភិវឌ្ឍហេដ្ឋារចនាសម្ព័ន្ធ គឺជាសសរស្តម្ភសំខាន់នៃ​សមាហរណ កម្ម​ក្នុងតំបន់។ យើងត្រូវពន្លឿនការខិតខំប្រឹងប្រែងរបស់យើងទ្វេដង ដើម្បីផ្តល់អាទិភាព​ដល់​ការវិនិយោគ​លើហេដ្ឋារចនាសម្ព័ន្ធរូបវន្ត ដូចជាផ្លូវថ្នល់ ផ្លូវដែក កំពង់ផែ–ក៏ដូចជាការតភ្ជាប់ឌីជីថលផងដែរ។

ដំណើរស្វែងរកគ្មានទីបញ្ចប់នៃលំហូរទំនិញ សេវាកម្ម និងព័ត៌មាននៅទូទាំងអាស៊ាន ត្រូវតែពិនិត្យពិចារណា និងដោះស្រាយជាមួយនវានុវត្តន៍ចុងក្រោយបំផុត នៅក្នុងបច្ចេកវិទ្យាឌីជីថល និងបញ្ញាសិប្បនិមិត្ត​ (AI)។

ត្រង់ចំណុចនេះ យើងសង្ឃឹមថា ដៃគូសន្ទនារបស់យើងអាចដើរតួនាទីយ៉ាងសំខាន់ ​បន្ត​ការប្តេជ្ញា​ចិត្ត​របស់​ពួកគេ​ចំពោះកិច្ចសហប្រតិបត្តិការ និងកិច្ចសហការជាមួយអាស៊ាន ប្រឆាំងនឹងការស្វែងរកការ​កាត់ផ្ដាច់​សេដ្ឋកិច្ច​និងភាពឯកោ។

សំខាន់ជាងនេះទៅទៀត យើងមិនដែលទុកចោលទ្រព្យសម្បត្តិដ៏សំខាន់បំផុតរបស់យើងនោះទេ ពោលគឺ​កម្លាំង​ពលកម្មរបស់យើង – ដែលជាបេះដូងនិងព្រលឹងនៃជាតិសាសន៍របស់យើង។ យើងត្រូវជំរុញ​កិច្ច​សហការជាក់ស្តែងបន្ថែមទៀតរវាងរដ្ឋាភិបាល សហគមន៍ធុរកិច្ច វិទ្យាស្ថាននិងស្ថាប័នបណ្តុះបណ្តាល។

នៅខណៈដែលយើងផ្តោតលើការបណ្ដុះជំនាញថ្មី និងការបណ្តុះបណ្តាលប្រជាជនរបស់យើងឡើងវិញ សម្រាប់បដិវត្តន៍ឧស្សាហកម្មទី ៤, បញ្ញាសិប្បនិមិត្ត បានលេចមកជាមួយដែរ។ យើងត្រូវរៀបចំ​សំណាញ់​សុវត្ថិភាព និង​កាលានុវត្តភាពសម្រាប់ការបង្កើតការងារសមរម្យដែលមានភាពប្រកួតប្រជែង៕

ដោយ៖ គង់ សិរីរ័ត្ន