AKP ភ្នំពេញ ថ្ងៃទី០៥ ខែមីនា ឆ្នាំ២០២៥ -- ឯកឧត្តម ឡាំ ជា រដ្ឋមន្រ្ដីទទួលបន្ទុករដ្ឋលេខាធិការដ្ឋានកិច្ចការព្រំដែន កាលពីថ្ងៃទី០៣-០៤ ខែមីនា ឆ្នាំ២០២៥ បានដឹកនាំគណៈប្រតិភូនៃរដ្ឋលេខាធិការដ្ឋានកិច្ចការព្រំដែន ចុះត្រួតពិនិត្យ (១) ភូមិសាស្ត្របរិវេណច្រកទ្វារព្រំដែនអន្តរជាតិជាំ និងបង្គោលព្រំដែនលេខ1 ដែលមានទីតាំងស្ថិតក្នុងភូមិសាស្រ្តភូមិជើងភ្នំ ឃុំត្រពាំងប្រិយ ស្រុកអន្លង់វែង ខេត្តឧត្តរមានជ័យ, (២) ភូមិសាស្ត្របរិវេណច្រកទ្វារព្រំដេនអន្តរជាតិអូរស្មាច់ និងបង្គោលព្រំដែនលេខ 15 ដែលមានទីតាំងស្ថិតក្នុងភូមិសាស្រ្ត សង្កាត់អូរស្មាច់ ក្រុងសំរោង ខេត្តឧត្តរមានជ័យ, (៣) ចុះសួរសុខទុក្ខ កងទ័ព និងនគរបាលដែលឈរជើងការពារព្រំដែនប្រចាំទិសប្រាសាទតាក្របី ដែលមានទីតាំងស្ថិតក្នុងភូមិសាស្រ្ត ភូមិឈើស្លាប់ ឃុំគោកខ្ពស់ ស្រុកបន្ទាយអំពិល ខេត្តឧត្តរមានជ័យ, (៤) សំណេះសំណាលសួរសុខទុក្ខកងទ័ព និងនគរបាលដែលឈរជើងការពារព្រំដែនប្រចាំទិសប្រាសាទតាមាន់ ដែលមានទីតាំងស្ថិតក្នុងភូមិសាស្រ្តភូមិគូ ឃុំគោកមន ស្រុកបន្ទាយអំពិល ខេត្តឧត្តរមានជ័យ និង(៥) ត្រួតពិនិត្យភូមិសាស្រ្តបរិវេណច្រកទ្វារជប់គគីរ និងបង្គោលព្រំដែនលេខ 25 ដែលមានទីតាំងស្ថិតក្នុងភូមិសាស្រ្តភូមិជប់គគីរខាងលិច ឃុំអំពិល ស្រុកបន្ទាយអំពិល ខេត្តឧត្តរមានជ័យ។

ក្នុងដំណើរចុះត្រួតពិនិត្យបង្គោលព្រំដែនច្រកទ្វារអន្តរជាតិ និងសំណេះសំណាលសួរសុខទុក្ខកងកម្លាំងឈរជើងការពារព្រំដែននៅតាមបណ្តោយព្រំដែនកម្ពុជា-ថៃ ស្ថិតក្នុងភូមិសាស្រ្តខេត្តឧត្តរមានជ័យ មានការចូលរួមអមដំណើរពីសំណាក់អភិបាលរងនៃគណៈអភិបាលខេត្តឧត្តរមានជ័យ កងកម្លាំងការពារព្រំដែនប្រចាំទិសព្រំដែននីមួយៗ និងអាជ្ញាធរមូលដ្ឋានពាក់ព័ន្ធគ្រប់លំដាប់ថ្នាក់។

នាឱកាសចុះត្រួតពិនិត្យ និងសំណេះសំណាលនោះ ឯកឧត្ដមរដ្ឋមន្ត្រី និងជាប្រធានគណៈប្រតិភូ បានពាំនាំនូវប្រសាសន៍ផ្តាំផ្ញើសួរសុខទុក្ខ និងការកោតសរសើរពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ជូនដល់កងកម្លាំងទាំងអស់ដែលកំពុងឈរជើងការពារអធិបតេយ្យ និងបូរណភាពទឹកដី តាមបណ្តោយព្រំដែនកម្ពុជា-ថៃ។

ទន្ទឹមនឹងនេះ ឯកឧត្តមរដ្ឋមន្ត្រីបានលើកទឹកចិត្ត និងជូនពរឱ្យកងកម្លាំងទាំងអស់ មានសុខភាពល្អមាំមួន ដើម្បីបន្តបំពេញភារកិច្ចជូនជាតិមាតុភូមិ និងប្រជាជន ព្រមទាំងបានប្រគល់អំណោយជាគ្រឿងឧបភោគបរិភោគ និងថវិកាឧបត្ថម្ភមួយចំនួន ជូនដល់ (១) វរសេនាតូចថ្មើជើងលេខ៤៤៤ និងវរសេនាតូចនគរបាលការពារព្រំដែនគោកលេខ៧០២ ប្រចាំទិសប្រាសាទតាក្របី និង(២) វរសេនាតូចថ្មើជើងលេខ៤២២ និងវរសេនាតូចនគរបាលការពារព្រំដែនគោកលេខ៧០២ ប្រចាំទិសប្រាសាទតាមាន់៕

ដោយ៖ ពេជ្រ សំអឿន (ប្រភព៖ រដ្ឋលេខាធិការដ្ឋានកិច្ចការព្រំដែន)