AKP ព្រះសីហនុ ថ្ងៃទី០១ ខែមីនា ឆ្នាំ២០២៥-- លោកជំទាវ គីម សុភ័ក្ត្រ ម៉ាងស៊ីណេត ប្រធានកិត្តិយសសាខាសមាគមនារី ដើម្បីសន្តិភាព និងការអភិវឌ្ឍខេត្តព្រះសីហនុ បានអញ្ជើញសំណេះសំណាលជាមួយលោកគ្រូ អ្នកគ្រូ និងនាំយកកាតាប សម្ភារសិក្សា និងថវិកាចែកជូនសិស្សានុសិស្សសាលាបឋមសិក្សាបូរីកម្មករ ស្ថិតនៅភូមិ៣ សង្កាត់លេខ៣ ក្រុង ខេត្តព្រះសីហនុ ព្រឹកថ្ងៃសៅរ៍ទី០១ ខែមីនា ឆ្នាំ២០២៥ ដោយមានការចូលរួមពីអនុប្រធានកិត្តិយសសាខា ប្រធានប្រតិបត្តិសាខា សមាជិកគណ: សមាជិការគណកម្មការសមាគមនារី ដើម្បីសន្តិភាព និងការអភិវឌ្ឍខេត្តព្រះសីហនុ។

លោកជំទាវ គីម សុភ័ក្ភ្រ ម៉ាង ស៊ីណេត បានធ្វើការសំណេះសំណាលជាមួយលោកគ្រូ អ្នកគ្រូ សិស្សានុសិស្សសាលាបឋមសិក្សាបូរីកម្មករចំនួន៣៥៣នាក់  ព្រមទាំងបានពាំនាំប្រសាសន៍ផ្តាំផ្ញើរសាកសួរសុខទុក្ខពីសម្តេចកិតិ្តព្រឹត្តបណ្ឌិត ប៊ុន រ៉ានី ហ៊ុន សែន ក៏ដូចឯកឧត្តម ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ ដែលជានិច្ចកាលលោកតែងតែយកចិត្តទុកដាក់ចំពោះសុខទុក្ខចំពោះក្មួយៗសិស្សានុសិស្ស ដែលកំពុងតែសិក្សាក្រេបយកនូវចំណេះវិជ្ជា ជាពិសេសលោកគ្រូ អ្នកគ្រូ ដែលបានលះបង់កម្លាំងកាយចិត្ត ក្នុងការបង្រៀនក្មួយៗសិស្សានុសិស្ស ក្នុងនាមជាឪពុក ម្តាយទី២។ ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្ត្រី ជាប្រធានព្រឹទ្ធសភា បានលះបង់សាច់ស្រស់ឈាមស្រស់ យកអាយុជីវិតធ្វើជាដើមទុន ដើម្បីការពារប្រទេសជាតិមាតុភូមិ ដោយដៃម្ខាងខិតខំអភិវឌ្ឍ និងដៃម្ខាងទៀតទប់ទល់នឹងការឈ្លានពានជាមួយពួកអមិត្ត។ សម្តេចបានបន្សល់ទុកនូវស្នាដៃ និងសមិទ្ធផលធំៗជាប្រវត្តិសាស្រ្ត ដោយឈរលើស្មារតីបន្តវេនប្រកបដោយឧត្តមគតិ និងការបេ្តជ្ញាចិត្តរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បន្តរក្សាសុខសន្តិភាព ស្ថិរភាព និងអភិវឌ្ឍសង្គមសេដ្ឋកិច្ច  នឹងបានដាក់ចេញនូវយុទ្ធសាស្រ្តបញ្ចកោណដំណាក់កាលទី១ នីតិកាលទី៧ នៃរដ្ឋសភា បន្តកែទម្រង់សាលារៀនជំនាន់ថ្មី សាលារៀនគំរូ អភិបាលកិច្ចពង្រឹងគុណភាព នៃការបណ្តុះបណ្តាលគ្រូបង្រៀន វិធីសាស្ត្របង្រៀន ព្រមទាំងការលើកកម្ពស់ជីវភាព និងគុណតម្លៃ បុគ្គលិកសិក្សាគ្រប់កម្រិត ការអប់រំឌីជីថល ហេដ្ឋារចនាសម្ព័ន្ធឌីជីថល វិទ្យាសាស្ត្រ និងបច្ចេកវិទ្យា។ វិធានការគន្លឹះក្នុងវិស័យអប់រំដែលដាក់ចេញដោយសម្តេចមហាបវរធិបតី ក្នុងគោលដៅពង្រឹងគុណភាពអប់រំ ចាប់ពីមត្តេយ្យសិក្សា ដល់មធ្យមសិក្សាជាកម្លាំងចលករមិនអាចខ្វះបាន ជាមូលដ្ឋានគ្រឹះ នៃភាពរីកចម្រើននៃសេដ្ឋកិច្ចសង្គម ។ ការយកចិត្តទុកដាក់លើយុវជន និងកុមារ ស្តីពីគោលនយោបាយជាតិ ស្តីពីការសិក្សាពេញមួយជីវិត ដែលជាចក្ខុវិស័យអភិវឌ្ឍប្រជាជនកម្ពុជាគ្រប់រូបឱ្យមានវិជ្ជាសម្បទា បំណិនសម្បទា ចរិយាសម្បទា និងកាយសម្បទា ដើម្បីរួមចំណែកបង្កើនសេដ្ឋកិច្ច និងលើកកម្ពស់សុខដុមជីវិតបុគ្គល គ្រួសារ និងសង្គមជាតិ តាមរយៈការផ្តល់ឱកាសសិក្សាពេញមួយជីវិត គ្រប់ពេលវេលា គ្រប់ទីកន្លែង។

លោកជំទាវបានកោតសសើរវាយតម្លៃចំពោះប្រធានមន្ទីរអប់រំ លោកគ្រូ អ្នកគ្រូ និងអាជ្ញាធរបានចូលរួមចំណែកលើកកម្ពស់វិស័យអប់រំនៅកម្ពុជា ដោយឡែកនៅខេត្តព្រះសីហនុ ជំរុញឱ្យក្មួយៗ ចៅៗ សិស្សានុសិស្សខិតខំរៀនសូត្រធ្វើជាកូនល្អ សិស្សល្អ មិត្តល្អ និងពលរដ្ឋល្អក្លាយជាធនធានមនុស្សដ៏មានសក្ដានុពលសម្រាប់គ្រួសារ និងសង្គមជាតិ។ យើងត្រូវធ្វើជាកូនល្អ កូនល្អមានអត្តចរិកស្លួតបូត សុភាពរាបសា ទន់ភ្លន់ ស្តាប់ដំបូន្មានឪពុកម្តាយ ចាស់ទុំ ចាស់ព្រឹទ្ធាចារ្យ ព្រះសង្ឃ ស្រលាញ់ពលកម្ម អនាម័យ និងបរិស្ថាន។ សិស្សល្អ ត្រូវមានសេចក្តីព្យាយាមរៀនសូត្រ គោរពបទបញ្ជាផ្ទៃក្នុងសាលា មានស្មារតីស្រាវជ្រាវចូលរួមសកម្មភាពសង្គម មិនបង្កការលំបាកដល់សាលា និងជួយថែរក្សាបរិស្ថានសាលា។ ត្រូវធ្វើជាគំរូល្អដល់មិត្តភក្តិ មានទំនាក់ទំនងល្អជាមួយមិត្តភក្តិទាំងក្នុង និងក្រៅថ្នាក់ ចេះដាស់តឿនមិត្តភក្តិដែលគេចវេស ឬបោះបង់ការសិក្សា មិនរើសអើងចំពោះមិត្តភក្តិ។ ពលរដ្ឋល្អ ត្រូវមានអត្តចរិក ឫកពារ សីលធម៌រស់នៅល្អ ចេះគោរពច្បាប់មិនបង្កការលំបាកដល់សង្គម ចូលរួមអភិវឌ្ឍសហគមន៍ គោរពសិទ្ធិអ្នកដទៃ ថែរក្សាសិទ្ធិអ្នកដទៃ ថែរក្សាសម្បត្តិសាធារណៈសូមឆ្លើយថាទេ ចំពោះ «គ្រឿងញៀន» និងក្មេងទំនើង។

ទន្ទឹមនឹងនេះ លោកជំទាវប្រធានកិត្តិយសាខាសមាគមនារី បានធ្វើការផ្តាំផ្ញើដល់ក្មួយៗសិស្សានុសិស្ស ត្រូវខិតខំរៀនសូត្រ ក្រេបយកចំណេះវិជ្ជាបំរើជាតិមាតុភូមិ ព្រោះក្មួយៗជាទំពាំងស្មងឫស្សី ក្នុងការចូលរួមចំណែកកសាង និងអភិវឌ្ឍមាតុភូមិកម្ពុជាឱ្យមានការរីកចម្រើន ព្រមទាំងបានចែកកាតាប និងសម្ភារសិក្សាដល់សិស្សានុសិស្សចូលរួមចំនួន៣៥៣នាក់ ក្នុងម្នាក់ទទួលបានកាតាបមួយ សម្ភារសិក្សា និងថវិកា៕

ដោយ ងូ សុមុនី