AKP សៀមរាប ថ្ងៃទី០៥ ខែមីនា ឆ្នាំ២០២៥-- ដើម្បីអបអរសាទរទិវានារីអន្តរជាតិ៨មីនាខួបលើកទី១១៤ សមាគមសហគ្រិនស្ត្រីកម្ពុជា សាខាខេត្តសៀមរាប បានប្រារព្វវេទិកាស្ត្រីដើម្បីអ្នកទាំងអស់គ្នា ក្រោមប្រធានបទ “ស្ត្រីលើវិថីអ្នកជំនួញសម័យ AI” កាលពីរសៀលថ្ងៃទី០៤ ខែមីនា ឆ្នាំ២០២៥ នៅសណ្ឋាគារសុខាល័យអង្គរ ក្រុងសៀមរាប ក្រោមអធិបតីភាពលោកជំទាវ ទុយ ជិ ប្រាក់ សោភ័ណ អនុប្រធានគណ:កម្មាធិការសាខាកាកបាទក្រហមកម្ពុជាខេត្តសៀមរាប និងជាប្រធានកិត្តិយសសមាគមកាយឬទ្ធិនារីកម្ពុជាសាខាខេត្តសៀមរាប ដោយមានការចូលរួមពីសំណាក់អស់លោក លោកស្រីដែលជាអភិបាលរងខេត្ត ប្រធានសមាគមសហគ្រិនស្រ្តីកម្ពុជា ថ្នាក់ដឹកនាំស្ថាប័ន អង្គភាពពាក់ព័ន្ធក្នុងខេត្តប្រមាណជា ២០០នាក់បានចូលរួម។

លោកស្រី ហេង ចរិយា អនុប្រធាសមាគមសហគ្រិនស្ត្រីកម្ពុជាសាខាសៀមរាប បានអាននូវព្រះរាជសាររបស់សម្តេចម៉ែ ព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជូនដល់បងប្អូនស្ត្រីក្នុងអង្គពិធីទាំងមូលបានស្តាប់។

ក្នុងឱកាសនោះ លោកជំទាវ ទុយ ជិ ប្រាក់ សោភ័ណ ក៏បានមានប្រសាសន៍គូសបញ្ជាក់ថា ការប្រារព្ធទិវានេះឡើង ក្នុងគោលបំណងដើម្បីបង្ហាញពីសេចក្តីស្រឡាញ់ទៅកាន់អ្នកទាំងអស់គ្នា ក៏ដូចជាការផ្តល់តម្លៃឱ្យស្ត្រី និងបុរស ក្នុងភាពជាអ្នកដឹកនាំដ៏ល្អសម្រាប់សង្គមជាតិទាំងមូល និងការកើនឡើងនៃតួនាទីរបស់សមាគមសហគ្រិនស្ត្រីកម្ពុជា ក្នុងការអភិវឌ្ឍសេដ្ឋកិច្ចនៅខេត្តសៀមរាបផងដែរ។

ក្នុងឱកាសនោះ លោកជំទាវ ទុយ ជិ ប្រាក់ សោភ័ណ បានមានប្រសាសន៍ថា វេទិកាស្ត្រីដើម្បីអ្នកទាំងអស់គ្នា និងការចែករំលែកចំណេះដឹងជាសាធារណៈលើប្រធានបទ “ស្ត្រីលើវិថីអ្នកជំនួញសម័យ AI” គឺជាការលើកកម្ពស់ស្ត្រី និងជាអាទិភាពក្នុងសង្គមបច្ចុប្បន្នមានសារៈសំខាន់ ដល់ការអភិវឌ្ឍជំនាញ បច្ចេកវិទ្យា និងចាប់ផ្តើមអាជីវកម្ម ដើម្បីឱ្យស្ត្រីកម្ពុជា អាចបន្តបង្កើនសមត្ថភាព ក្លាយជាអ្នកដឹកនាំអាជីវកម្ម និងអភិវឌ្ឍសង្គមជាតិ។

ទន្ទឹមនឹងនេះ លោកជំទាវ ទុយ ជិ ប្រាក់ សោភ័ណ ក៏បានកោតសសើរចំពោះសមាគមសហគ្រិនស្ត្រីកម្ពុជាសាខាខេត្តសៀមរាប ជាពិសេសក្រុមប្រឹក្សាភិបាលទាំងអស់ក្នុងអាណត្តិទី២នេះ ដែលបានបំពេញការងារយ៉ាងសម្បើម ក្នុងការជួយគាំទ្រនិងការពារស្ត្រី ជាពិសេសស្ត្រីសមាគមសហគ្រិន តាមរយៈការបណ្តុះបណ្តាលជំនាញនានា ការប្រឹក្សាយោបល់ ការកសាងបណ្តាញធុរកិច្ច ក្នុងការប្រមូលបញ្ហាប្រឈមនានារបស់សហគ្រិនស្ត្រី ដើម្បីនាំយកបញ្ហាប្រឈម ឬសំឡេងស្ត្រី ទៅជូនស្ថាប័ន ឬអ្នកធ្វើគោលនយោបាយពាក់ព័ន្ធនានានៅថ្នាក់ជាតិ និងថ្នាក់ក្រោមជាតិ ក្នុងការស្វែងរកដំណោះស្រាយ ក៏ដូចជាការរៀបចំកម្មវិធីផ្សេងៗ ដើម្បីឆ្លើយតបទៅនឹងតម្រូវការរបស់សហគ្រិនស្ត្រីយើង៕

ដោយ ហង្ស សៀក