AKP សៀមរាប ថ្ងៃទី០១ ខែមីនា ឆ្នាំ២០២៥-- អាជ្ញាធរខេត្តសៀមរាបបានលើកឡើងថា ការបើកវគ្គបណ្តុះបណ្តាលជំនាញវិជ្ជាជីវៈលើវិស័យទេសចរណ៍ ក៏ជាការរៀបចំផ្ទះយើងឱ្យបានស្អាតដើម្បីទទួលភ្ញៀវ ក៏ដូចជាការបង្កើតឱកាសការងារដល់យុជនដែលមានជំនាញពិតប្រាកដ។

ថ្លែងក្នុងពិធីប្រគល់វិញ្ញាបនបត្រដល់សិក្ខាកាមចំនួន២០០នាក់ នៅខេត្ដសៀមរាប ដែលបានបញ្ចប់ការបណ្ដុះបណ្ដាលរយៈពេល៨ខែ លើផ្នែកបដិសណ្ឋារកិច្ចក្នុងវិស័យទេសចរណ៍ នារសៀលថ្ងៃទី២៨ ខែកុម្ភៈ ឆ្នាំ២០២៥នេះ លោក ង៉ូវ សេងកាក់ អភិបាលរងខេត្តសៀមរាប បានលើកឡើងថា នៅក្នុងឆ្នាំ២០២៤កន្លងទៅ ខេត្តសៀមរាបទទួលបានអ្នកទេសចរបរទេសប្រមាណជា១លាន២ម៉ឺននាក់ ដែលចំនួននេះ មានការកើនឡើងប្រមាណជា២៨ភាគរយ បើប្រៀបធៀបជាមួយឆ្នាំ២០២៣កន្លងទៅ។ តាមពិតយើងមានផែនការទាក់ទាញអ្នកទេសចរបរទេសឱ្យមកកម្សាន្តនៅខេត្តសៀមរាបឱ្យបាន១២សែននាក់។ ប៉ុន្តែយើងបានប៉ុននេះ ក៏ជាការខិតខំមួយរបស់គ្រប់ភាគីពាក់ព័ន្ធ។

លោក ង៉ូវ សេងកាក់ បានបន្តថា ការកើនឡើងរបស់អ្នកទេសចរបរទេសដែលមកកម្សាន្តនៅខេត្តសៀមរាបនេះ បានបង្ហាញឱ្យឃើញថា វិស័យនេះបានងើបឡើងវិញក្រោយដួលរំដោយសារវិបត្តិកូវីដ១៩ ហើយក៏បានបង្ហាញថា កម្ពុជា ជាពិសេសខេត្តសៀមរាប បានរៀបចំខ្លួន រៀបចំផ្ទះបានយ៉ាងល្អសម្រាប់ទទួលអ្នកទេសចរ ដែលក្នុងនោះការបណ្តុះបណ្តាលជំនាញវិជ្ជាជីវៈលើវិស័យទេសចរណ៍នេះ ក៏ជាការរួមចំណែកយ៉ាងសំខាន់នៅក្នុងការរៀបចំខ្លួន រៀបចំផ្ទះ ដើម្បីទទួលភ្ញៀវ ហើយក៏ជាការផ្ទល់ឱកាសការងារដល់យុវជនផងដែរ។

ក្នុងឱកាសនោះ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ ក៏បានលើកឡើងដែរថាការបង្កើតឱកាសការងារដល់យុជន ដើម្បីទទួលបានប្រាក់ចំណូលសមរម្យ និងមានវិថីអភិវឌ្ឍន៍ជំនាញច្បាស់លាស់ជាតួនាទីរបស់គ្រប់ភាគីពាក់ព័ន្ធ។ ការអភិវឌ្ឍធនធានមនុស្ស ក្រសួងទេសចរណ៍បានដាក់ចុះនូវយុទ្ធនាការ “បុគ្គលិកម្នាក់ ជំនាញមួយ (One Employee, One Skill)”  ដែលមានបញ្ជូលក្នុងផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍ដោយផ្តោតលើទាំងបរិមាណ និងគុណភាព ដើម្បីឆ្លើយតបទៅនឹងតម្រូវការនៃការអភិវឌ្ឍន៍វិស័យទេសចរណ៍ ដែលមានតម្រូវការអ្នកជំនាញប្រមាណ ១,១លាននាក់ នៅឆ្នាំ២០៣០ និងប្រមាណ ១,៤លាននាក់ នៅឆ្នាំ២០៣៥ និងឆ្ពោះទៅសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ SDG 4 និង SDG 8។ ឯកឧត្តមក៏បានជំរុញឱ្យសិក្ខាកាមទាំងអស់ត្រូវខិតខំអនុវត្តការងារដោយប្រើចំណេះជំនាញដែលទទួលបាន ប្រកបដោយផ្លែផ្កាល្អ ព្រោះការបណ្តុះបណ្តាលនេះបានផ្តល់លទ្ធភាពក្នុងការស្វែងរកឱកាសការងារល្អៗ ដើម្បីខ្លួនឯង គ្រួសារ និងសង្គមជាតិ។

ឯកឧត្តមក៏បានលើកទឹកចិត្ត និងណែនាំដល់សិក្ខាកាមដែលទើបបញ្ចប់វគ្គ ឱ្យស្គាល់ច្បាស់អំពីខ្លួនឯង និងធ្វើការដឹងគុណដល់ខ្លួនឯង តាមរយៈប្រព្រឹត្តិតែអំពើល្អ ដឹងគុណដល់មាតាបិតាអាណាព្យាបាលដែលពួកគាត់មានថ្ងៃនេះ និងជាពិសេសដឹងគុណដល់ប្រមុខដឹកនាំរាជរដ្ឋាភិបាលដែលបាននាំសុខសន្តិភាព ឱ្យមានការអភិវឌ្ឍប្រទេសជាតិ បើគ្មានសន្តិភាពទេយើងក៏គ្មានថ្ងៃនេះដែរ។

យោងតាមលោក លោក ហ្វ៊ីលីព សែតកៅ ប្រធានសមាគមក្លឹបទេសចរណ៍សៀមរាប បានឱ្យដឹងថា វគ្គបណ្តុះបណ្តាលដែលមានរយៈពេល៨ខែ សិក្ខាកាមបានសិក្សាលើទ្រឹស្តីចំនួន៤ខែ និងខែចុះកម្មសិក្សាក្នុងបណ្តាក្រុមហ៊ុនដៃគូរយៈពល៤ខែ។ កម្មវិធីបណ្តុះបណ្តាលនេះផ្ដល់ជាផ្លែផ្កាយ៉ាងពិតប្រាកដការទទួលបានការងារដែលអាចជួយសម្រួលជីវភាពខ្លួនគេ និងមួយចំនែកសម្រាលបន្ទុកចំនាយដល់គ្រួសាររបស់គេក្នុង ន័យលើកកម្ពស់សេដ្ឋកិច្ចគ្រួសារ កាត់បន្ថយការចំណាកស្រុកដោយខុសច្បាប់ និងផ្តោត ទៅលើការសិក្សាពេញមួយជីវិត ដែលយុទ្ធសាស្ត្ររបស់សមាគម និងស្វះស្វែងក្នុងការបន្ត បំពាក់បំប៉ន ដល់ប្អូនៗបន្តទៀតលើគម្រោងអភិវឌ្ឍន៍សមត្ថភាព(UPSKILL) & ស្តារលទ្ធភាពជំនាញ (RESKILL) ក៏ដូចជាការបើកឱកាសអោយប្អូនៗបន្តការសិក្សាដល់ថ្នាក់ឧត្តមសិក្សា ជាមួយនឹងសកលវិទ្យាល័យដែលជាដៃគូអភិវឌ្ឍន៍ធនធានមនុស្ស ដូចជា សាកលវិទ្យាល័យអង្គរ និងសាលាភាសារដទៃទៀតដែលសមាគមអាចធ្វើទៅបាន ជាពិសេសការផ្តោតបន្ថែមលើភាសាអង់គ្លេស និងភាសាចិន និងភាសាបរទេសបន្ថែមទៀត យ៉ាងហោចណាស់ប្អូនត្រូវមានជំនាញអាចនិយាយបានពីរភាសាដើម្បីភាពត្រៀមខ្លួន និង រួចរាល់ក្នុងការទទួលបដិសណ្ឋារកិច្ចទេសចរចិនមកព្រះរាជាណាចក្រកម្ពុជា៕

ដោយ ឃុត សៅ